WZC Motto hilhcianna

World Zomi Congress Motto dingin " Join The Second Zomi Independent Movement" cih June 27, 2010 ni meeting pan ki khensat ahihi.

Banghang a hih Motto kiteel hiam cih leh 1896 British Colony Kumpi in Zogam ukna ding Chin Hills Regulation Act bawl a, Zogam amau khutnuai ah sila le koltang in kum 60 ih om khit ciang, 1948 kum ciang in Kachin, Shan,Karenni le Kawlgam tawh kipawl in independent ih la khawm ahihi.

Tua independent pen Panglong Treaty siksan a kisual khawm ahihmanin Independent ngahzawh ciang belpawlgam khat bawlkhia a, eigam ciat ah ei le ei kithuneihna ( Self-determination) tek tawh vai kihawm ding cih ahihi.

Ahihangin tua Panglong Treaty siksan a hong piang Union of Burma ah kum 14 ih om khit ciang Zomi Self-determination pen kinei taktak loin Kawlte'n vompi sahawm a thukhunpi ( Constitution) na gelh uh ahihlam kiphawkhia phing ahihmanin, Zogam,Kachingam le Shangamte kikumkik in, ih Self-determination le Independent kepbit theih nang ngimna tawh Constitution puahphat or gelhthak kisawm ahihi.

Tua constitution puahphat sawmna Kawlgam in deihlo, hong haza ahih manin 1962 march kha ni 2 ni in Zogam kumpi hong phiatsak ahihi. Zogam pen Kawl gamkek galkap te'n kiukna teng la cip in, tunitan Zomi Zogam in kumpi neilo, thuneihna neilo in Kawlgam nuai ah sila nautang in ki om ahihi.


1948 Jan 4 ni a British Colonialist kumpi pan Independent i ngah pen 1962 march 2 ni in kikhah suakkik ahihi.

Tua ahihmanin Zomi le Zogam in Independent i ngahkik nang i hanciamkik hong kul ahihmanin, tutunga movement pen Second Independent Movement kici ahihi. Kawl mipi makai Aung San Suu Kyi in zong amaugam movement pen Second Independent Movement mah na cici ngei ahihi. Tua bek zong hilo in Tu a Kawlgalkap kumpi kicite pen Facist na ci lai ahihi.

Tua ahihmanin Zomi te'n Independent Movement i bawl pen i sep ding mah hi in, Zo vontawi akua mah ciat in i thasial loh ding ahihi.