Meikhulo Zogam Part 4 ( Update)

Tutungin Zomi te'n Meikhulo Zogam koici bawlkhiatzo ding i hiam? cih tawh kisai in, them kikum leng ut i hihi.  Meikhulo Zogam cih pen pilna siamna siksan a bawl kul ding himawk ahihciangin, amasa in pilna siamna lam mah i gen masak hong kul hi.

Leitung pianzawh scienctist lak a pilpen phial leh khuak hat pen a kigen, Albert Einstein paunak minthang kigenmun mahmah khat in bang ci hiam cih leh " Insanity is doing the same thing over and over again but expecting different results" ci hi. Acihnopna ah " Haina taktak i cih pen sepngeisa bawlngeisa mah semsem napi agah cianga gah tuamtuam lam-en nilohna hi" kici hi.

Zomite tuhun ciangin khua kimuta thu kithei ta ahihmanin, atunga puanak tawh kisai sau gennawnlo in, mimalmal in akhiatna zaizaw  zong ciat dingin koih phot ni.

I gennop bulpi ah lut leng tuhun ciangin pilna sin theih ngah theihna lampi tampi omta in, pilna siamna tampi zong amawk in kihawmkhia ziahziah ta hi. Pilna in lampi lai ah kiko bek thamlo in, tu'n i innsung nanagwn ah hong buluh ta ahihi. Pilna ngah theihna ataangpi in nam 3 khong om a tuate:

1. Sangkah ngiat a sinna.
2. Agalpan sinna.
3. Ei leh ei kisina.

Atunga 3 te lak pan i gennop bulpi pen a thumna ahi Ei leh Ei Kisina hi. Ahihhangin abanban in i ciamsuk masa phot ding hi. Educational Seminar, Workshop leh Theory thak phuaktawm ding hilo a, tulai ei Zomi te i tu'n tan leh i omna tantan pan bangci kidomkang ding cih thu kikumnuam zaw i hihmanin, a thu tomlak ding hi hang.

1. Sangkah ngiat a sinna

Sangkah ngiat a sinna cih bel itheihsa tek ahihmanin akhiatna definition gen dihdih nawn dah ni. Hihmun ah leitungbup a minthang Oxford, Cambridge, Harvard, MIT, Yale, Stanford cihbang University minthangte akipan Zogam dawn a tan 4 sangte tan huam ahihi. Hih sangngeinate pen mikim kahhuai sinhuai hi. Hithei hi leh Zomi te leitungbup a Top10 university te lian bek ah  lut ziahziah thei leng deihhuai hi. Mitampi genna ah tua university minthang i cihte zong, alai leh pilna sangin, lutkhuan  entrance exam leh sangsap tuition fee te hamsa zaw ci bek hi. Entrance Exam zo in sangsap piazo peuh leng,  alai bel  Zo khuak tawh zawhlah ding omtuanlo hi. Harvard leh Sang minthangte Sample Lecture te amau website te leh Youtube khonga om zihziah in, ei mahmah in ngaikhia enkhia le hang, upmawh zah luapi a hamsalo ahihlam i mu ciat  ding hi.Ei lunglut zawk deuh subject te ah i cihna hi.

Hithei hi leh Zomite leitungbup a Top 10 University te leh, agamgam a Top 10 University te ah i kah zawh nang hanciam ding hihang ci in i kihanthawn nuam hi. Ahihhangin tuate pen mikim a ding hong hisamlo ding hi, adiakin ei  Ne Win- Than Shwe Products te a dingin hamsatna tampi om hi. Ahihhangin mikim in i  hih theih khat bel om hi. Tua in bang hiam cih leh tua university minthangte thu,i tu itate kiangah aneulai uh a kipanin  zasak kholkhol, gengen, enen sak khol,  hithei hileh va hawhpih zelleng, amau zong tua sangte ah akah zawh mateng cih lungsim hong nei ding uh a, avek un ahikei phial zong in tampi'n tun lawh ding uh hi.

World Top 10 Universities

1. Harvard
2. MIT
3. Cambridge (UK)
4. Stanford
5. University of California, Berkeley
6. University of Oxford ( UK)
7. Princeton University
8. University of Tokyo  ( Japan)
9. California Institute of Technology
10. Yale University

Asia Top 10 Universities

1. University of Hong Kong
2. University of Tokyo
3. Pohang University of Science and Technology (S. Korea)
4. National University of Singapore
5. University of Melbourne
6. Peking University ( China)
7. Hong Kong University of Science and Technology
8. Australian National University
9. Kyoto University
10. University of Science and Technology of China

Atunga teng pen leitung leh Asia a university te dinmun tawh kisai UK siksan Times Higher Education Website te tehna hi in, akumkum leh atehpawl kibatlohna tawh kizui in, kilamdangna themthem bel om thei hi. Ahihhangin atangpi in atunga teng hi pian den uh hi. Na vel nop leh www.timeshighereducation.co.uk ah kivel thei hi.

Kawl University te bel a rank uh akizo'n leh kimu paklo hi. Tanglai in Yangon University pen Southeast Asia ah akhatna hi, khenkhat in acih pong losiah Kawl university te thu leitungah kitamgen lo hi.

Neihloh sang Theihloh buaihuai zaw a kicih mah bangin, ei anu leh apate i kahzo sinzo kei zongin, i tuno tanote tua sangte tawh ki maingal sakna tawh kipantah thei  hi. Azak ngeiloh, atheih ngeiloh leh muh ngeiloh thute hong lunggulh khollo ding uh cihman hi. Ahanciam leh akikhaikhia tuam te a dingin sum omlo a zong scholarship, grant leh loan khong om lel ahihi.

Lamka lam te'n " Kitawlem" cih kammal khat nei uh a, tua kamal khiatna pen " Khat leh khat puanlem a taw kilak, ahih kei leh puante'n kilemsak ngeingai." cihna daan pian hi. I kitawlem ciangin mitaw i lem sak mah bangin, eitaw zong hong kilemsak ahihmanin ,  i vek a dai kisuak hi.

Tua ahihmanin himun ah abeisa a Zomi te khawmuhloh daan, tuantual daan leh pupate mawl daan cihpeuh tawh, i khangtohlohnate amawhpua ding zong nuamlo hihang. Maban koici masuan ding cih ngaihsun ciat zaw ni cih tawh, alamdang lua ahilo formal education kici sangkah ngiat a siamsinna i khum phot hi.

I gelh leh hong tam toto tawh kibangin Agalpan sinna leh Ei leh ei kisina, Part 5 leh 6 lam ah zomto in khawlbawl phot ni.

Zom toto lai ni.