Ka email ki hack !
Tulai ka email hong ki hack sak in, kei min tawh email hong kikhak a om le kei hi hetlo ka hi, na pilvang un, FBI le Police ah zong ka report laitak hi, cih bang mipi zaksaknate i sim kha zel hi. Anai pen in Dr. Pum Za Thang Tombing email ki hack hong tangkona bang tulai thupiang ahihi.
Email pen banghang ki hack thei hiam cih leh adiak in,
1. Password khek pahpah lo.
2. Password le Email ID kibang or kinaihuai lua.
3. Mipi internet zat khawmna ahi Cyber Cafe le Library khong ah computer zanga sign out loh khakna.
4. Malware ( malicious software) kici software gilote na computer ah kibusa.
Cih bang le adangdang hang ahihi.
Na email hong ki hack a leh bang cih ding?
1.Na Email hong kihack cih na theih a , login theih lai le, na security set up check inla update in, Operating System, Antivirus le Antispyware cih bangte ahihi. Ahihhangin na PC ( Personal Computer) pen siangtuan nailo dinga na upmawh leh bel bang mah hih kei in. Malware khatpeuh na PC ah hong kibusa ahih le bel, na password khek pen le adang update tuamtuam na bawlte zong, hacker te kiang tung veve dinga bang mah phatuamlo ahihi.
2. Na email hong ki hack le mi khempeuh tungah va hilh koikoi kullo hi, na lawmte emal a spam filter in na hemkhia lel ding hi. Ahihangin na email zanga sum ngetna ahih kei le malware tawh a kikhakkhawm le bel, na lawmte contact mengmeng inla hilh in.
3. Email thak nih bawl inla, khat pen original email ding in zang in, mimal contact poimawh le lawm le gualte tawh kizop nang in zang in.
Anihna email pen amasa hong ki hack a leh zat tangzang ding in koih in, email Insurance dan cihna hi.Hih email pen service provider te tawh kizopna ah zang in, gentehna in Yahoo, Google, Hotmail cihbangte tawh kizopna ah zang in.
Tua khit ciang email khat bawllai inla tua pen website tuamtuam khong, Zonet khong lutna in zang in. Email 3 nei dending cihna hi.
4. Password (Kamsel) na bawl ciangin atawm pen mal 6 phasak in. Upper Case ( ABC...) Lower Case ( abc...) le numerical ganan/aisa ( 123...) cihbangin akim in kihelkhawm sak in, gentehna sdF34AbO21CC cih khong hoih hi. Adang na hihzo kei phial zong in, na primary email kici na email khatna pen ah hihbang password te bek zang hamtang in. Ciamteh hamsa ding tawh kibang napi'n, zang taktak leng ummawh sang ciamteh baih zaw hi.
5. Computer abit (secured computer) khat pan na email login inla setting ah pai in, na setting a kikhek hiam cih en inla akikhek le update in. Securitry Question khong limtak check kik in.
6. Na personal email khatna pen library, cyber cafe le mipi computer le net zatnate ah zang kei in. Gmail na zat le https ah na email koih in.
Email ki hack pen kua mawhna hiam?
1. Nang mawhna ahihi. Na email password pen atawm pen kha khat khatvei khek hamtang in. Abit password i gente zang hamtang in.
2. Malware hang ahih le mailam ah na Window update in hong pai ciangin update pahpah in. Tua banah Antivirus le Antispyware te a ki "on" hiam cih zong check den in.
Malware te hepkhiatna antispyware hoihte lei inla na computer ah thuah hamtang in. Tua hi leh spyware le malware tuamtuam na computer ah hong kibusa theilo ding hi. Hong busa kha a om le zong tua antispyware ten hemkhia pahpah ding hi.
Malware/Spyware dalna ah
Spyware Doctor www.pctools.com hoih penpen kici hi.
Leitungbup ah azang zong tampen hihtuak hi.Hih ka blog pan zong ki download thei ahihi. Blog tunglam en le cin
Antispyware ahih kei le
Spyware Doctor kicihna mek lecin a original ki download thei hi. Poimawh le hong kidong zel ahihcianga partnership bawl theih nang ka zonzon le mupaklo inga, nung deuh in a original le official platform mu kha a, hih blog ah zong kong thuah ahihi.
Atawpna ah na email a bit nang pen nangma mawh puak hi masa hi. Nang hih theih zah tawh na dal zohlote pen malware/ spyware te hang ahihmanin, na PC security system muanhuai nang antivirus, antispyware te thuah inla, kidal den ding ahihi. Window update hong pai ciang zong, nawngkai ee ci in pai pahpah ken la update pahpah in. Window update i bawl ciangin i computer pen amathu a hong kikhak dinga , tua pen thulamdang hilo in ngak ding hi lel hi.Hong kihong kik lel ding hi.
Nungdeuh a ka email khat hong ki hack nonga, tua pan kipan kikem kiveng hong kul in, laibu le online research them khong kabawlna pan kong hawmsawn ahihi.
Politic gimnam post khong gelhgelh kimlai, buaina in hong phut vat leh tech blogger bang kisuak kha dektak zawzen cih ding hi.
ICT guru leh English siam kisa mawhlo te sim dinga kigelh hilo in, tangpi tangta lak ah kei banga IT tanlang pih khong i om khak le ci a kong post ahihi.
