2008 Pingpei Constitution sung ah leisung sumpiang tawh kisai Zomi te'n thuneihna bangzah nei ih hiam? cih en khia leng " Sharing of Legistlative Powers cihna sung ah Zogam in leisung sumpiang tawh kisai " Ci Khuuk (Salt products)" tung bek ah thuneihna kingah in, adang teng Kawlte'n vompi sahawm in lamang uh ahihi.
Zomite satanh tawh kisai enleng, leisung sumpiang ah Dimlo khua a piang " Dim Ci" i cih tung bek mah ah thuneihna hong kipia himawk ahihi.
Adang khat hongpiak uh bel om in tua pen "Ansing( fuel wood )" tawh kisai ahihi.
Dim Ci le Annsing cih leltak bel Kawlte piak sese loh a zong i thuneih sa hi in, thuneihna bangmah kineilo cileng kikhiallo zaw ding ahihi..
Zomi akuamah ciat in 2008 Pingpei Constitution veel ciat leng i mu ciat ding ahihi.Dimci le Annsing bekmah kigelh ahihi.
Zogam ah Zomite i pil taktak nang pen University le Colledege tampi kisam i hihi. Tuate pen tuipigaltai Zomite kuli thaman khong tawh kilam zo deksuai ding hilo ahihi. I lamzawh hun ding ciang Zogam le Zomi a omlai diam? cih ngaihsunhuai le kilawm zaw hi. Kawlmang te'n lah 1948 pan tunitan i pilna ding hong sep zah uh bangtan hiam? cih i theih ciat ahihi. A om sunsun lah Quality Education cih taktak ding hamsa mahmah hi.Sila Pilna (Kyun Pyinyayay) ciang bek mah ahihi.
Tua ahih manin Pilna bek thamlo infrastructure bup i bulpat theih nang pen leisung leipua sumpiang teng mah i suukkhiat masak hong kisam veve ahihi. Independent gam hiam ? Federal State hiam hileng bel mihau companyte le Zomi government hong kiho in mihau company satanh losiah teng pen State Budget ah hong lut ding a, tua pan Education leh adang tuamtuam ah kizang thei pan ding ahihi.
Zogam leisung sumpiangte i zeek theih nang pen aniam pen in Federal State i ngah kul ahihi.
Tua i ngah theih nang lampi tampi om in, tua lak ah abaih penpen in Pu Cin Sian Thang le ZNC policy zuih ding ahihi. ZNC policy tawh kituak a 2010 election boycott ding hilel ahihi.Vote khiat ni ciang vapai sedah leng, tua pen i malakna lianpi khat hilel ahihi.
2010 pen Thein Sein i USDP in azawhsa hikhin in, amau Kawlte tawh gen ding bangmah omlo hi.
Gen ding dang khat bel om in tua pen " Pasian le ei mimal kikal " ahihi.
Thulamdang khat ah Kawlgalkap kumpi a dingin tulaitak pen hun hoih hunnuam mahmah khat ahihi, zong lungnophuai ngiat ahihi. Banghanghiam cih leh tapong teng lah zawm gawp ta, NLD le UNA lah aguh bek ding genggang lai, leitung khawhun lah recession tawh buai, kawlgam ah lah gas khuuk kiban muh ngekngek in, tuate duh a leitung gamteng in Kawlgalkap kumpi mai et keei mawk uh hi. Zogam suahtak nang cih thadah Kawlgambup democracy vai nangawn a lampi bing ta bang phial ahihi. Mipi zong thaulong lau in ai mitdeh kibang ta ahihi.
Ahizongin upmawhloh lam khat ah Kawlgalkap kumpi na sim buai mahmah hituak hi. Tua pen Kawlgalkap ( Myanmarian Army) sung ah innsung pingpei hat mahmah khat kipei keei hih tuak hi. Nidang a kiza ngeilo sungthute phulkhia zuahzuah ta ahihi.Hih in bang lakkhia hiam i cih ciang amau sung ah asunglam a kuang mahmah meilom pingpeipi khat paai nei uh cihna ahihi. Major Sai Thein Win tungtang bek enleng zong kawlgalkap sung mahmah ah kiukna deih nawnlo tawm nawn hetlo cih kimukhia thei ahihi.
Tua ahitawh kiton in Zomi te'n ZNC siksan in NLD,CRPP le UNA tawh themvei ding tentan lai leng Dimci le Annsing State pan kisuakta ding ahihi, ci in i ki hanthawn ahihi.Tu le tu i sep theih le azuih baih penpen tua hi phot ahihi.
No comments:
Post a Comment