Guul khat in Zomi te'n leitung level in thugen keini ci

 Hih anuai a thului in Zomi te'n leitung level a bangmah semlo ding, thugen lo ding ci hi. Gamdang a omte zong ciahkik leh hoih ding ci lailai hi. Zumhuai hi cinuam hi leh kilawm hi.

Alehlam leuleu ah leitung level a thugen, om leh nasem ( Ataktak in Chin mintawh khutdawhngen hizaw aci zong om),  Chinte bel thupi mahmah phazo nawn kei ni, ci themthum leuleu zeel hi.

A thugelh  kitukalh lua deuh ahihmanin , laikungpu kua hi ding ahia? ci a ka zong leh tullekeel@gmail.com ci bek mawk hi. A thului simkha  Zomi khat in tuabang taktak i hih mawk leh ci in lungkiat thu gen ahihman  review i bawl pong hi.

Tuu le Keel bel thei khangin "Guul" tawh kinaizaw pian hi. Hibang thului te pawl pen " Guul Post" kici hi.

Anuai ah sim theih hi. Joke of the Week ci in i teel hi.

Reference

Zogam ka it hi nacih leh

Laigelh: Guulpi

Address: tuulehkeel@gmail.com

1. Mundang gamdang atung ten bang hangin Zogam it ung ci hiam. Lamdang kasa hi. Gam le minam it taktak i hih leh ciahkik in na khat teitei sem leh hoih kasa hi. Kampi bek pen hithei phalo hi.

2. Gam dang tunteh Zo gam a omlaite hawmthawh in lai tuamtuam i at hangin pha tuam kasa kei hi. A mi mahmah kisam zaw hi. Kam tawh gen sangin alimin lakzo leng hoih zaw ding hi.

3. Zogam khantoh na ding in EI mahmah kipuah masak ding kisam hi. Ei kipuahlo in mipihte kam tawh kipuaksak zolo ding hi. Nuntakna tawh lah kul hi.

4. Mipilte thuciin ah " Zing khua vak khin napi ei tho naikei leng khuavak nailo hi" ci hi. Mite khangto in hiliailiai ta leh ei hizo nailo hi hang. Ki pawlkhot siamding thupi ding hi.

5. Ih Zomi pihte in nasemzo mahmah uh a, piping toto uh hi. Ei Zomite bel huih bek mah hiphot hihang. Ngensang in sep lam hanciam zaw ni.

6. Chin cih ki mukhial a, ahi zong Chin a zangte hampha zaw veve hi. Amau a kalsuanzia uh maan a, nasep namtuamtuam nei toto thei uh hi. Ei bel i cihcih tei hangin bang mahmah nasep i nei kei hi.

7. Mi pawlkhat kihau sak in apau pha mahmah hi. Ahih hang apianpih innkuante a sangngamte antawtaw uh a, ci mawh mahmah hi. Minam itna gam itna sang in i mipihte panpih ding hanciam ni.

8. Namdang zi neite leh Gamdang ateng ding apaite in gamle minam it cih bel ahi taktak mah diam. Koh bel Zo gam ah om ung. Gamle minam ading aphual pan mapangten huhna anget apia nuamloten itna thu ngen kei zaw hen.

9. Pilna kiciantak aneilo ten Chin le Zo cih thu hong limngen kei zaw leh. Ka matpongten ah minam cihna ah CHIN kici. hi.

10. Leitung level tawh thu na ngen hang ih gam ah pupa ngeina lokhawh singpiak leh annek tuidawn kizang lai hiven. Na kam uh na lai gelh uh hong pilvang un hong ci nuam hi ing.

Shwedagon Zusan

Malaysia gam ah Company khat in Shwedagon Zusan bawl in, azuak kipan ta cih kiza hi. Muslimte bawl hilo in, Buddhist te bawl ahihi. 

Address pen:

Teo Seng Chan Liquor Merchants Sdn.Bhd.

37. Jalan Apolio U5/186,

40150, Shah Alam,

Selangor, 

Malaysia

Tel: 603-7845 0158, 603-7845 6649

Fax: 603-7845 6396

Ci hi.

Hih sai pen Tamil Buddhist Group khat i hong hi in, sai nasem nungakte zong Buddhist te vive mah hi in avek ua kingah gai zong ci hi. Kawl Buddhist te'n Malaysia kumpi in banghanga hibang phal sese hiam ci in, thangpai peuhmah uh hi. Ahihhangin Malaysia khong pai in va kitom gangang le uh, Malay te'n na bunuai gaih ziauh ding uh lah, lau mahmah kawikawi uh hihtuak hi.

Muslim Koran Bu ah Zunete pen ciingduai tawh 80 vei sat ding ci uh hi. Hih Shwedagon Zusan pen Malaysia a Kawl leh Rakhine restaurant te'n nak zuak mahmah bilbel uh ci hi.

Myanmar Express Dot Net kici Ngapik Galkapte blog a suak kihawmsawn hi in, hih Blog i opinion hilo hi.

Buddhist te bangin Pasian lim tawh Zuhuan leh Zuzuak kei ni ei Zomi Christian te'n.

Rude Buddha leh Zomi Singlamteh

America a TV program minthang khat ahi NBC TV in, ninoni ta a akhah zel uh ciamnuihna leh nuhnauna hun ah, Rude Buddha kici Buddha tawh kisai ciamnuihna khah uh ahihmanin, unau Kawl Buddha te a ding lungkimhuai lo ahihmanin, lampi khat peupeuh zanga thukkik huai hi ci in Burma Today ah kigelh hi.

Tua NBC ninoni program ah mi minthang tuamtuam ahi kumpite, lasiamte, limcingte leh adangdangte thu ciamnuihna leh nuhnauna lak thei zel uh ahihmanin, America ah mitampi muhnop mahmah khat kici hi.

Tutunga Rude Buddha ah Buddha in mite mai ah ama thu-umte limtak thu ahilh hangin, amah thu-umte a omloh ciangin, thu-umte anungzuipite  kiangah ciamnuihna in, nei pahpah daan in kizaih hi.

Atawpna ah thu-um  te'n atheih uh ciangin heh mahmah uh a adotkik uh leh, Buddha in ' Khutpek khat tawh koici khut kibet theih hiam? cih hong lak ning" ci in, tua a phulkikpa pangguipi puakzen a,  abet ekna  tawh mansak ahihi.

Mi khempeuh in biakna tawh kisai suahtakna nei ciat i hihmanin, mite suahtakna tuabanga va nuhnau sese zong hoih samlo ahihi. Nunglam in zong Zogam simlam Ciindwe khua ah Zomi Christian te phuh singlam teh tungah, Buddha te'n numei zahmawh lim gelh in nunhnau ngei uh ahihi.

Zarganar Ciamnuih Thak

Zargana pi zong Kawlmang hell khuk pan hong suakta ta cih i za ciat ding ahihi. Hong suahtak cil ahihmanin dai khikhe phot in teh a ki cih leh, dai deklo in ciamnuih pan pah hi.

A ciamnuih thakte kikaikhawm man zah anuai a bang ahihi.

1.  Fourth Estate ( Media ) tawh kisai

Yangon Airport hong tung phet in reporter te'n na dawn ngeingai a Pu Zargana in " Aw fourth estate pi hong hongpai ih cih leh Pu Kyaw San na hi ee maw " ci hi. Press Freedom om kici pen Information Minister Tomkobok Kyaw San thuthu na hi zaw mawk, acihna ahihi.

2. Voice of America - VOA tawh ciamnuih

Hong suahtak cil in VOA te'n ciamnuih khat hong gen dih ve, acih uh le,

Khatvei leitung a khuak tehna ( IQ) sang pen dinga kituat banah mipil mahmah ahi Einstein kiangah mi 4 hawh ci hi.

IQ 180 neipa in " Pu ka IQ 180 pha hi," ci in aban sah hi

Einstein in " Aw IQ 180 na neih leh Quantam Physics thu kikum ni ei,"  ci in kikuppih pah ci hi.

Khat hong pai leuleu in "Pu Einstein aw ka IQ 150 pha hi, acih leh aw a nunung pen ganan theory ( Latest Maths Theory)  te kikum ni ei, ci in kikum nguatnguat uh ci hi.

Tua zawh ciangin khat hong pai leuleu in " Pu ka IQ 120 pha hi, acih leh Pu Ein Stein in " Aw movies thu kikum ni ei, ci in cilphuan kaai zen in, kikuppih ci hi.( Zomi bang hi leh Korea Movies thu hi kha ding hi)

Atawpna ah khat hong pai molmol in, kisuang mahmah tuak kawm in " Pu ka IQ 50 bek pha hi" acih leh " Parliament ah bangteng kikum na hi uh hiam?" ci in dong pah kici hi, ci in Zaganar in VOA kiang ah tangthu tomno gen kici hi.

( Mihing ngeina khat i IQ pen 100 khat in kiciam teh ahihi. 100 nuai ah atamkiat leh matkhai, pia 10 khai, pia 5 khai cih banga i gente ahihi. 100 hong val leh aval zahzah pil kici hi.Tua MP pa IQ pen 50 ahih leh bel Hamu Khai i cihte pawl hi ding ahihi.)

Than Shwe maban

Buddhist Minister Myint Maung kiang ah bawngcing ki apply theita

Tuni nisa in khualum ta buang in, sun thapai nasem khaw-ul kai pikpek, inn ka tu'n ciang khaw ul dai nang themvei khawl kawm a, bang thuthang khong om adiam? ci a news website teng ka phen kawikawi khit ciangin, kigim sim ven nuih nang zong dihni ci a, ka zong le, news blog minthang khat ah thudik lah hi bilbel, lah nuihzak huai simsim khat ka mu dihdih hi.

Tedim khawlai mualdawn a, Buddist Monastry le lutolte pupi ahi, Religious Affairs Minister Thura Myint Maung in,  Neipi Taw khua a Office No.31 a ministry huangsungah, bawng tampi khawi keei in, Ministry of Religious Affairs- MORA huangsung teng bawngzun le bawngek nam keei hih tuak hi.

Tua bawngte pen Minister Myint Maung  mimal a hi in, MORA nasemte bawng ann at, bawngann pia , bawng zunbua le bawngek luak a zawhthawh  sawl pahpah hihtuak hi.

Thura Myint Maung in keuhbek Minister asem zawh kum guk phata a, tua sung in MORA nuai a om nasemte office nasem tawh kisai lo, na tuamtuam sawl den ahihmanin kicimtak mahmah ta kici.

Tedim mualdawn Buddhist Monastry pen, Buddhist pawlpi khatpeuh i nuai a kahiang khat hilo in, MORA nuai a department khat nuai a kivokvak ahihi. Department for Promotion and Propagation of Buddhist Sasana nuai a mipi siahtung siahphei zanga kimawk vulh ahihi. Buddhist lut leh hamphana ngah ding akisa, Tedim Monastry a Zomi lutolnote nu le pa, beh le phung te'n MORA minister Myint Aung i sumduh daan le, anuai nasemte azawhthawh daan atamzaw in thei kha hetlo hihtuak hi. Ministerpa kiangah lutolno te'n bawngcing khong bel ngah thei kha ding hi, ci in atheician taktaklo lah amangtheih pian, lutolnote nu khat in bel, lawptak in gen laidep kici hi.

MORA minister pen tua zah bek tawh phalo in, nungkum in zong Pagan a Buddhist Center kilamna ah zong midang ciallo a, MORA officer te semsak hih tuak hi. MORA employee te suangsi pua, buannawi tawk, leisan sek le sehnel haih in Pagan nisapi nuai ah, sila suak  keei uh hihtuak hi.

Tedim Buddhist Hill Mission te pupi Myint Mung pen, pheituam asuah ma in 2007 Kawl Buddhist te lungphona tungtang ah, State Sangha Maha Nayaka makaite kiangah kapkhuan angen pa pen ahihi. Sangha Mahanayaka a siampu i cihte pen Myanmarian Army in, hamphatna tuamtuam tawh golhguk pia a, adeihdeih uh akoihte ahihi.

Buddhist lutol nautangte bang lungkimlohna nei in "lungphona" nei le uh, Tedim Myanmarian  Buddhist pagoda  a Zomi lutolnote zong, a kaplum veve ngam ding khat hi mawk hi.

Buddhist gam a religious affairs minister khat in, hih dinga kilawm hetlo khat bel Kabaaye office huangsung a uital le zawhngeu akhawi hi, ci in ministry nasem khat in pulak hi. Kaba Aye Office huangsungah mikang ui tamman Dobermin uitgalpi  khawi in sumbawl keei hihtuak hi. Zawhngeu zong tampi khawi in zawhngeu ek siak nasemte, nitha pialo in sawl thei zel ci sawnsawn hi.

Ui-ann dingin sumcilna peuh ci in, Myanmar Buddhist  University a Rector Siampupa i hall pan,  nekval teng tawh a uitalpi vak kici hi. Buddhist University siampupipa le a uitalpi annek kibanga vaakkhawm ahihmanin, MORA nasem Buddhist te'n bel awi hetlo sam  uh hi kici hi.

Tedim tattung mual kianga Zomi lutol no te zong, a zaa uh khangleh bawngcing, zawhngeu eksiak  le ui annpia nasem khong ngahzo mawhlo ding uh kici hi.Atheilote kiang bangah Neipi Taw khuapi ah MORA Ministerpa in it mahmah in, nasem pia uh kicidep ding uh hi. Lungkhamhuai ci ding i hiam, cimphawng ci ding i hiam theizo nawn khang ei guai !

Hihbang khong i gen i gelhciang Zomi sunga Myanmarian Regime ciangkhut khenkhat, heh mahmah pong mawk in, hong dawnnang uh lah theilo, mi elel. migensiasia cih peuh in, thuleng khah in melhsawm pahpah uh hi.

Bangteng hi le, nuam leihleih zel mate.

www.irrawaddyblog.com ah kawllai a kasim Zominize a kong hawmsawn ahihi.