Quebec Independence

Spain gam sunga Catalan gamke kiteelna ah, Catalan Independence deih party te'n  gualzo uh a, tua thu azak uh ciangin , Canada belpawlgam sunga Quebec gamke  independence lak ding deih te'n, tha ngah mahmah uh ci in, Montreal Gazette thuthang in November 28, 2012 ni in gelh hi.

Spain gam a November 23, 2012 ni a kibawl Catalan gamke kiteelna ah,  independence deih Catalan party te'n mun 135 lak ah mun 83 ngah in zo piikpeek uh hi. Independence deih maw, deihlo cih mipi dotna Referandum bawl theih nangin mun 85 kisam a, tua zah ngah zolo deuh uh hi. Seat 2 kisam kieukiau hi.

Ahihhangin hih thu in Canada belpawlgam pan  paikhia nuam  a, gam thak sat nuam Quebec Independence Movement nakpi in tha ngah sak mahmah ci hi. Catalan kiteelna result ah independence deih te'n zo cih azak uh ciangin , Canada gam Quebec gamke a Montreal khawpi ah, Catalan diallap khai ngeimngai in lungdam pia uh ci hi.

Spain gam ah September kha  sungin, Catalan gamke Barcelona khawpi ah, mipi awn lang val in, lampi zuihna nei zuahzuah uh a, tua pen tukum sunga dinga  Europe bup ah mipi kikaihkhawmna tam penpen kici hi. Tua Catalan mipi lungphona in Quebec Independence Movement zong khanglo kik sak hi ci in, Montreal Gazette in gelh hi.

Montreal Gazette in agelh zomna ah, Quebec leh Catalan pen akibanglohna om hi ci hi. Spain Constitution in belpawl gam pan inntuan ding Referandum bawl ding phallo ci hi. Ahihhangin Canada Constitution in bel Canada pan intuan leh inntuanloh ding dotna 'Referandum' bawl theihna khuan pia ci hi. Tua ahihman a Quebec te lawp mahmah uh ci hi.

2014 ciangin Scotland ah Referandum bawl dingin, England leh Scotland kithukim khin uh a, tua thu in leitung zeel in, independence movement hong thang kik ahihi. 

Kawlgam ah zong Nargis pingpei hun sunga, thagum tawh kikipsak Nargis constitution ah, Kawlnuai pan kuamah suakta theilo ding ci in, anuai a bangin gakcip kholhna mipi dong lo in gelh uh hi.

Chapter ( I )

State Fundamental Principles

Alian 2, aneu 4 (d) ah:

" No part of the territory of the Union, namely, regions, states and self-adminitered areas etc., shall ever secede from the Union." ci in gelh uh hi.

Quebec te deih teel theih khuan ngahna Canadian Constitution  bangin,  Aung San leh gam 3 te kithukimna tawh hong piang khia, 1947 Kawlgam Constitution ah zong referandum bawl khuan om ngei ahihi.

Scottish Independence 2014 The Reckoning [ original Song ]

Scotland Independence

                               

Scotland gam in suahtakna Independence lak ding leh lakloh ding vai tawh kisai,  mipi dotna ( Referendum) bawl ding ci in, Scotland leh Britain ( United Kingdom) kikal October 15, 2012 Monday ni in kithukimna khutpi mek uh cih kiza hi.

Voice Of America in agelhna ah British Prime Minister David Cameron leh Scottish First Minister Alex Salmond te'n Edinburg khawpi ah khutpi mekna nei uh ci hi.

Edinburg khawpi kithukimna ah, Scotland mipi te'n United Kingdom gamlim sungah om nuam lai maw? Independence deih zaw maw?  cih thu 2014 ciangin, vote khia a teelna nei ding ci hi.

Britain PM David Cameron in Scotland gam in Independence la a, a paikhiat ding uh thukimlo ci hi. Ahihhangin Scotland mipi te'n amau maban ding a deih bangbang uh teel khuan nei uh cih bel thukim ci hi.

Tukha October khacillam a mipi Sodomna ( Public Opinion Poll) kibawlna ah Scotland mipi 28% in Independence ka deih zaw uh ci in pulak uh ci hi.

                              
View Larger Map

1707 kum a kibawl thukhun ( Act) khat hanga, England leh Scotland kibelpawl uh ahihi.

Aljazeera News in agelhna ah 1603 kum a kipan Scotland leh England in ukpi khat nuai ah kigawm uh a, 1707 kum a kipan Parliament Innpi khat kisuah uh ci hi.

Ahihhangin  1999 kum a Tony Blair makaih  Labour Party hun sungin, mipi thukimna tawh a kiphiatsa Scot Parliament pen kihing  kik sak ci hi.

England lamte genna ah Independent Scotland gamthak in inntuan uh hi  leh, nektawm ding nangawn  aneih zawh  nang uh hamsa mahmah ding hi ci i Englander te'n  gen uh hi. Banghang hiam cih leh tu mahmah in zong kumsim in UK in $ 45 Billion ta huhna ( Grant) kumsimin piaden a tua tawh anungta uh ci hi.

Tua banga England lam te'n adeih sak abat pong uh hangin, England te patauh taktak pen, Namgim leh Gas piipaa Billion 20 val omna North Sea tawh kisai a patau uh hi zaw ci in Aljazeera in gelh hi.

United Kingdom- UK ahih kei leh Britain kici belpawl gam pen, North Ireland, England, Scotland leh Wales gamte kibelpawl khawm gambawk khat ahihi. Tua belpawl gam a kihel gamke te World Cup ah zong a tuam tek a kihel thei uh ahihi.

Burma zong Panglong Thuciam zui a kibawl belpawl gambawk khat hi in, tuabnag in pai suak taktak thei hi leh, Zogam zong World Cup Qualifying tukpeng kimawlna khong ah, i ngap nak leh kihel thei lel ahihi.

Tulai tak Canada a Qubec State in zong mipi deihna Referendum tawh, Independence ngah zawh nang a hanciam san lai tak uh ahihi. Zomi tangpi tangta te'n zong i maban ei deihdeih a khensat khuan,  nei khinkhian ih hihlam theiciat huai ahihi.