Zomi Bloggers

Nung deuh in, media khat ah Burma/Myanmar Blog 10,000 val om ta kici ahihi. Zomi sungah Blogger bangzah om ta cih bel akician a, kithei nailo ahihi.

Zomi Social Network http://www.zomi.net/ a disscussion group khat ah blogger khen khat akikumna ah Zomi Blog 50 pan 60 khong bek om dinga um mawh uh ahihi. Zomi blog pen tua zah aval lezong tam val law lawmlawm a , upmawhhuai lo mah ahihi.

Tua 50-60 lak ah zong limtak a, ki update tam khollo in, 10 kim khong bek in update bawl zel ding ahihi.

Blogger ih cih pen Blog gelhte cihna hi in, Blog i cih pen English in Weblog hi in, atomin genleng online diary, online news letter cihna piandan ahihi.

Blogger tawhkisai peen a blog neite i lunglut daandaan in, postte kigelh a, engineer khat i blog ah engineering tawh kisai kitampost pah ahihi. Politics lam asem khat i blog ah zong, politics thu mah kitam gelh pen pah ahihi. Tua mah banga lailam a uuk te'n zong literature lam mah tam gelh pen pah uh ahihi.

Tua ahihmanin Blogger te laigelh simleng amau lunglut thute tawh kisai thutheihna kikhang tuam mahmah ahihi.

Zomi sungah zong Blogger tampi omleng cih, lunggulhhuai mahmah ahihi. Blog neih pen laigelh kisinna zong a hihbanah, i lungsim hong nuamsak ahihi. Kua man hong ensak in, ensak tase kei leh i lungsim a omteng suahkhiatna hi in, mimal lungsim tangzang sak ahihi.

Zomi Blogger a ut i om le, Blog bawl pen hamsa hetlo in, zong sum tawh leikullo ahihi. Gmail account nei peuh lecin tua ah kibawl thei pah lel ahihi. Tualo mundang Word Press le adangdang ah zong bawl theih lel ahihi.

Zomi sungah Blogger kitam le thulela hong kicing dinga, thupiang khat peuh zong baih tak le vuicing zaw a , kithei taum ding ahihi.

Tua bek hilo in, blogger zui in, pilna siamna zong kibehlap tuam mahmah ding ahihi.

Zomi sunga website atamzaw enleng blog daan pian vive hi zaw ahihi.

Zomi sunga blog khenkhatte anuai bang ahihi.
Lengtong Blog
Zolengthe Blog
Vaphual Blog
Phuitong Liim Blog

Tua ahihmanin Zomi akua mah peuh in,  mimal blog nei ciat a, thu le la  kihawm ciat dingin, i kizawn ngeingai ahihi.