Tulai cidamna vaibuai tawh bangmah kihih manlo in, lawmte Mauvom khua, Tonzang pan Pu Pau Khai in nunglam kha 2 val pek pan a motor hong zonpih in acihcih pen, zanni in thasinna ci in kava zonpih hi.
Unau Zahau Zomi Pu Za Biak Cuang i Toyota Camry (2009) nungdeuh a alei vuah tuang ngeingai in, motor dealer teng kiangah zanni 12 pan nitak 7 tan kazong keei uh hi, nitak ciah ciang bang kizawm keei zawzen hi.
Zomi leh Asian dangte mah banga lawmpa in zong Toyota mah ci tentanin, khawsungbup a dealer teng kiangah Toyota Camry ka sul zon keei uh hi. Dealer te kiang suak peuh leng i mel hong en uh in, na motor deih daan uh theih ung, hong ci zawzen uh hi.
Lawmpa'n pen 4000-5000 man kikal hi dingin, tha khat thu a sumpiakpah ding, leiba thangba tawh payment ci a, nung buaibuai nuamlo ahih cianga, hong zong hak sim veve ahihi.
Toyota Camry ka muh sunsun uh lah 6000 mannuai om phalo in, nidanga unau Zotungte tawh ka lei theih zelna uh , dealerpa kiangah ka pai uh leh Toyota Camry na neilo in, Honda Accord 2001 khat na nei bilbel hi.
Toyota sang hih Honda pen lei mai ve kacih uh leh, lawmpa hong lunglut bilbel in, limtak ka kiho uh leh laidal man, tax leh adang teng kihelin avekpi in 4000 tawh ka kiho thei uh hi.
Kha khat Warranty man 40 pialeng, ipiak laisiah engine, transmission, AC leh major part dangte tavuan la ding ci uh in, tua warranty zong ka bawlpih pah uh hi. Tua Warranty pen Motor Mileage 200,000 n uaisiah te a ding kibawl thei na hi in lemtang bilbel hi.
Motor aihna ci in Zotung khat, Tedim Zomi 3, Zahau khat ko akuan tengin, Mcdonald ah Burger lianpi khat tek tawh, ka aih ngeingai khit uh ciangin ka kikhen uh ahihi.
Inntu'n ciang Kelly Blue Book ah ka check kik leh, kileikhial lualo sam hi leh kilawm hi.
Anuihzak huai khat ah bel motor te leima a veel (check) cianga, innlam banga engine start khit cianga, aset a hoih hiam ci a, lever sik vava a motor gingsak damdam pen, dealer te'n zadah mahmah uh hi. Motor thakte cih loh, motor lui peuhmah hibang hih khuan omlo hi, ci in hong kham keei uh hi.
Mi motor leipih zong anung ciang i motor leipih na hoih keei kha leh ci in, i lung nuam thei taktak phalo hi. Mel theih leh athei siam taktak te bek ki leipih ngam cih ding hi.
No comments:
Post a Comment