Zomi Siamsin le Khangnote kisam ta

Tulai i gam dinmun i theih ciat mah bangin lamka bom ah a om laitak ahihi. 2008 Constitution a dodal pawl le akipsak pih sawm pawl ci in khen nih kisuah ahihi.


2008 Constitution pen Zomi le Mualgamte a ding hoihlo cih pen i theihsa ahihi. Tua a hih manin a dodal pawl ahi ZNC le NLD i nungthuap ding kisam mahmah ahihi.


Zomi mipi bup in pen anungthuap nangin Siamsin le Khangnote panlakna kisam masa ahihi. Banghang hiam i cih le ZNC pen kawlgalkap te'n encik in asep khem peuh uh khiang dinga galkapte kiging khol den uh ahihi. Tua ahih manin amau tang thei lo banah, mite'n lau in kua man zong va neh ngam lo ahihi.


Siamsin mawhpuak pen pilna sin ding ahihi.Ahi zongin gam khempeuh phial ah gambup nambup vai hong hih ciang a tanupi hi zel uh cih gentehna lakkhia sese kullo a i theih ciat ahihi. Tua mah bang in khangnote zong innkuan vak nang nasep silbawl tawh buai ding mah ahihi, Ahi zong hun phamawh ah a peng theite hilo hi, agamtang pi te hi leuleu uh hi.


Siamsin le khangno pen tulai dinmun ah a diankhiat ding hun hita ahihi.


Banghang hiam i cih leh 2010 election boycottna pen LUM (Shield) bek hi in tua tawh kicinglo ahihi. Tua ahih manin A TEIPI (Spear) zong kisam hi, Tua TEIPI in bang hiam cih leh 1990 election base a Mipi Kumpi ( Popular Government) bawl khiat ding ahihi. Government a bawlkhiat ngam kei uh leh zong Mipi Movement lianpi khat kisam ding ahih manin tulai siamsin le khangnote om maimai theih hun hilo hi.


USA Obama hausa pawl in zan nitak in Kawlgam policy ahi " GUUL LEI " policy kazom lai ding uh ci hi. Cih nopna ah sanction zong zom ding, engagement zong zom ding cihna hong suak hi. Tua mah bangin EU in zong Election vil ding sawl sawm uh hi.Hih pen hoih hetlo ahihi.


Tuate enleng ZNC le NLDte boycott pen LUM bek hi pan in a TEIPI kisam lai cih siang mahmah hi.ZNC le NLD in TEIPI tawh a khawh theih nang in siamsin le khangno tha hong kisam ta ahihi.


NLD le Mualgam partyte bel ei buai pih kullo in mit hem khat vei kilak le uh aman hi pahpah lel uh hi.


Hi mun a i gen nop bel ZNC in a LUM bawl sungah bu khian khuan niloh kei hen la, TEIPI zong tawi leh i cihna ahihi. Tawi bek hilo in Than Shwe lungtang sungah KHAWH leh i cih nopna bulpi ahihi. Ahizong tua TEIPI in Than Shwe lungtang ah a phutlet zawh nang pen siamsin le khangno tha kisam cih nopna ahihi.


Tua ahih manin Zomi Siamsin le Khangnote history ah mualsuang thak khat phut hun tungta ahihlam phawk ni. May kha ni 7 ni khit ciang bel a thutuam ci ni. Tua ma sung bek i gaapna san khia ciat ni.