Tonih nasem cih tawh kisai in muh daan tuamtuam omte zaknop huai thei mahmah ahihi. Hih issue luikhiat man zong om mahmah ka sa phing a hihi. Acil a kuan zong lunglut ngap diam ci a,FGA bawnggawh vai comment kong gelh zeuh leh tua bang na hilo in mitampi in zong na awlmawh mahmah bilbel cih ding ahihi.
Muhdaan tuamtuamte atangpi in anuai a bangin kikhen thei leh kilawm sa ing.
1.Kuamah hih ngamloh pastor le pasian nasem te'n zong banghanga hih ngam tuan ding uh hiam? amau zong pasian nasem cih hang mihing mah hi veve uh cih ahihi. Tua ahih manin holhthawhthawh nawn kei ni, cih daan pian ahihi. Adiak in Kawlmang te'n Phungyi nangawn dawm tuanlo uh ahihmanin christian pasian nasemte aimitdeh bang zaw leh hoih ding hi, cih ahihi.
2. Israelte zong Canaan gam zuan a suahtakna alaklai un pasian nasemte mah in thukham singkuangpi pua a mipi mai ah makai ziahziah uh ahihi. Tua ahih manin mipi suahtakna leh pasian thu pen ki keelki loin "to khat" nasepna mah ahihi cih ahihi.
3.Khenkhat muh daan leuleu ah Migilo kumpi lah langpanglo, migilo kumpi deihlote lah gumtuamlo a pasian nasep bek mah sep ding ahihi. Kua mah khentuam paihtuam neilo khamit tawh liangko kikim a ngaihsun leng hoih ding cih ahihi.
Mimal muhdaan gen ding cileng atunga thuthum sung pan a thumna hoih ka penpen ahihi.
Kawlmang pen gamdang kumpi banglo in huaisia diak ahihmanin ei christian pasian nasemte zong dap khikhe lel ni, aci te'n zong amau lungsim tawh kituak in omlel uh hen, ka ci ahihi.
Tua mah bang in " Hilo ahi guai Migilo kumpi pen satan kumpi ahihmanin pasian nasemte zong ki omkhong mawkmawk theilo hi" aci pasian nasem te'n zong amau muhdaan le khata'n daandaan in hangsan tak in pan hong la lel le uh hilel ahihi. Mipi in zong hipa/nu savai lua ci mawkmawk kei leng hoih ahihi.
Newsgroup i cih khong i theihsa tek mah bang in mipite'n amau muhdaan suakta tak a pulakna mun ahihi. Tua tawh kituak in kei muhdaan gen leng athumna beek ah i pasian nasemte atamzaw hong om thei le uh i nahlawh a pek zaw tam ka ci ahihi.
Ka cih nopna bulpi ah bel kawlgam ah pen mipi khenpi 2 kisuah ahihi.Kumpi kici a vaihawmna len pawl leh tua kumpi hi ung a cite deihlo a, democracy le federal union deih pawl ahihi. Mipi mahmah zong tua zui a khen nih kisuah ahihi. Tua ahihmanin tucing te'n a tuute uh khentuam hong nei kei le uh cih nopna ahihi.
Kawlgalkap sungah tuu tampi a om mah bang in, ZNC,NLD, CRPP sungah zong tuu tampi om ahihi. Tua bek thamlo in ZRO, CNF, KNU khong ah zong tuu tampi om ahihi. Zandiak a hong kiphuan WZC kici nangawn ah zong tuu them bang om kici nong ahihi.
Tua tawh kitonin tonih nasep sese kullo a, muntuamtuam a om pasian tuute gulsia thangsia, ngia le Humpi kawmkal ah "khalam" beek ah van thei leng bang acidiam? i ci ahihi.
Muhdaan tuamtuam reply omte hangin mitvakna le khantohna tampi aphawhlawh kingah ahimanin, thukum teng tungah lungdam kong kumkik ahihi.
Mimal muhdaan ahihmanin ngaihsunna kituaklo kha a om leh Zeisu min tawh kimaisak dingin i ki ngen ahihi. Ei Zomi sunga ding in sensitive issue ahihhang khat vei beek luikhiatloh theihloh daan a muhna om ahihman a, kong luikhiat khak ahihi.
Tua ahih tawh kiton a Pasian nasemte lamah thaulong them vei hong kingat kha ahihi. Hong mai sak un i ki ci phapha ahihi.
Tu'n i gennopte "kiaukim" pan gen ciat ta ihih manin topic hong pankhiapa keimah in hih topic kakhakta ahihi.Zonet pute tungah zong hi topic khak phot ding in kong ngen ahihi.
Mailam ah akisam dungzui in ngenteel zaw deuh in kikum lai ni, tu le tu in bel hun sak phot leng hoihlo dia, Zonet pute bang ci in na ngaihsun a?
Thaulong bel SPDC facistte tungah kingat kik ta ding ahihi.
Zahtakna tawh,
Zo Khup
No comments:
Post a Comment