Myanmarian Army te tuipi sehzuak zia

ZIA tawh kisailo

Thuthang kizakna ah December 02, 2013 ni Mizoram State sung Serchhip khua a kiman galvante pen ZIA tawh kisaina bangmah omlo ci in kiza hi.

" ZIA galkapte pen Zogam leh India huam sungah kuamah ki omlo a, Kawlgam nisuahnalam leh mallam ah ki om zaw hi, tutadih in Zogam lam ah ki om sawm nailo ahihmanin galvan leh galkap kuamah ki koihlo hi." ci in ZIA vaipua khat in gen hi.

December 02, 2013 ni in Serchhip khawk Khaw Lai Lun ah , Zomi khangno 2 i hawl, motor khat tung panin galvan tampi Mizoram Police leh Assam Rirle te'n man khia uh ahihi. Tua galvante pen sumbawl te'n sum tawh hong guai uh ahihman a, sum thalawhna tawh ka puaksak uh ci in tua mi 2 te'n gen uh hi.

Tua Zomi khangno 2 te min pen Thang Deih Tung ( 30) leh Lian Khan Mang ( 30) ci in, The Times of India in December 04, 2013 ni in gelh uh hi.

                    

Kawlgam in Shan kap veve

November 25-26 kikal Shan State Army leh Myanmar Army kikal Loilem district sung Namhpun lui dungah nakpi in kikapna om hi ci in kiza hi.

" Kikap lo dinga ka kihem sansan uh hangin, tua pen metbawl a hong nopneh sawm uh ahihmanin, ut leng ut kei ta leng kikapna hong om kul hi. Tu ta banga hong hihhih uh leh, mailam ah zong kikapkap kul lai kha ding hi." ci in SSA commander khat in gen hi.

Tutung kikapna ah Myanmar Army LB 94, 33 leh LIB 501 te kihel cih kiza hi.

Shan leh Kawl kikal tulai tak state level, union level ceasefire aneih laitak uh ahihi.

Shan galkapte

                   

UNO in KIA vai gen, US in Mualmite sum 25,000,000 huh ding

Myitkyina ah November 4-5 ni kihona om khin napi kikapna khawl thei tuanlo a, Mansi huam Namlimpa khua kikapna ah mipi 2300 val awkkha in, nek ding neilo in om uh ahihmanin, UNO in Kachin Independence Army leh Myanmar Army te kiangah kikapkhawl dingin ngen uh ci in November 19, 2013 ni'n kiza hi. Tulaitak in galbu leh galtai dongtuakte huhna $ 25,000,000 pia ding ci in Yangon American Embassy in  pulak hi.

Kachin leh Shan gamgi Namlimpa khua ah ni 2 kizom in kikapna nasia tak om a, tua khua zong vut le vai suak khinta cih kiza hi. Tua munteng pen KIA Brigade No. 3 nuai a Battalion No. 12 te ukna hi a, Myanmar Army   Tactical Command (  Byuha) 5 te'n gamkeekto uh ahihman a kikapna hong piang kik ci  hi.

" Tulian in zong Namlimpa khua ah  KIA leh MA te khaw phellang tuak luah in kaki ngim ngim uh hi." ci in,  KIA  Major Gum Awng in gen hi. Tukha ( November) sung bekbek in zong 20 vei kikapna om ci in  genbeh lai hi.

Tulaitak Brigg. Gum Maw, Deputy Chief of Staff, Kachin Independence Army pen UNFC tangin Yangon khawpi ah a omlaitak ahihi. November 18 ni  Yangon Bahan township a Business Alliance Hotel a Press Conference a bawlna ah  Brigg. Gum Maw in Kawlgam leh Kachingam galkapte pen omna kinailua ahihmanin, khatlam zawzaw themcik agamtang leh kikapna piang pahpah  ci  hi.

Hiamkham leh Kilemna ( Ceasefire and Peace) akigengen hangin, Kawl te'n Kachinte hong bu luhluh veve uh hi ci in, Major Gum Awng ing zong kipsakna gen hi.

Tulai Kawlngian i et ciangin, Kawl Administration pawl in a thu tawh hong ho pihpih ding, Kawl Galkap pawl in alangkhat ah hong bu luhluh ding cihdaan hi.  Tua dinmun ahihmanin Zomite maban zong limci mahmah lai ci in kimukhia thei hi.

UNO, US , EU leh leitung gam tuamtuamte,  Kawlgam-Mualgam vai ah thuuktak a hong kidiah ta uh ahihmanin, nasepna khat peuhpeuh zong ni dang sangin leitung in hong theihpih zawta uh kici thei ta hi..

                     

Zogam leh Ne Win-Than Shwe saguhbawk nungthu

Myanmarian Army te pakik ( Stepfather) lah kici, Federal galpa lah akici Bo Ne Win i makpa leh atute 2 ahi Aye Ne Win leh Kyaw Ne Win te nih zong political prisoner 60 val kikhah lak ah hong kihel nong uh hi.

November 15 ni in Eleven Media te'n thu va kan khia uh a, anuai a bangin amuhdaan uh gen uh hi. Tua hunlai a Kawlte galkap sungthu khenkhat kithei khia hi. Than Shwe bek malmat in ngawh bawl uh a, adangteng mai-et bawl uh cih hih video clip ah kimu thei hi.

Ne Win leh Myanmar Army in 1962 kum in Zogam, Shangam, Kachin gamte Kawl ginalote nuai ut nawnlo uh ahihmanin, cih paulap in gambup ki-ukna buluh uh a, mualgamte neihsa teng innkuan sumbawlna in hong nei uh hi. Tua a kipan tuni dong Kawlgalkap te'n hauhlawh uh ahihi.

Anungciangin Myanmar Army sungah Ne Win-Than Shwe sagugbawk kituhna hong piang a, Ne Win in lel ahihmanin a Putu teng vua kiman ahihi. Tutunga hong suakta kik pan uh ahihi.

Dog Eats Dog World thu them khong i genna hi.

                       

Zogam meitha leh ADB softloan 60,000,000

Asia Development Bank-ADB in Kawlgam khawphelep mei zung leh zamte puahphat nangin  US$ 60,000,000 sum leitawi pia ding ci in, November 10, 2013 ni in  Kawl khawphelep mang Khin Maung Soe in gen hi.

Kawlgam sung Magwe, Mandalay leh Sagaing Div sung teng ah power substation 300 kiim bawl ding ci hi. Tua banah tua khawk sunga meigui leh tranformer teng zong athak a khek ding ci hi.

Myanmarian kumpi in October khasung in meiman khangsak a, innmei watt 1 khat pan 100 tan, unit khat kawlsum 35 hi dinga tua tungsiah akizat leh 50 tung ding ci in khangsak uh hi. Tua meiman thak pen November kha pan kipan ta ahihi. Hih meiman khang hangin Yangon ah Kawlte lungphona om man hi.

Power substation 300 val kum 3 sung kibawl ding lak ah Zogam kihello leuleu hi. Tulai in Zogam ah township 4-5 khongah tuitha tawh meipiakna plantno them cik bek om a, mei pailo zel, hoihlo zel cih kiza hi. Khaw tuamtuam ah bawltawm meisetnote om a, ahihhangin tuate siksan a industry bangmah hih tham cing om nailo ahihi.

                    

Letpadaung Nupi te'n Myanmar Army Damiahte tawng gawp

   

                     

Yangon bei ding

Yangon a inn lei huanglei te'n innte zuak a, Zogam lam ah inn hoih lam hun ta cih i ki phawksak hi.

2070 kum ciangin Yangon khawpi tuipi nuai tung ding hi, Yangon bek hilo in Irrawaddy Div leh Pegu Div atamzaw tuipi nuai tung ding ci in,  Khawhunsiam Pu Tun Lwin  in The Express Times te kiangah gen hi.

21 century sungin Southeast Asia ah khawlumna 4 degree Fahrenheit ah kah dinga, Kawlgam bel kiim leh pam awlmawhna omlo ahihmanin, 5 kah ding ci hi.

Tun Lwin pen Nargis Pingpei kipei lai a, Weather and Meteorology department a alian pen ( DG) ahihi. Nargis nung ding chih Than Shwe te a report leh mipi hai patauh sak ci in, Than Shwe te'n na thudon lo uh hi.

Tutunga report pen  Leitung Lumna Global Warming tawh kisai ahihi. Leitung lum semsem ahihmanin, tuikhal mualte tuisuah a, tuipi maitang khang semsem ahihi.

Tu 21 Century sungin Arab leh Israel te banga, leitang kituhna lianpi hong tung ding cihna ahihi.

Kawlte vaihawmna hoihlo sawt lua ta ahihmanin, leitung ah khawhun sia  thuak pen ding gam 10 lah ah kihel ta ci in DG lui Tun Lun in, patau tak in tangko leuleu hi.

Zogam Defence System zong i neih kholh kul leh kilawm ahihi.

                   

Zomi Malaysia Work Permit

Malaysia gam a phalna omlo a Pemta Nasem (Migrant Workers) te work permit pia ta ding ci in kiza hi.

Malaysia Ministry of Home Affairs in Putrajaya pan October 21,2013 ni thusuah abawlna ah, Migrant Workers te kha 3 sungin  min khum khuan kipia dinga, tua panin work permit lai pia khia ding ci hi.

Service Company ( Puaisar Company ) kullo a, mimal mahmah a va kisiau thei ci hi.

Malaysia Labor Union te'n service company kici te in nasem nuamte kiang pan, sum tam pipi alak uh dik salo uh a, tua pan a hih permit thu hong kipan ci hi.

Pemta Nasem kimante. Photo:DVB

Zomi leh Global Slavery Index 2013

Leitungbup kisilabawlna lam a, a suuk pen gam 10 lak ah, Myanmar zong kihel  ci in, Walk Free Foundation-WFF te'n ciapteh uh ci in, Voice of America in gen hi.

Leitungbup ah mihing awn 30 val sila bangin kikhawi kibawl a, tua lakah Myanmar pan 400,000 val kihel ci hi.

WFF pen Australia siksan in nungkum a hong kipan khia hi a Hilary Clinton, Tony Blair, Bill Gates cih bang mi luliik zawdeuh tampi te'n a phungvuh uh ahihi.

Leitung a kumpi vaihawm tampi te'n, WFF i Global Slavery Index 2013 pen za nuam phalo uh ci in, WFF lutang Nick Grono in gen hi.

Sila kikhawi pen leitung ah bei khin phial ta a, ahih hangin gam ginalo leh minam ginalote vaihawmnate ah awn 30 val om lai ci hi.

Tulai sila a kiciamteh te atam zaw pen ngeina hoihlo hanga naupanglai a kipan, thagum tawh kitengsakna, nasep sakna te kihel ahihi. Tua banah gam ukte ginatloh man a, gamdangah tai kawikawi a, deksidawn thuak mite ( Migrant Workers) zong kihel ahihi.

Zomite zong India, Thailand, Malaysia, Singapore leh leitung gam tuamtuam ah, Migrant Workers in mi tampi ki om a, i omomna ah deksi hong ki dawnsak ahihmanin, Sila list ah a lut tampi ki om ahihi.

Mi Mang Laang

Tulai Kawlgam ah kum 7-30 kikal, atungna  ki theilo a mangcip om zeuhzeuh cih kiza hi.

Myanmar Ministry of Home Affairs nuai a, Police Dept. pan sungthu thei khat in agenna ah,Mimang 3620 police te kiangah report om ci hi.

Tulai in China gam ah, kum khat in mihing kahiang ( Organ Tranplant) 1,500,000 kisam den cih kiza hi. Tua mihing kahiangte lak ah Kal, Lungtang leh Mitpan cih bangte kihel ci hi.

Kal            USD 3500-5500

Lungtang--        15000

Mitpan               4000-6000

Tuap                  20000

Cih bangin man ci hi.

Leitungah Organ Tranplant pen doctor siam te'n limtak hih thei ta uh ahihmanin, China bek hilo India leh leitung gam tuamtuam ah, mihing kahiang kisapna khang tektek a, black market zong om ta cih kiza hi.

Kawlgam, Vaigam leh leitung mun tuamtuam ah, Zomi numei naupangte limtak kep ding hi ci in, i ki hanthawn hi.

Zogam Tourism Maban

Myanmarte Ministry of Hotel and Tourism in tulaitak Master Plan pi khat nei in, tua nuai ah Project 38 sem san laitak uh a, USA leh leitung mun tuamtuam pan zong panpihna ngah ding ci in, Myanmar Hotel and Tourism Minister Htay Aung in  10/10/2013 ni in VOA tawh kihona ah gen hi.

Kawl Htay Aung pen US gam a George Washington University a siamsin lui khat hi in, GWU in pahtawina apiak uh sang ding hong paikawm a, USAID leh NGO hon khat tawh kimuh khit ciang hi  thu agen ci hi.

Tourism Master Plan pen Asia Development Bank-ADB tawh ki geel khawm hi in, World Bank leh gam khenkhat in zong nungthuap uh ci hi. Htay Aung in 2014 pan kipan ta ding ci hi.

Hibanga Kawlmang in Tourism tawh kisai Master Planpi khatnei gige a, tua nuai ah Project 38 aneih hangin, Zogam a ding Project khat beek or bang zah kihel kha cih thu, tuni tan bangmah kiza nailo hi.

October 4 ni in zong Japan te'n Technological University te a dingin, USD 13,500,000,000 pia eu-au uh a, ahi hangin, Chin State ah Technological University omlo ahihmanin dangkasan khat zong ki tangkhalo suak hi.

           

Zogam Technological University leh Japan JICA

Myanmar uksunga Technological University teng puah nang le domsang nangin, USD 13.5 Billions ( Awn 13,500 ) Japan kumpi in huh ding ci in, Japan International Cooperation Agency-JICA Vice Chairman in October 4 ni in pulak hi.

Myanmar ukna nuai ah State leh Division 14 lak ah 13 in Technological Univerty atawm pen khat ta nei uh a, Chin state ah khat zong Kawl te'n koih nuamlo uh hi.

Chin state leh Zogam mundanga siamsinte, Sagaing Div sunga Kalay Technological University zuanin siamsin kul ahihi.

Myanmar Army Regime hun sungin, Kawlgambup huam in Technological Universityte kizel in, hong kawikawi uh a, ahihangin Chin State nelhsiah uh hi.

Kalay Technological University pen Chin State pan siamsin te kah nang a hong piak bawl uh ahihmanin, Kalaymyo pen Chin State ah alut vet kei leh, Chin State in tuni tan Technological University kineinailo suak ahihmanin, Japan huhna Billions 13.5 vetvat pen Chin State in nengcik khat zong, kitangkhalo ding cihna hong suak hi.

Lampi omsun khat bel Zogam Kalaymyo pen Shan, Kawl leh British te'n hong suhsak uh, Zomi te'n lampi khatpeuh zanga i lakkik zawh leh cihloh ngal, lampi dang om tadihlo phot hi.

Bangteng hi leh, Japan JICA huhna pen Zomi te'n amuinam ki galzak sam ding ahihmanin, lungdam huai veve cih sak phot ni. Adiakin Yangon leh Mandalay Technological University tegel lim puah diak ding ci hi.

Tutung zong cillum khatvei tek mah i valh guap kul leuleu ding  hi.

                        

Zomi Kick Starter

Email ka check leh California State University pan,

Sang zo thak khangno 3 in hong contact dihdih hi.

iPhone 5 leh 5S a dingin,

iPhone tuamna iPhone Case nam thak khat,

Carbon Fiber tawh kabawl uh in,

Tua case ah thawlhongna ( bottle openner) zong kithuah hi.

Hih bang product pen leitungah amasa pen ci hi.

Tua banah Carbon Fiber pen kahpasik ( steel ) sangin,

to zaw tham ci hi.

Ka project min uh pen CarbonForceCase hi in,

Kick Starter pan funding ka zong uh ci hi.

Kick Starter cih pen,

Vanthak bawl nang idea nei or vanthak bawlte a dinga,

Mipi kiang pan fund zong theihna tau/plaform khat ahihi.

Kick Starter pan fund zong 44% in,

a ngimna uh tangtu'n zo ci hi.

Kick Starter ah lawhcing a leh Bank te zong lunglut in,

Tua van bawlkhiat ziahziah nang,

sum leitawi nuam uh ci hi.

Zomi khat neihsa iPhone Blog khat ah,

CarbonForce thu khah dinga,

hong thuum zawzen uh ahih ciang ci in,

www.iphoneSnews.com ah i khahsak hi.

Zomi sungah zong,

Idea tuamtuam nei i om leh,

hih CarbonForceCase khangnote bangin,

Kick Starter ah project va kilui thei ahihlam,

i kizasak hi.

Tangtawn panin,

van phuahtawm ( Inventions)

atam zaw pen,

Mipi lak a,

lunglut leh deihsak te panpihna tawh,

hong lawhcing khia hi zaw kici hi.

Company lian pipi leh kumpi huhna tawh,

van thak kibawl na hi khollo ci hi.

Kick Starter pai daan pen,

Kick Starter ah na project lui ding,

a ni ciangtan sungah,

Thapiakna ( Pledges) kiciangtan zah na ngah leh,

na project pen sponsor nuam hong om ding cih daan hi.

Tua Pledge pen,

thapia nuam te'n a tawm atam cih omlo in,

tha pia uh a,

tua pledge zah akingah leh,

thapia teng van khat tek lungdam kohna a,

project nei te'n,

hong letsong ding cih daan hi.

Zomi billionaire, millinaire ut,

siamna nei vilvelte a ding.

Sialualo hi.

Tua beh, tua bawng, tua pauke te bek hilh ding,

cih bang khuankhuan hilo in,

Mikim a ding kongvang kihong ahihi.

Lem in Cia !

Pu Cin Sian Thang in Federal Bek deih ci

June 02, 2013 ni  Yangon khawpi Tawwin Hninzi Hall a kibawl, Constitution tawh kisai holimna ah, Zomi Congress For Democracy Makaipi Pu Cin Sian Thang in, 2008 Constitution pen Federal Constitution a puah ding hi ci in Zomi te tangin pulak hi.

Kamayut TV in agenna ah hih Constitutional Meeting pen, Political Prisoner te inntekna tawh kibawl hi in, Pu Cin Sian Thang ki makaih sak  ci hi.

Federal Constitution amanlang theithei a hong piang theih na ding a kibawl hi in, 2008 Constition ah puah ding atam luat leh, Constitution thak khat gelh ding hi ci'n, Pu Cin Sian Thang in gen  hi.

Tua ahihmanin Zomi akua mah peuhmah in i political goal  thei ciat gup ciat ding kisam hi. A diak in ZCD member leh supporters, sympathisers peuhmah in, Pu Cin Sian Thang thugen huang pua pial a, kampau mukpau leh gamtat loh ding thupi hi. Nungzui te'n policy a tuam tek na ciak zelzul cih bang hi theilo hi.

District leh Autonomous pen 2008 Constitution ah zong a provision teng a kim a kigelhsa ahihi. Tua bek thamlo in Kalaymyo leh Tamunangawn, Zogam ah i laknop leh 2008 Constitution ah Referandumtawh kikhensat thei hi. Hihvai lel pen 2010 MP teng kithutuak leh a sepkhiat ziauh ding uh hilel hi. Hihvai paulap a minzong leh sumbawl nuam pawl khat om cih thu hi lel hi. 

• District vai pen Mindat, Falam, Hakha in nei khin uh ahihmanin, ei a teng tawh kipawlin, i MP, MLA tengin, no nei khin na hih uh ciangin , tu'n hong support un ci in, Lobby bawl le uh zong, tu mahmah a hi thei lai hi. MP te'n a gen asep nop kei uh leh, a huumsam uh pan kai a sawl ding hi lel hi.
• Autonomous Region vai zong Cho ( Mindat-Kanpalet) , Mara ( Hakha-Thantlang-Matupi area khenkhat kiapawl) Khumi ( Paletwa- Kyauktaw) , Lai ( Falam-parts of Hakha area) cih bangin Chin State pumpi Autonomus a utlo khat zong omlo hi.

A beisa a District leh Autonomous Region gengente hih daan , kuamah tawh lah concensus nuamlo, mipi consultation lah neilo, organisation/party tuamtuam coordination lah bawllo in, deih taktaklo hi un cia, a kimawl nuam pong uh hi in teh ci a, ki gal-et mawkmawk ahihi.

Autonomous i deih taktak leh Chin State pumpi a Autonomous Region deih teng,  a makai tenguh ka theihloh omlo hi. ZRO leh ZNC (LA) a sem ngei tengin, CNF phualpi ah bangci viik ka hiam? cih phawk lai ding uh hiven. Na dong un.

Tuate asungthu ah i ut leh paipih in,Pu Cin Sian Thang hong lam lah mah bangin, Federal State pi sualkhia phot ding hihang. ZCD in 2014 ciang hih thu Naypyitaw ah luikhia ding hi in, tua ah i ngah kei leh 2015 khit ciang WZC, ZIA tawh kalsuanto lai ding i hihi.

Tu leh tu i vai neih pi pen Gullu leh Federal ahihi.

KNU in DKBA leh ZIA huh ding

May 07, 2013 ni thuthang kizakna ah Kawl te'n DKBA leh ZIA a kap uh leh, Karen galkap khempeuh in  Kawlte kaphuan kik ding ci in kiza hi.

Kawl kumpi in Thanlwin guun a Hatgyi Dam kiim leh mundanga DKBA camp teng May 04 , 2013 ni in, kihemkhia gai dingin thupia uh a, DKBA in Karen gam pan Karen galkapte kihemkhia ding cih bang om theilo hi. Kawlgalkapte na  Kawlgam vuah ciahkik un  cihsan ahihmanin, Karen gam ah buaina om kik dekdek hi.

May 06, 2013 ni a KNU/KNLA ( Peace Council) Tactical Headquaters a kibawl, Press Conference ah  KNU ( Peace Council) te'n Karen buppi ka pangkhawm ding uh ci in genkhia  hi.

DKBA Spokeperson  Col. San Aung in " Kawl kumpi in  May 04, 2013 zan 12 ma in kihemkhia un, hong ci in tua pen kipomlo hi. Hong kuan uh leh kikap kik ding bek mah lampi om lai hi" ci hi.

"Kawl te'n DKBA a sim leh KNU zong omkhong lo ding hi ung" ci in KNU galhang Col. Tiger in zong pulak hi.

Tulaitak Col.Maung Lay makaih Karen palaite, Kawl palai Col. Aung Lwin tawh kiho dingin kuan uh a, tua pan Meileng Aung Min tawh kiho suak ding cih kiza hi.

Hi thu apiangma in Myawaddy Karen gate ah  ZIA leh Kawl galkapte buai dektak ngei a, tua thu avengh ma hih thu hong om leuleu cih kiza hi.

Karen gam ah Karen suahtakna sem kipawlna lian 3 om a tuate:  KNU, DKBA leh KNU ( Peace Council) te ahihi. Zomi galkapte zong acil in DKBA leh ABSDF tawh kisem khawm a, mibongsong khenkhat in hong daldal hangin, tu'n KNU, KNU ( Peace Council) tawh zong kipangkhawm thei ta cih kiza hi.

Google Lutang: Zogam 2020 ciang online ding

Leitung a internet company lian pen Google Inc., a Executive Chairman Pu Eric Schmidt in 2020 ciangin leitungmi khempeuh  internet tawh kizomin online kim ciat ta ding ci in gumgen hi.

" 2020 ciangin mi khempeuh online khin ta ding hi." ci in Pu Eric in Google+ ah gen ci in, technology website minthang Cnet te'n April 14, 2013 ni in gelh uh hi.

Cnet te'n  internet bel leitungah manlang tak in kizel takpi mah hi, adiak in mobile phone hangin mi tampi'n internet ngahlawh uh hi. Ahizongin leitungbup va cih zawzen bel i um zo diam? ci in dotna bawl uh hi.

Mipi dotna poll abawlna vuah 13% bek in Pu Eric mangmuhna um uh hi. Tua poll ah Zomi vote khia nuam i om leh HIAH ki vote thei hi.

Pu Eric in leitungmibup ci zawzen ahihmanin, ama mangmuhna a dik ding a leh bel, Zomi teng  zong 2020 ciangin mizawng mihau, mun le mual kisailo a ki online ziahziah thei ta ding hi leh kilawm hi.

Tu tadih in bel  atamzaw in Pu Eric mangmuhna um zolo  phot uh hi. 

Cnet in bel asia apha genlo in Google bel internet a kizelh tektek leh hau tektek ding uh himawk in cih bawl uh hi. Leitungbup tua ci takpi leh utmah lo ding uh ahia? ci hi le uh kilawm hi.

 Pu Eric thugen hong dik tapeuh hen ci'n i deihbawl hi.

Zomi Technocrat khat in bel Myanmar, India leh Bangladesh te bel thei khangin, Zomi leh Zogam ah bel hong haza a om kei nak leh, Pu Eric Mangmuhna atangtu'n mawh nang thu om sa keng, ci kilkel  leuleu hi..

Tuabang ahihmawk leh internet lak nang Zomi te'n  zong Dahpa Khuang Zuakna khat ineih kholh kullo ding  amaw? ci in , World Standard tawh kituak in computer hardware store pi khat i bawl pah hi. Brand 30 val, Catagory 90 val leh van 15,000 val i koih pah hi. Tu zawh asawtlo in leitungbup nangawn theih dingin  Press Release tawh tangko lai ding hihang. 

Bangteng hi leh um in um takei leng zong, azak bekbek  zong nuam ahih manin Pu Eric i pakta  hi.

Pi Ziporah Motor tuahsia

Karen National Union i Vice Chairperson Pi Ziporah Sein April 5 ni sun nai 3 kiim in, Thai gamgi Maela leh Maeramat Camp kikal ah motor tuahsia in liam cih kiza hi.

Karen Women Organisation makai khat in agenna ah " Motor hawl kihel in mi 6 tuang teng avek un liam uh a, nih bel nakliam simsim ci hi." Pi Ziporah Sein dinmun bel kithei nailo hi.

Pi Ziporah Sein pen Karen National Liberation Army Brigade No.7 a kibawl,  KWO khawmpi siim a kuan innlam zuankikna a hibang tuahsia cih thu kiza hi.

Tuma kum 13 kiim lai in Pi Ziporah pen  KWO makai hi in,  Zogam khatvei hong hawh ngei hi. Zogam nupi teng tawh kimukhawm sak  in, Zomi nupi te'n zong ahamsatna teng uh gen ngeingai in holim khawm ngei  hi.

Mualmi bek thamlo in Kawlgambup tang mahmah a zong,  Pi Ziporah Sein leh Shan numei makai Cham Tong te pen, leitung in zong azahtak uh ahihi.

Zomi Bible Refugee, Mexican Refugee, Guam Refugee, Malay Refugee, Indian Refugee te pibul taktak lak a khat ahihi.

Pi Ziporah Sein thungetna ah phawk ciat ni.

Dongtuakte vangik kihap

Kawl makai Aung San Suu Kyi, 1990 party te leh Kawl galkap USDP makai Thein Sein te hong kiho theih zawh, galtai leh dongtuakte dinmun hong dengdel tektek hi. Tulai in Resttlement kikhak ta ding cih thuthang hong om hi. Tua banah Refugee te zong agam tek vuah puakkik ding, cih khong thuthang hong om vengvung hi. 

Refugee vai ah pen bawlsiat nengniamna athuak diak pen, Zomi leh mualmite ahihlam, UNCHR leh leitungin hong thei uh a, Kawlte sangin hong lainat khasiat pih zaw uh hi. Tua ahihman a resettlement zong Kawl hilote tam kitung zaw hi.

Hibanga Kawl hilo Zomi leh mualmite, gam khangto i tu'n ngeingai pen, Kawl kici peuhmah in hong haza mahmah uh hi. Haza bek hilo in, ni khat ni ciang Kawlte sang pilzaw, hau zaw, siam zaw a i om ding mu khol uh ahihman in, patauh leh lau hong thuah  uh hi.

Tua ahihmanin Refugee leh Resettlement abei theihtheih nang pan lala ta uh hi. Zomi leh mualmi sunga "THAN" hon khat  khut zat in nei uh a, sang-ak palai in vak kawikawi sak ta uh hi.

Kidawm ni.

Kachin Baptist Convention says 66 churches and over 200 member villages destroyed

details of the statement at Jinghpawkasa

Kachin Baptist Convention (KBC), a Kachin Baptist organization which has over 400,000 members, on Wednesday released a statement saying that the offensive war has continued unabated using attack helicopters, fighter jets and numerous troops despite President Thein Sein’s announcement for unilateral ceasefire to be effective on Jan 19.

The statement says the ongoing offensive war in Kachin region destroyed over 200 villages of KBC’s members and damaged 66 Churches which are holy and sacred for Kachin believers. Over 100,000 internally displaced persons left their homes and villages and living under perilous conditions as the war escalated.

Kachin Baptist Convention urged Burmese government to immediately stop its operations in Kachin region as the war could damage the trust and unity among ethnic nationalities. The statement asked government to allow humanitarian assistance from UN and international organizations in all areas. It also demanded, “to stop arbitrary arrests of innocent civilians, to stop firing indiscriminately on refugee camps, to stop harassing and raping women and to respect international human rights laws”.

The statement also said,”no peace can be made by force. To achieve genuine and lasting justice and peace, precise policies and procedures must be set for political dialogues”.

Source: Kachinland News