Zomi leh Cyber Crime I

Tulai in Zomi sungah Cyber Crime kici internet sualna hong tam simsim ta ci in kiza hi.

Cyber Crime cih pen internet zanga sualnate  cihna ahihi. Internet pen manlang, baih leh mimal kiselsim nang baih ahihmanin, misual ten sualbawl nang leh sualna tuamtuam bawl nangin nak zat mahmah ta uh hi. Gamgi omlo leh mimal kimu/kimulo (physical or virtual)  ahizongin, sualna khatpeuh vaihawm leh gamtat theih ziauziau ahihmanin, cyber crime pen leitungah nisim in khang dutdut mai ci hi.

Cyber Crime pen a huampi in nam 3 khawngin kikhen thei ahihi.

1. Computer leh a sunga khuakte suksiatna. Gentehna in botnet, malware kithuahsak leh computer network sung kibuluh sakin sunga thu teng  kipheklek sakna. Attacks
2. Sum leh pai deihna tawh SumSualbawlna ( Financial Crimes)  leh golhguk ( Corruptions). Gentehna in Bank leh sumlam saite buluhsimna ( Penetration), zuau tawh sumbawl le sumphaanna ( Fraud)  leh zuau khatpeuh paulap a sumkhonna ( Phishing).
3. Abuse kici internet thaangzat a zawlheelna, sex ngetna, sex zolna, sexbuluhna leh naupangte tunga  sex polhtehna. Sexploitations.

Cihte huam hi.

Cyber Crime nam tuamtuam nisimin khang tektek a, leitung silbawlna leh sumbawlnate ah billions simin supna piangsak ci hi. Nidangin cyber crime pen  mimal khenkhat leh group lomnokhat khawng i hih hi a, tuhun ciangin sum ngah nang leh ngimna tuamtuam tawh, computer siam mahmahte kikaikhawm a kipawlna lian pipi phuanin gamta om ta ahihi.

Leitungbup pan kikaikhawmin, thakhatthu hun tomno sungin, a siat daan tuatkholh theihloh zah dong dingin nasem zo ta uh hi ci in, leitungbup police kizomkhawmna ahi International Police-Interpol te'n gen uh hi.

Hibang sualnate in gamgi ciantan neilo in leitungbup ah thusia piangpiang sak leh, maban ah zong hong tam zaw kanlai ding ahihmanin, Interpol te'n zong panlakna nasia takin nei ta uh hi.

International Police-Interpol Panlakna 

Leitungbup level huam a kidal leh encik dingin tu'n Asia a Singapore khawpi ah, Interpol Global Complex for Innovation kici, leitungbup cyber crime te pholhkhiat nang leh kidal nang ngimna tawh research phualpi khat kihong ta ahihi.

Hih thu pen Interpol te page pan Cyber Crime thu tomkimcing a mipi hilhna uh,  Zomi mipi inzong a huampi i theihtheih  nang ngimna tawh, behlaptawm omlo a kong teikhiat ahihi.

Singapore i gen ngei leh nungdeuh in Zomi leh Zomi mah kibawlsia in, Singapore a nulepa vaknang a nasem Zolia khat, mawhna neilopi in internet ah Zomi misok khat in selpho gawp ngei a, thubul thubal kancianlo pi in,  Zomi FB group khat ah mipi in zong phuisam huan dikdek ahihmanin, khakhat sung bang ann kam limlo in ka gawnglawh gawp ci in, Zolia khat in August 25, 2015 ni in WZC ah thu hong tu'n hi.

Part 2 pen Zomi sunga thu tung zeuhzeuhte tawh genkak kawm in i zom ding hi. part 3 ah kidal nang tawh i khup dinga, khen 3 i suah ding hi.