Tulai Zomi sungah Kawlte kumpi nasem ding alut thak, kitawm mahmah ta ahihi. Khasum khamlo banah, Kawl minam officer te'n ,Zomi officer le nasemte pen colony khutnuaimi sawltak le sila banga, zanguh ahihmanin, Zomi pilna nei te'n, kawl kumpi nasem ding lunglut nawnlo uh ahihi.
Zomi pilna neite, kawl kumpi nasem utnawnlo ahihmanin, Zomi Officer zong kitawm mahmah ta cih ding ahihi. Kawl kumpi ah nasem sunsunte lak ah zong, Zomi Christian officer te zakhangna ngah ( Promotion) thei nawnlo uh ahihi.
Zomi Officer khat peuh, zalianpi atu'n nuam le, Buddhist biakna khongah akikhel kul ta mawk ahihi. Tua banga angsung khualna tawh Buddhist suak te'n, amau angsung bek mah khual pah in, Zomi le Zogam van nawnlo in, Kawl gamkeek kumpi lungkim nang bek zong uh a, mitsip huai mahmah ahihi..
Tunai December 4, 2010 ni in, Chin State khawpi Hal Kha ( Hakha hilo) ah December Mipi Lampai Pawi pen, state kawl galkap thunei te'n vaihawm uh ahihi. Ahizongin, Zomi mipite kua mah va pailo uh a, kawl kumpi nasem 20 khong bek pai ahihmanin, lohsam uh ahihi.
Halkha Zomi mipi pailoh pen, Chin State galkap chairman Brig. Hung Ngai thangpai in, Halkha Township Chairman Pu Suan Khan Thang khuttum tawh tumpai in, lei kidenna cih kiza ahihi.
Hi banga Zomi officer khat tungah khutngakna pen, nidangin om ngeilo ahihi. Hung Ngai pen Buddhist khat ahih banah USDP party i MP khat ahihi.Myanmar colony Chin State Chief Minister dinga zong,Buddhist mangpa Than shwe in asehsa hihtuak hi. Chin State galkap chairmante pen, mipi teel hilo in, Kawlmang Than Shwe in Myanmar Army officerte sunga, amah mai en zozo, lukieuh a a koih hilel ahihi.
Brig.Hung Ngai in Township level Zomi Oficer khat khut angak ngamna pen, mipi khualkullo a, Than Shwe in pakta peuh leh ama a ding lauhuai lo ahihman ahihi. Buddhist khat ahihmanin, Than Shwe in pakta lel ding banah, Pu Suan Khan Thang pen Christian khat hilel ahihmanin, officer ciatciat, Buddhist khat gumzaw ding cih atheih man ahihi.
2010 kiteelna pan a hong omkhia ding, Myanmar Buddhist SPDC-USDP democracy pen Pu Suan Khan Thang in aciam masa, amalep masa kha,r cih ding ahihi. Nagis Chin State konghong pawi zong kici thei ahihi.
2008 Nargis Constitution siksan a hong piang ding, Nargis Republic pen, Zomi Officerte a ding zong, lipkhaphuai mahmah ahihi.
Tua ahihmanin, Zomi Officer te'n zong, mipi thuneihna le minam liangko kikima vaihawmna, hong piang theih nang ngimna tawh kibawl ding ahi "Second Panglong Conference" support ciat ding in, i kizawn ahihi.
Second Panglong siksan a kibawl ding, federal constitution bek ah, Zomi Officer te'n vaang (dignity) neitaka nasem thei ding uh ahihi, ci 'n muhna i nei hi.
No comments:
Post a Comment