Nguyễn Trần Huyền My leh Myanmar media 7 Contract bawlna
Vietnam Actress Minthang Nguyen Kawlgam ah movie bawl dingin November 10, 2015 ni in hong pai ding ci in kiza hi.
Nguyễn Trần Huyền My
Thai actress karavi tawh movie kibawl pen lawhcing ahihmanin, Kawlgam mipi te'n online a apaktat uh Nguyen tawh zong movie khat kibawlsin nuam hi ung ci in MM7 company te'n gen uh hi.
Nguyễn Trần Huyền My
Kum khat movie khat ta MM7 tawh bawlkhawm ding uh ci hi.
Nguyễn Trần Huyền My
Zomite tawh zong cikciang i bawlpih zo diam cih bel kitheinailo hi.
Nung kal sung laibusaal library ah ka pai kawm, movie himhim enlo zong sawt ee ci a, ka pheklek kawikawi leh Asia lam movie khat na om hi.
Singapore te limhing khat na hihi.
Asia movie thapia ding ci a kaveelcian leh a thulu pen ILO ILO ci in, abang hi ding ahia? ci a, atuamna nunga tomkimcing ( Short Description) ka sim a leh, hih movie pen a lunglut huaipi khat na hihi.
Leitungbup a movie limhing tawh kisai minthang penpen leh a kizahtak penpen ahi Cannes Film Festival ah lah ding ngiat a kicial liang movie khat na hihi.
Atangthu pen a lamdang luapi hilo a, Singapore innkuan khat leh Philipines innteng nasem khat, 1997 Asia Silbawl Dongtuakna ( (97 Asia Economics Crisis) kici, Asia gam teng stock buaina hang a sumbawl paibawl kiat sung teng siksan a kibawl limhing movie khat na hihi.
Director pa pen England a limhing siam va sin Singapore khangno khat hi a, ama nuntakna sungate tampi siksan kawma bawl ci hi. Director pa aneulai in Singapore ah Philipines numei inntengte kepsa a khanglian ci hi.
Singapore ah gamdang inntengte tawh kisai media ah pen ginatlohna leh thuhoih tam kisuaksak phalo ci hi.
Ataktak ah Singapore a pai numei innteng atamzaw pen tuabang hilo a, Singapore naupang te'n nu banga nei uh ci zaw hi.
Singapore ah nupakop a nasem tam zaw uh ahihmanin tate don manlo uh a innteng cial uh ci hi. Director pa zong tua bangmah pan khangkhia khat hi a, inntengte dinmun pen mipi theisak nuam ahihmanin, London pan hong ciah ciangin a film masa pen ding a bawlpah ci hi.
Innteeknu ding pen Malaysia actress minthang khat la pah in, inntengnu ding zong Philipines actress minthang khat zang pah hi.
Sum haulo ahihmanin movie limhing dang bawlzolo a hih tawh a pat khiat ci hi.
Hih film thu pen kuaman zong thei ngap ken teh acih leh, Cannes Limhing Khawmpi ah lak ding in, sapna a ngah takteh lamdang kasa lua ci hi.
Cannes Film Festival ah mi 800 val in en a mivom, mikang leh mipak cih omlo a khitui luang ka muh ciangin lamdang sa peuhmah in " Aw, mihing pen a kibang vive akihi mawk ve." cih ka lungsim ah hong lut ci in director pa in gen hi.
Hi movie tawh kituakin Zolia tampi zong India,Myanmar, Thailand, Malaysia leh Singapore ah hibang semngei, semlai leh mailam a semlai ding tampi i omlam hong phawk sak vat hi.
Mipi te'n zong tuabang a kuankhia Zoliate dinmun theihsiam pih ding deihna tawh kong share ahihi.
Na local library ah zong om dinga en hamtang in ci in i kihanthawn hi.
Downoad leh Streaming a ennuam te'n Walmart te VUDU leh Netflix pan zong kingah ding hi.
A CD/DVD/Blu-ray a leinuam kemnuam te a dingin bel Amazon ah om hi.
Youtube zong March 31 ni in kum 8 cing ta in, tech 30000 val in endik ding uh ci hi. March 31 ni zan 12 pan video thak , upload khak pak dingin, kum 8 sunga video hoih asak penpen uh teel ding ci uh hi. Zomi Video khat khong in hong ngah kha diam? ci a pang tek ding hi lodia?
Alamdang bilbel khat ah bel Youtube min tawh video 130 khong bek na upload bek ta leuleu uh hi. Mi video tawh na tam buai zaw daan uh hi.
Khenkhat in Youtube pen MTV nam khat hiam, cimphawng website nam khat hiam? in zang uh hi.
Youtube pen tu'n leitungbup ah Search Engine 2 na hi ta hi. Google Search losiah buangah, theihnop zongna in ki nak zat penpen leh kim penpen ci hi.
Youtube tawh minthang, pillawh, hauh lawh leh lungnop lawh mi tam mahmah kici hi. Alungkhamlawh zong om zek veve bel hih tuak hi.
Zotube ah bel abeisa kum 8 sungin Zomi Song cih loh i phattuampihna tamlua nailo hi.Ngaih Anglai mah a en tam pen lai in, a zom ahZogam Lapi khong hi kha thei ding hi.
Bang teng hi leh, hong pai ding kum 8 sung beek ah,
Zomi te'n zong tu a sang i phatuam pih zawk nang lampi zong zek leng hoih ding hi.
Tuni San Francisco Bay Area lamte blog khat ka-et leh Aung Way lanam ( poem ) khat hoih dihdih banah, Chin Dwin Gunpi kianga Sen leh Kawlgalkap UMEH companyte sumsan gukna tawh kisai, lungpho mipite thapiakna tawh aphuah ahihmanin, kong post sawn hi. Aung Way ih cih bel Yangon ah politiciante asih cianga han a thugen den, mi minthang khat ahihi. Tuhun a Yangon a awng baba te, hun khat lai in lau a bukmang lai vua, thugen khia ziahziah ngam ngei khat ahihi. Kawlgam ah thong lutlut pong ding cih loh hih ding omlo ahihmana, ZU-ES gam ah pai a free takin, kuamah mitmei veenglo in poem gelh zel hi.
2010 kum a California a lai thu genna.
Mualgamte Self-determination tawh kisai, Kawl makai leh mindawkte laka paungam lai om sun, Moe Thee Zun innlam ava ciah leh, 88 Ko Ko Gyi ( Myanmarian Buddhist Fanatics) makaih in na muak ngamlo uh a, Aung Way in azak ciangin Moe Thee aw hong ciah kik in, New York a U Thant Min kivawh tuikulhno tungah, Burmese Republic thak phut ni in, ei te gel teng ni ci in, poem khat gelh a minthang peuhmah hi. Poem Idea leh Kammalte hoih mahmah hi, eilam apanglai sunsunte thu theih zel huai hi. Kawllai ahihhang sialualo hi.
Letpadaung Mualpi 33 asemh ma un, tua kiang kiim mah a om Sabay Mualdungpi bup Canada Company Ivanho tawh liaktum khin uh a, tu'n Sabay Taung mualdungpi mangta ahihi. Tua kawlgalkapte guk zuak Sabay Tang bup man dollar teng, koilai tung cih kitheilo a, mipi ten ci Kg khat, anntang keu khat zong angahlawh lam uh tuni tan kiza nailo hi.
Tua bek thamlo in, Nargis Pingpei hunsungin, galkap te'n delh nuamlo uh a, mi asi ding zah sangin azah tampi in sih lawh hi. Tua sawng teng mah in 2008 Constitution kipsak uh a, tuni tan 2008 Nargis Pingpei Constistution kicih lawh hi. Tua bek hilo in Than Shwe te putu English Premer Leaque team minthang Manchester United lei sawm in, na buai mahmah lel dih uh ahihlam, American Ambassy Sikkhaulai Kehkhia ( Wikileaks ) ah anung ciang ki pholhkhia hi.Khenkhat i Sabay Tang man tawh aleisawm u ci in, khenkhat in Mon Gas teng tawh aleisawm uh ci hi.
Tu'n Letpadaung Mualpi 33 Sente tawh sehsat sim sawm leuleu uh a, asum teng UMEH (OO PAI) Galkap Mafia Company ah lut sak gaih sawm leuleu uh hi.
Letpadaung khit ciang Gullu Mualpi sente tawh guk sawm leuleu uh hi. Electric Power tampi kisam ding ahihmanin, India tawh kipawl in Chin Dwin guunpi Thamanti khaw kiangah , khaktan sawm uh a, tua gunzeu pan electric Mega watt a tul a sim piang dinga, tuateng Gullu Gukkhiatna KawlGuta Pawipi ah zatsawm uh ahihi. Tulai tak unau Kuki Zomi khua tampi Chin Dwin guun kiang pan kinawh khia khin zo hi.
Atheilote a dingin Kuki cih pen lamdang asa om ding a, khenkhat in nek theih Cookies sa in tua hilo a, eilam a Thado Zomi te India lam a kisapna ahihi. Chin Dwin guunnaak lam a te Khuangsai kici nuam zaw pian uh a, Khuangsai cih lim zat zaw uh hi. Kuki chih pen ei Zosuan bup Bengali te'n hong sapna uh na hi in, Bengali laikhungpu Nobel Lauriate Rabindranath Tagore i Tripura tawh kisai agelh Novel ( Vuat-thuh) bu Rajarshi ah, ei Zosuante pen Kuki ci in, galhang leh kihtaak huai mahmah daan in na gelh hi. India leh Bangladesh tangthu ah na kilim hel mahmah ngei hi.
Bengali te'n Kuki hong ci in, India Hindu kamphente British te'n adot uh cianga, Hindu Kamphen te'n theilo leuleu in, Sente acihna uh CHIN hi uh hong ci ziau uh a, tua akipan Briitish Burma khutnuai a, Zomi te pen CHIN kici suakkha i hihi.
Bangteng hi leh tua thute kinungkup ni in, Letpadaung mual 33 khit ciangin. Gullu leh Chin Dwin Zeu in hong zui ding ahihlam , Zomi tangpi tangta te'n na thei khol khinkhian a , i kiging kholhkholh ding hun ahihi.
Totalitarianism kici Huaiham Duhgawl Ukcip pawlte ngian tawh
kisai, leitungbup a minthang penpen phial a kingaihsun, Sir George Orwell
gelh Animal Farm thu na sim nai hiam? USSR hun kipat cil lam a Joseph
Stalin sungthu nuhnaulai (Satire) tawh agelh ahihi. Kum tampi asawt hangin tuni tan leitung bup ah dik toto lai kisa hi.
Hih tangthu bu ( Novel) sungah khuakhat ah lokho leh gankhawimi khat omin, ni khat ni ciang, agankhawi teng kikum uh a, a pu uh leh do kik uh hi. Tua khit ciangin ganhing gampi khat phuan khia uh a, Vokte ki uk sak uh hi. Asawtsawt ciangin, vokte mihing sang hong suk zaw uh a, ahihhangin, ganhing te'n angian uh manzo lo uh ahihmanin, ganhing ciatciat sila suah kik uh hi. Atawp ciangin vokte in mihing tawh kipawlsim in, ganhing teekte sasehsat dingin zuak uh hi. Ak, vasa leh a tui theite tuisak uh a, mihingte zuak in, vok teng in mihing gamtat teng mah zui uh a, ganhing dangte sila in bawl suak uh hi.
Kawlgam zong Voktal Aung San leh Kawlvok teng makaih in British te i do dinga, i vek in, sila pan kipeekkhia ding hi hong ci uh a, ahihhangin i suaktak khit ciangin, Vokte bangin British te sila ngei ciatciat, ganhing mawl leh hai teng Vokngian tawh tuni tan hong uk suak in, Animal Farm sunga tuu leh uital te banga, Kawlte lam bang a leh pang nuam ki tam mahmah ta hi. CNF leh party tuamtuam te, Civil Society leh Biakna makai khenkhat te en leng i mu ding hi.
Zomi sungah zong George Orwel banga Satire Novelist ahihloh hangin, Satire Cartoonist khat kineingei in tua i neihsun pen Pu Zo Zam ahihi. 2008 Constitution nuai ah party hong phuat zawh ciang bel, ann ngawl zen a Yangon plaform dungtengah khedap paat zen a kileh kawikawi a, kumpi nuhnauna cartoon suaihsuiah sangin, khateh dawh ( crony) lam ah ki baptise leng gilvah zaw in teh ci hi leh kilawm hi.
Animal Farm tawh kisai Youtube ah Animation in zong om hi.
Kawllai tawh zong Thakin Ba Thaung in leh khia in, 88 khit ciangin US te sapawn ( Maelah Pu Cin Lam Pau cih daan leh) tawh tampi kibawlkhia kik hi. Adeih te'n ABSDF gimnam te kiangah kan le uh ci'n, hun khat lai a US sapawn tawh asuahkik uh hi in, a sumval teng tawh thautang leina uh hi. Tua pen leitungbup theih thusim lian mahmah ( Top Secret) khat hi ngei ahihi.
Original English tawh asimnuam leh simkik nuam te'n Google Aff Program pan kilei thei kik hi.
