1994-5 kim pawl Zingsol Magazine le Chin Magazine-Universities Mandalay bawl ding buaipih a Yangon katuak suk hi. Yangon Siamsinte bawl Ciimnuai Magazine abuaipih Mangpi (Pu Vung Lian Mang Tu'n ZIUSA Tanupi) kiang ahi, Yangon Institutute of Technology hostel ah kava zintung ahihi.
Tua panin Ciimnuai Magazine pawl tawh kithuah toto in Shwegon Daing a YMCA ah ka kibusa ngeingai uh ahihi. Kumtawm lai ahih banah thathak ahih manin kilawp in Sanglai bang awlmawh manlo, kiatkiat lawh keei zen a, ko tumtak a kipei keei kahi uh hi.
Tua pannin Kawlgam i Nerve Centre kici thei phial 33 st a LayThanKone ah kava pai thei zel uh hi. LayThanKone icih pen Kawlgambup a laigelhsiam, la gelhsiam, lasa minthang, movie stars le politician cih bang Kawlgam i khuak le lungtang teng kisuktuahna khat ahihi. Thukan (spy) zong a ki vingvial keeina mun khat ahihi.
Tua laythankone ah Zomi sungah ana tuitumzo pen, mi natam mello in Pu Ram Ling Hmung, ( Myat Pale christion magazine publisher bannah, CNLD vice president) le Cartoon Zozam te nih khong bek na kihelzo uh hi. Tua banah Yangon Mayor zum pan kibawl Myodaw Magazine a sem Salai Shwe Lin (Mindat) zong kimu thei zel hi, amah bel Budhist Extremist khat na hi bilbel ta leuleu hi.Myodaw Magazine pen galkapte bawl ahih manin midang te'n gimneih pian hi.
Pu Zozam in kawlgam laigelhte dinmun tuamtuam le apaiziate ama theih zahzah hong lam lak kawikawi ahih manin bengvakna le mit taina zong tampi kingah lawh hi. Pu Zozam te group pen Tawhlan Cartoon Saya kici uh hi. Revolutionary Cartoonist cihna hi.
Kawl galkap kumpi diklona teng gelh giapgiap uh in, atamzaw Press Secrutiny Bureau in suaksak ngeilo hi.Cih nopna ah amau group pen kumpi langpang tinten cartoonist group khat ahi uh hi.
Khat vei Cartoonist tengin Judgeson Centre ah show abawllai un Pu Zozam cartoonte hoih kasa mahmah uh hi, ci in Mangpi tawh guestbook ah kava gelh uh hi. Ei le ei mi lak ah tha kipiakna daan a ngaihsun ka hi uh hi. Tua cartoon exibition ah Pu Zozam Cartoon khat ahi "The Audience" pen Korea Ambassy pan Ks 5000 tawh lei ahih manin ki angtang pih mahmah hi. Tua cartoon ah mihing maitang vive tawh kidim in , en pak leng bem (zero) vive tawh ki bang ahihi. Ahi zong enen leng tua bemte pen laimal hong suak in lai kigelh khat om hi. Bang lai hiam cih bel amah gamsungah omlai ahih manin hi mun ah pulak dah ni.
Khat vei, 1995 pawl hi in thei ing, Ranggoon University sungah Chin National Day bawl ding thu CLCC makai te'n vaihawm ahihmanin tua laka kihel kha Pu Mangpi tawh zong Lay Htan Kone ah tua thu ka kikum uh hi. Pu Zo Zam zong om hi, tua laitak Chairpersons a tu dingin Yangon a omkha Zomi MP teng kicial sawm ahi, cih Pu Mangpi in agen leh Pu Zozam in " bang ee? MP e ? Mutpu maw? " ci in hong dong kik hi.
Cih nopna ah Pu Zo Zam in Kawlgalkapte adeihloh banah MP politiciante zong umlo( confidence neilo) hih tuak hi.
Ahizong tutung CNP party chairperson la in 2010 kawlgalkap election ah MP tuh sawm cih kazak ciang lam dang sa, umlo in ka kancian leh asawm takpi mah na himawk hi.
Vision tuamtuam tawh a sawm ahih manin, mimal in sia hi pha hi, cih gen ding om tadih lo phot hi.
Ahizong Pu Zozam in ni dang kithuah lai a Mutpu-MP acihte amah mahmah in tu'n sep sawmta hin teh maw? kana ci pong hi.
Thu behlap- tua tungtanga Zomi namni ah Pu Cin Sian Thang ( Tedim), Pu Thawng Kho Thang( Tamu) , Dr. Hmuh Htang ( Than Tlang) tepawl, tausang tungah ki tusak in kipah tawi ahihi. Ranggoon University ah hi bang a politiciante kisam ngam ngei khollo ahihi. Tua tungtangin ASSK le NLD in Zomi Namni message khaknuam hina pi, committee in buai huai tadih phot sa uh ahih manin kisim khia lo hi. Asimkhia dinga ka ki volunteer le lawm le gual in hong awi lo hi ding hiam , tua thu kiluikik lo hi. NLD le ASSK thupi salua mahmah cihna hilo in, galkap te'n sim mawhna tawh hong kham sese uh thang paih huai sa kasak man ahihi.
Bang teng hi le Pu Zozam in SPDC MP sem ta ding maw?
Mimal muhdaan ahihi.
No comments:
Post a Comment