Politics maban i etpak cianglah limci leh maa kihong hak tuak mahmah lai hi.
Burma lam enleng 2015 ma Panglong Khawmpi daan khat bawl pih dingin, tua khit ciang khawmpi thusuak teng, parliament ah sung ding, parliament kipsak ding ci mawk uh hi.USDP leh Myanmar Army ultungna Balma parliament in bangteng hong pom sak , pomlo ding cih i theihsa hi in, bangmah thulian lua lam-et kul nawnlo tawh kibang hi.
Tua mah bangin India lam enleng Zosuan teng leh India in kikapkhawlna nei in, kihona aneih laitak uh ahihi. UPF nuai a tengin ATS ngenin, KNO nuai a tengin Kuki State ngen uh hi. Tu ciangciang i et ciangin, India Central kumpi leh Meitei State kumpi sangin, eisung buaihuai leihleih zaw mawk i hihmanin, ngah khat zong neilo a, vattum khong i thuak zawsop ding hoh, lauhuai leh kilawm zaw hi. VDF acih pyitusit namkhat India leh Manipur State Gov in, training piapia mawk uh in, maban limci lua khollo hi.
Gam leh nam maban cih pen tu leh tu tawm a ding, thu geel ding tampi a om mah bangin, mailam saupi en a, gel leh sep kholh ding tampi om ahihlam kuamah in i haih kei hi. Tua ahihmanin, tutawm leh saupi a zat theih ding thute mah genzom to lai ni i ci hi.
Meikhulo Zogam Part 5 ah agalpan sinna thu , them khong i ciam hi. Tai dimdem in i genzo kei phial zongin, amongno khat beek genkhia thei i hihmanin, bangmah theilo leh zalo a om bikbek kha ana om leh them bang phatuam veve dingin i lamen hi. A theisa te a ding zong ki hanthawn thak na a lak theih ahihi.
Tutungin bel Day kah ahizong, Distance pan ahizongin, Degree leh Certificate ngah/ lak sese loh a zong, pilna siamna khenkhat , ei thu a kisin thei ahihlam i gen nuam ahihi.
Hih thu gelh ding sawm laitakin, a lungdam huai mahmah thu khat hong om ahihi. Harvard, MIT te thu gennawn kei ni, i cih kawmkal ah amau thu mah gen ding thu khat hong om hi.
Tua thu in banghiam cih leh tukum 2012 akipan Harvard leh MIT kipawlkhawm in, edX kici internet online pan amawkna a, laisin theihna sang khat hong khia uh hi. edX phualpi pen Cambridge, Massachusetts ah koih uh a, Harvard leh MIT te'n vaihawm uh hi.University of California zong kihel ta cih kiza hi.
Leitungbup a university minthang 150 val in zong,edX ah kihelnuam ci in zasak khin uh ci hi. A website uh www.edx.org ahihi. edX president masa penpen Anant Agrawal, Director ( Lui), MIT Computer Science and Artificial Intelligence Laboratory ahihi. India lamte na hi in, i etcil bangin i thabang dahpian zo hi. Scam hoh ahi diam ci in, i lung bang nuamlo man zawzen hi. Ahi zongin, amah pen fit mahmah sa a a koih uh hisam ding hi.
edX laite pen amawkna in kisin thei dinga, nidang ciang bel sinman tawmcik khong bel la ding uh ci hi. Harvard lecture khat USD 2000 khong tawh tehin bel, tawm hong man mahmah dinga kilam-en hi. Tulaitak course tam kingah nailo a, nam 7 bek hong pan uh hi.
Tutunga pen hong kihong masak penna hi in, sang hongna ah kisin thei ding teng anuai a bang ahihi. Admission cih bang omlo ci hi. Na register baih leh nang alut kha hi lel hi. Course kingahte:
1. CS 50x Introduction to Computer Science ( Harvardx) Oct15, 2012
2. PH207x Health in Numbers: Quantitative Methods in Clinical and Public Health Research
Harvard mah, Oct 15 a kipan ding.
3. CS169.1x Software as a Service- SaaS ( Berkeley) Sept.24, 2012.
4. CS 188.1x Artificial Intelligence ( Berkeley) Sept.24, 2012.
5. 6.00x Introduction to Computer Science and Programming ( MITx) Oct.01, 2012
6. 6.00 2x Circuits and Electronics. ( MITx) Sept.5, 2012.
7. 3.091x Introduction to Solid State Chemistry. ( MITx) OCT.15, 2012
Cih teng hong khiat masak sawm uh hi. edX tawh kisai update tuamtuam pen blog khat nei uh a blog address uh http://blog.edx.org hi.
edX pen Zomi te a ding ngiat a kibawlkhia mah bangin, Zomite hong ngakngak hi leh kilawm phial hi. Tuma kum 3 vallai a hibangthu ka pheklek keei lai in, om nailo a, distance education leh online learning khong bek mah om in, aminthang lualote nangawnin, sum tampi mah la veve uh hi.
Tutung pen Meikhulo Zogam gelh ding ci a, kong kipat kawm , Havard site lut kik a, Extention thu ka et kik leh, taklam nuainung sidebar ah, edX program na om dihdih in, ka vel leh. mukhia kha dihdih ka hihi. Hih edX pen tu a kipanpan hi in, mailam ah course tampi leh sang tampi in zom lai ding banah, tuition fee lalo/omlo phialphial ding ahihmanin, Zomite gam leh nam bawlkikna ah hong phatuam mahmah kha dinga lam-et ahihi.Vaidangah i zekai hang tutunga bel apatna pan lap bilbel hihang. edX pen leitungbup a thak liklek ahihi.
I gelhgelh leh bei theih tuak kei in, tutungin edX them i ciap kawmin, hi zah tawh khawlbawl phot ni.
