December 13 ni in, Champhai khua, Zoland ah Myanmar le India palaite'n Border Meet nei uh a, gamgi a Zomi galvan tawh sumbawlte le, singnuaimite dal nang vai tawh kisai kikumkhawmna nei uh in, dal khawm ding zong kithukim uh hi, ci in kiza ahihi.
Tua gamgi kikumna (Border Meet) ah Myanmar lam pan U Nay Win makaih in, Chin State police head, Chin state immigration head ( Lawaka) le Falam district commissioner kihel ci hi. India lam pan S. Singh, joint secretary, union home ministry, HN Mishra, India te Myanmar ambassador,S. Ranganathan, under-secretary, external affairs ministry le Bijoy Kumar Bidhuri, deputy commissioner, Champhai district kihel thei uh cih kiza ahihi. Myanmarian lamte amin uh kitheician nailo ahihi.
Tua kikumna tawh kisai, Mizoram state officers lam pan kizakna ah, India galkapte in gamgi kantan a, Zomi state lam buluh theihna khuan, Myanmarian galkap te'n pia cih kiza ahihi. Ci Kha khua a Myanmarian Camp commander kiangah, thu zasak khol peuh leh, Zomi state lam lut a, operation (sitsinye) bawl khuan pia uh ahihi.
Tua kikumkhawmna ah, Zomi galvan zuakte vai banah, Manipur Meitei singnuaimi United National Libration Front-UNLF le Zomi galkap pawl khat ahi, Chin National Army-CNA vai zong, genkhawm uh ci in kiza ahihi. UNLF pen Ton Zang Township sung meitei guun nisuahna lam teng ah kibuphual uh a, CNA pen Mizogam simlam tengah kibuphual uh ahihi.
Tua ahihmanin, Zomi State sunga om, Zomi sumbawl paibawl le mipi mahmah pilvang kul ahihi. India Army pen tu a kipan hong lut vatvat thei ding ahihmanin, galvan tawh sumbawl le Meitei UNLF, PLA, Prepak cihte tawh akikhawl khong, i om leh lauhuai mahmah kha thei ahihi.
Meitei singnuaimite in sum tha tawh Zomi sung tawkgawp ding in, Zomi khawmulo khenkhat zang uh hi, ci in Zomi khenkhat in gen ahihi. Zogam sung bek hilo leitungbup Zomi sung zong hong tawkbuai sawm uh ci lai ahihi.
UNLF le PLA pen US kihel in, Zomite belhna gam tampi in, terrorist outlaw pawl a akoih lam uh phawkciat huai ahihi.
Tua ahihmanin, Border Meet zawh Zomi le Zogam sung zong tui kitawknawi thei ding cia, patau mi tampi zong om ahihi.
No comments:
Post a Comment