Operation Zingsol II

Part One a i gelh mah bangin, Cikha Kawlgalkapte banghanga tuaci buaisiat uh hiam? uh cih ahang i suut kik ciangin, abeisa a Zomi leh Zogam dinmun leh, Kawl te'n Zomi leh Zogam hong muh daan tung ah na kinga mahmah ahihi. Anuai ah point khenkhat i taaklang ahihi.

• .Zogam ah Kawl Gamkeek galkapte utbanga a om zawh uh asawt mahmah ta hangin, gal thupi lua tuak ngeillo uh hi.
• Galthupi lua atuakloh uh ban ah, nidangin Zomite Kawlgam galkap alut tam ahihmanin, Kawlgam galkap pen maingap bawl uh a, siatna leh gentheihna naakpi taktak amau ahihlam kitheilo hi. 
• India do kipawlna tuamtuam a om sam hangin, tuate kipawlnate in do cih thadah, Kawlgalkapte beel nuam zawsop uh in, mai-et zaw uh hi.
• Zomi leh Zogam a dinga nasem kipawlna tuamtuam a om hangin, hamsatna leh ahang tuamtuam tawh, Kawlte avakap ngam taktak leh akapnuam taktak kuamah omlo a, Kawlgalkap te'n a delhbawl cianga,  deelzen a kihemkhiamang pahpah tam zaw ahihi. Tua ahihmanin Kawlgalkap khenkhat te bangin, hong kap zeel bek le uh,  ci zawzen uh hi.

Tuabang teng leh ahang dang tuamtuam hangin, Kawlgalkapte pen Zogam ah maingal mahmah in,  utut  a om,  utut sut,  duhduh ne, a utut uh sat, vua, bawlsia, luppih cihbangin, apu apate un deih bangbanga tat theih nang ci a apiak uh,  bawlsiat leh simmawh ngiat ding "Gam Palangh" khat in Zomi leh Zogam pen hong na ngaihsun uh ahihi.

Hibang teng dinmun ah om a,  Zomi te'n, akhangkhangin  na dawh dihdeh i hihmanin, a camp/sakhan phung tektek a, Galto Thauging ( Challenging Fire) hong om peetmah ciangin, zum zong zumzo nawnlo a, buaipaat gawp uh ahihi.

Anungciangin zumsel na ding in, ZRA leh CNA  te sumdong a sitkyaung pailai, kituakkha vat uh a, kikap uh hi, ci in Cikha Sub-Town huam tengah, zum selna in,  thu thehthang kik samsam pong uh hi. Hih thu Zogam bup a kizelh loh nangin, khamcip bikbek uh hi. 

Tuabanah Kawlte kapngam Zomi mimal, milom leh kipawlna a om loh nangin, diplomacy, sum tha, bantha leh vanzat tuamtuam zangin, nakpi in panla uh ahihmanin, Zomi Zogam nasepna zong tawlkhat kitatsat dektak lawh liang ahihi.

Operation Zingsol ( Part One)

1999 kum December lungdam bawl kuan nitak khat  nai 10 kiim  , Cikha Khua ah khawmite phalbi daidam nuai ah, khenkhat ihmu khin, khenkhat tapkual ah ki-um in, lungdambawl la khong sa ngeingai uh hi. Nungak omna innte bangah tangvalte zawllengin om ngeingai uh hi. Kawlgalkap Dal Khai camp a omteng zong Cikha ah zingtungin tungto  uh a, Major Khin Maung Wei ukna nuai ah om uh hi. Major Khin Maung Wei pen mipi te'n Bo Hawk acih uh hi in, tua kuam tengah akihangsan sak mahmah khat ahihi.

Hihbang hun lai tak in " Dang Dang, Dang Dang, Dung, Detdetdet Detdet" ci in  thau hong ging datdat vat ahihmanin, Khawsunga Kawlgalkap vakvai teng, acihna ding uh theilo in, a camp lam uh zuanin ekteh dek zenin tai ngeingai uh a, lamkal bangah atuukkha bang om leh phongmanlo liang in, alawmte eelzaang tung bang sikin taisuak zawzen uh hi. Cikha te i akgu dinga innnuai a bu khiankhuan kawlgalkap khenkhat te bang, inntekte phawk ding bang khual zo nawnlo in " Amay Yay, Amay Yay" ci in kiko zakzak uh hi.

Zomi nungakte khumsim dinga lamnawl khawmial lak a pang khiankhuan, Kawlgam galkapte bang  sikling khong phuvang zen in, a sakhanlam uh zuanin taikeek mang uh hi. Khin Maung Wei bang atai kawmin, lamkal ah thumvei tuukin, anautang te'n a el sik kha gawp uh hi. Bai luanghluangh a atai leh sakhan tungto zo sam hi.

Kawlgalkapte a camp uh a tu'n uh ciangin, Campcing Kawlgalkapte nakap namau khengkhang in, tuate don zong don manlo in, galdum tek ah athau uh tawh, ciling laplap in, zan thapai galpang uh ahihi. Thaugingnalam delhngamlo in om uh a,  Kalay Byuha leh Northwest Command Headquaters ten " galte nung delhpah un" ci a thu apiakpiak hangun , delhngamlo uh a, a delh kineih in report uh a, a camp vuah zan thapai bu khiankhuan uh hi. 

Azingsang ciangin mipi lak ah hang lala pongin, zan nitak a thaugingna mun en uh a, thautang hawmte tawm thuamthuam pong uh hi. Mipi limtak adot uh ciangin Khenmanlam ah pai  uh, cih atheihcian uh ciangin, alehlam ahi Haiciin lam ah humpi hangsan bangtakin, delhto ngeingai pong uh a, mual akhenkhit uh ciangin Cikha Zomi mipite gilvun na zen in nui khia ziahziah uh a, khat leh khat bang nuih za lua kisa kibeng keei liang uh hi.