Chin National Party le Kawlmang

Chin National Pary atomin CNP pen Zomi khat ahi Pu Zozam le khangno khenkhatte makaihna tawh kiphuankhia cih ih theih ciat sa ahihi. CNP tup le ngim pen 2008 Constitution siksan a Zomite a ding huangsung pan sep theih zahzah sem ding cih ahihi.

CNP party i ngimnate sem thei taktak ding ih hi hiam? cih kantel huai thu khat hong suak ahihi. Banghang hiam cih leh CNP pen Zomi lak a politician le activist maithak thathak  tampi makaihna ahih banah Zomi le Zogam itna lamsang ah zong muanmawh huaite hihetlo uh ahihman ahihi.

Ih theihsa tek mah bangin 2008 pingpei thukhun ah Mipi Palai-MP 25% pen kawlgalkap te'n luah dinga adang 75% pen mipi te'n adeih bangbang uh vote tawh telkhia tangtang ding uh cih ahihi. Tua siksan mah a CNP party hong piangkhia ahihi. "Something is better than nothing" cih ngaihsunna tawh Zomi mipi phatuam ding deihna ahihmanin pahtak huai uh ahihi.

Ahizongin upmawh huai hetlo lamkhat ah USDA pen USDP in kawlmang in mitphial bang in hong lepkhia ziau vua kipan in  thukawng teng hong kilumlet vilvel ahihi.2010 kiteelna ah 75% pen mipi palaite ding kimlai USDP in siakmai gai ding cih hong kilangsak ahihi. Kawlmang i mipi cih pen USDA na himawk in, tua USDP palaite le galkap palai teng pen MP semsak sawm  na hi khinkhian leldih uh ahihi.

Tua ahihmanin SPDC+ USDP in MP munteng luah gai siang ding  ahihmanin, Mipi Palai MP kiteelna hinawnlo in Mut Pu- MP kiteelna cih ding hi ta mai ahihi. "Kawlmang thu Akpi in Phiatmai" cih Zomi pupa paunak pen tutan diklai mawk ahihi.

Tua tawh kiton in 75% siksan Zomi le Zogam ading sep zawhzah sem ding (guulman ding) a hong kipan khia CNP party in maban bangci in pan hong laksawm uh hiam? cih pen lunglut huai mahmah thu khat hong suak ahihi.

Kawlgalkap theihpih a Zomi political party khat i din theih pen a met masa pen in tuat theih ahihi. banghang hiam cih le suakta zawdeuh a apau, agen ding platform khat ki nei ahihman ahihi. Ahizong in USDP hong piangkhiat zawh thukawng kihekta ahihmanin, CNP panlak ding daan zong thukawng hekzek leng hoihlo ding hiam? cih ngaihsun huai ahihi.