Pu Thangboi in Tedim a Kawlmang Mut Pu- MP kuanglui sawm teng minlist hong suah a leh ataktak hita aive maw, cih in om ahihi. Alamdang kasak bilbel khat ah ka mi theihngei tam simsim na kihel in " Kua teng isak le lah noteng na hi mawk vua" cih phing in om ahihi.
Mekuanglui( Zomi tang in Gul hong matsak ning, ci a khut hong kipiakhiate) pen mun tuamtuam, khaw tuamtuam a om Zomi mipi te'n theikim ciat khollo ding ihih manin, ci in, kei theih zahzah a ki hawmsawn daan in kong gelh ahihi.
Chin Progressive Party (CPP) mintawh adin sawmte:
1. Pu Kham Do Nang
2. Pu Ngin Thang (Former elected MP)
3. Pu Gin Heh Lian
4. Pu Thuam Go Thang
1. Pu Kham Do Nang bel cian lian kei ing.
2. Pu Ngin Thang
Pu N.Thang pen a khualui Zung Khua hi in Lawyer (Sitni) khat ahihi.
Amah pen 1990 kum kiteel taktakna ah Tedim (2) ah Kawl piteknu party ahi NLD pan a Mipi Palai-MP cing ngei khin ahihi. NLD National Convention-NC akah lai a zong NLD palai 80 laka kihel ahihi. 2008 thukhun ( Tu a Pingpei Thukhun i cih) deihlo a Kawl piteknu (ASSK) makaih a NC pan NLD hong nuak (boycott) ciang zong kihel lai ahihi. Ahizong in bang hamphatna ngah hiam? ahih kei leh bang hamsatna hang hiam? cih ki theilo in, Mipi Palai- MP pan hong tawp mawk ahihi.
MP pan atawp ma in Tedim mah ah om a gamnuai pan palai kisawl zel in gamsung a om pong a bang mah nasep theihloh sangin, gamgi ah hongpai in la hile cin Revolutionary Worker te a ding zong phatuam mahmah ding ahihi. NLD-LA,MPU, NCGUB ah Zomi NLD MP ki omlo ahihman in, tua pan hong van lecin kici ahihi.
Nong pai ding leh mawhpuakna ahithei tan kila ding hi, ci in kikunkun ngei ahihi. Gamgi bang ah hong tuthei hi leh Mizoram gov. in zong hong zahtak tuam ding cih ngimna ahihi. Tua hunlai in NLD MP Than Sein pen Aizawl ah tu in, tua zong aphattuamna ciang khat om ahihman ahihi. Tedim ah Zo Thawn ABSDF (UG) lah ahi ( Tu'n Delhi) a om ki contact sak zel ahihi. Ahizong hang hiam cih kitheilo in hongpaikhia ngam taktaklo ahihi.
Atawpna ahang daan a ka theih bel Siapi Pau Do Nang, NUP State Organizer lui in a genna ah bel " NLD ah eimi tang a i muan om sunsun nang bek na hih ciang, hong ding tentan in kacihcih hi ven, hong tawp mawk in bang dia natawp mawk na hia? kacih leh MI.17 pan Lance Coporal Sein Mar Kyi nisim tatsatlo a, zingsangtung ta in hong pai den a, "NLD pan katawp ta hi" cih laigelhsa hong tawi den in sign na bawl ta ding hiam? ci in hong dong den kei a, asawt ciang ninghuai law mahmah a sign na kai kha ka hihi ci in Siapi. P.D.Nang kiang ah genkik hih tuak hi.
Amah pen 1974 kum Socialist Constitution kigelhlai a Zogam thuneihna tawh kisai Beelpawlgam(Federal Union) deih hanga Pu Cin Sian Thang, Pu Lian Uk cihte pawl tawh mat athuak ngei Zomi khangnote lak a kihel khat zong ahihi.
Tutung 2008 Pingpei Thukhun pen 1974 Masala Thukhun tawh alaigil kilamdang khollo ahihi. 1996 kum a zong NC pan Pu Ngin Thang kihel a anuaksansa ahihi.
Alamdang khat ah bel 1974 a gilbem atunlawh leh 2008 pingpei thukhun deihlo a 1996 kum NC anuaksan sa pen, bang mangmuhna nei a 2010 ciang hong khawnung pomkik ahitam? cih ahihi. Zomi NLD citak zawdeuh khenkhat in bel kapu un mipi mai ah acil siatsa hong liakkik mawk in, nuam het kei ei guai , ci in gen ngeingai uh kici hi.
"1990 kum a Mipi Palai-MP pen 2010 ciang Mut Pu-MP hong suak ta cih ding hilo dia, MP i cih zong a definition tuamtuam omta hinteh" ci in, Zomi NLD putek khat in comment gen ahihi.
Kei muh daan ah bel Pu Ngin Thang pen Mut Pu hisam in umlo ka hihi. 1990 kum a mipi in mawhpuakna apiak/ guul hong man sak tapeuh un" ci a mipi vote azol ( Gul man ding) pen 2010 ah hih theih zahzah sepkik sawm hisam hin teh ka ci ahihi.Kawl Party NLD pan piangthak a Zomi Party khat ahi CPP ah hong lut theih zong tapa taimang khat inn hong ciahkik ci a vaidawnhuai ahihi.
Muhdaan tuamtuam hi in, a patauh pih huai khat ah bel USDP te gameplan bang ci kantan a , CPP in mual suahsawm uh hiam? cih ahihi. USDP kumpi hun ciang sign thu ding in zingsang sim MI khat hong kuan zel leh bang i ci leuleu tam cih ahihi.
3. Pu Gin Heh Lian
Pu Gin Heh Lian pen a khualui Buanli khua ahihi.1990 kum Kawlpi RTC a Cowboy Huangpi sung ah kha 3 sung ka omkhawm ngei uh hi.Tua sung a hong genna ah amah pen United Chin Government (1965 ) galkap Captain lui khat ahihi. UCG pen Prime Minister Pu Tun Kho Pum, Defence Minister Pu Son Kho Pau, Foreign Minister Pu Hrang Thio le CNO MP Pu Son CIn Lian, Matupi MP Pu Mangtlingte makaih Zogam suahtakna vaihawm Zogam kumpi ahihi. US le Pakistan kumpi tawh kiho cianga kumpi khat le khat level a na kiho uh ahihi.
UCG pen Mizo tapong kipatma a kiphuan hi in, UCG galkap C-in-C pen General Thual Zen ahihi. General Thual Zen makaihna nuai ah Buanli khawmi 80 lut a Pu Gin Heh Lian pen tualak a na kihelkha ahihi.
Naga NNC galkap le Zomi UCG galkapte India le Burma kipawl a dodal ding, cih policy gamnihte kikal ah hong om ciang UCG dinmun honghamsa a, makai tampi India kumpi in Burma puak ahihi. Tua tawh kiton a UCG galkapte zong makai kician omnawnlo ahihmanin kithehthang in Pu Gin Heh Lian bang Aizawl ah tham niloh in puankhui bang sem kei ci hi.Mizo tapongte'n Aizawl alaksung Indian Airforce in Aizawl khawpi bomb tawh khia a tua laitak Pu Heh Lian zong omkha hih tuak hi.
Mizoram ah sawtpi inlam ciah theilo a aom khitciang Burma Army in "hong ciah in bangmah hong kicihlo ding hi" ci in kamvaikhak ahihmanin, ciahkik hi, ahizongin khem uh a Kawlpi ah kha 6 sung vilvel thusit in, tua khit ciang khah pan uh ahihi.
Tua zawh ciang Shanland Tachileik khua ah sawtpi om in veng hausa upa bang vasem hih tuak hi. Burma Army ciangkhut Lao Sit Hang ( Tu a Asia World Company) i Kokang Kakwe Yee ( Kokang Militia) tawh kilemlo in ahinna tanpha lauhuai ahihmanin, Zogam ah ciahkik in Kawlpi ah kibu sa kik ahihi.Zomi Zogam vai pen avei tinten den khat ahihi. Tua banah mi citak khat zong ahihi. Kei omlai in Sakol 18 le Bawng 84 nei in, Innmun mun thum ah Acre 4 nei ahihi. Tua teng pen zi le ta cih bang neilo a a mah mimal i vaan hi ngeuu zen ahihi..
Hibanga 1962 Federal Union deihlo Gen. Pu Thual Zen i Captain a pangsa, hinna tan kipia ngam ngei khat in, kum 40 val khit phing ciang hong koici pom thak phing hiam cih zong thulunglut huai khat ahihi.
1962 Federal Thusun pen Zomi tang in CNO in sung ahihi, tua thusun pen Burma Army in hong haza a deihlo, phiat ahihmanin UCG in zomto suak ahihi. Tua CNO le UCG maban pen ZNC kipuakpaih ahihmanin, tuni tan tua Federal Thusun hang mah in 2010 pingpei kiteelna pen nuaksan ahihi.Leitungbup a om Zomi te'n WZC min tawh ZNC vanpuak puakpih ahihi.
ZNC-WZC vangik puak khawm pen Pu Heh Lian in zong CPP siksan a panpih sawm hi leh kilawm ahihi.
Ahizong in USDP in election zong kibawl nailo a, Kumpi ngahkhin ta mawk ahihmanin, Pingpei Constitution tawh Zogam vangik bang ci'n Pu Heh Lian in puapih kha ding hiam? cih bel ngaihsun hamsa mahmah ahihi.
Thapaih huai maimai hilo hiam? cihnop phial a om ahihi.
4.Pu Thuam Go Thang bel confirm kul lai ding ahihi.
(zop lai ding)
No comments:
Post a Comment