Kawlgalkap Myanmar Army in Zogam le mualtunggamte tungah mihing tanvo le gal thukhunte palsat bawlsiatna hong bawl pen kum tampi phata ahihi. Ahihangin abeisa hun lai in, leitung gamte le UNO in, athu a mawhsak cih loh panlakna kician bang mahmah nei ngeilo ahihi.
Ahihang in UNO i mihing tanvo palai Tomás Ojea Quintana in kawlgalkap huaisiana khawl tuanlo ahih ban ah, Zomi le mualgamte, Kawlte mahmah i tangkonate om den ahih manin, Kawlgalkap Myanmar Army mawh taktak hiam? mawh taktak lo hiam? cih akankhia ding commission khat bawl khiat ding kisam hi, ci in UNO khawmpi ah luikhia ahihi.
Tua khawmpi ah hong luikhiat a kipan in Thukan Commission ( Commission of Inquiry- CoI) bawl ding vai cialpi aciang aciang ah kibawl in hih lai gelh hun in Ireland in zong thukim pih ta ahihi.UNO i CoI bawl ding vai pen a thukimpih gam 11 hong phata ahihi. USA, Canada, Britain, Czech, Slovakia, Australia, Hungary, Neitherland, New Zealand, France cih gamte in thukimpih khin uh ahihi.
March kha a kibawl khawmpi ah UN mihing tanvo palai in a thusun hi in, kumkhat zong cing nailo a, hiciang hong masawn hong om theih pen topa thupha ahihi. Banghanghiam cih le, Mongam le Rakhinegam ah gas hong kimuh zawh, tua duhgawh in gam tampi Kawlgalkap te'n bumhai zo man uh ahihi.
Bang teng hi leh thuman thudik lam ah i pasian pang den ahihlam, CoI Campaign masawnna pan in siangtak in kimuthei ahihi. Mailam ah gam tampi in zong hong thukimpih toto lai ding ahihi.
CoI limtak hong kibawl khia thei hi leh Myanmar Colonial Army kelluphum teng abanban in hong dawkkhia ziahziah thei ding ahihi. Tuabang in leitung mitmuh in hong pholhkhia uh hi leh, Zomite pen Kawlte mihuaisiate khut nuai ah koih lai ding pen Zomite a ding in lauhuai mahmah ahihlam, leitung in hong mukhia ding uh ahihi.
Tua leitung innpi i muhkhiatna siksanin Federal State hiam/ Independence hiam ingah theih nang lampi hong vangkhia ding ahihi.
Tua ahih manin, Zomi mimalmal akuamah peuh in, Zomi te'n mihing tanvo i khahsuahnate le bawlsiatna i thuakna atuamtuamte ani akha, hong bawlsiate min teng limtak kancian kik a, laitawh ciamteh ciat ding hun hong tung ta ahihi. Tua i thuciamtehte pen mun khat ah i khilkhawm ding a, tua pen UNO CoI ah sung ding i hihi.
Atawpna ah Zomi akua mah ciat laulo le pilvang tak in thu ciamteh kipan ciat in Zomi National Congress le World Zomi Congress a vaisaite kiangah ih thuakkhakna te puak thei leng pasian lampi hong honsak azui kihi ciat kha ding ahi, ci in ih ki hanthawn ahihi.
No comments:
Post a Comment