 |
| Basic colors of The World Zomi Congress |
(Hih Blog post pen http://www.zokhup.com/ blog neipa i, mimal muhdaan le ama experience gelhkhiatna hi lel ahihi.)
Tutung in Zomi flag tawh kisai, muhdaan le, flag tawh kisai genkhawm khakna a om cianga, tuakkha thute tawh kisai hawmsawnna ahihi.
Zomi te'n Zogam Flag cih theih taktak ding kiciamteh, kinei nai taktak lo cih i thei ciat ahihi. Hih vai mah awlmawh in kikumna om thei zel ahihi.
Zomi sunga Flag omsate enleng,
1. Chin State Flag ( 1974)
2. Zomi National Congress Party Flag ( 1989)
3. Chin National Front Party Flag ( 1989)
4. Zomi Re-unification Organisation Flag
5. Zomi Innkuan Flag
6.Kuki National Organisation Flag
7. Young Mizo Association
8. World Zomi Congress
Cih bangin flag kizang tangpi khenkhat i mukhia thei ahihi. Hih Flagte tawh kisai mimal muh daan tuamtuam alunglutte kiangah kihawmsawn i hihi.
1. Chin State flag
Chin State flag pen Zomite sungah, i zang tangpi le, alui pen khat ahihi. A color pen Blue, Red, Green ci in gial 3 kigual suk ahihi. Alaizang ah Vaphual lim om in, tua vaphual pen aksi 9 in kimvial ahihi.
Zomi le Chin magazine tuamtuam khawng i bawlciang le, ceremony tuamtuam ah kizang ahihi. Burma/Myanmar sungah zong official a kizang khat ahihi.
Ahizongin, hih flag tawh kisai lim le color siam lamte'n agen uh ciang, a color pen kihual hetlo hih tuak hi. Color Matching manlo hituak ahihi. State Flag kibawllai a upa te'n, color thu theikhollo a , hoih asak khat peuh uh napia khia lel hituak ahihi.
Zingsol le Chin Magazine buaipih lai bang in, Zomi sunga Artist i neih Pu Cin Sian Mang, Pu Zozam le adangdang te'n hih pen nak gen mahmah uh ahihi. Artist mit pan kilomlo, haivai, tawta vai mahmah hih tuak ahihi.
Asan le Green kihelkhawm pen, ngeina hilo hihtuak ahihi. Tua ahihmanin, Chin State Flag ci a, Ne Win i BSPP hun lai a kibawl,i Zogam Flag pen tawta lan, cileng kikhiallo ding ahihi. Color Matching diklopi khat, va salute niloh ding. cih pen thuhamsa mahmah khat ahihi.
2. Zomi National Congress Flag
Zomi National Congress flag pen asan background ah vaphual khat tu ahihi. 1988 huhau tawh hong piangkhia Flag ahihtawh kiton in, Kawl NLD le Bakata-(ABFSU) flag tawh kivalak mahmah ahihi. Utong ( Khenkhat in taihciat ci) mun ah, vaphual lim kikoih hilel ahihi. Vaphual i cih pen atangpi in, akopkop a om kimlai , Utong etteh a khat guak vakoih ngeuu ngauu pen, kop cingnailo deuh ahihi.
Vaphual pen khat guak i koih le zong, musane (vulture) banga, tu ngeungau kei henla. active zaw deuh, hangsan, navak zaw deuh khat in suaileng deihhuai ahihi.Chin Magazine 94-5 ah poem teng Lushi Taungtan Moeyin Tea kiap in tua ah bel, artistpu in vaphual lenglai vive tawh illustration hong bawl leh kilawm peuhmah le i ngaisunna zong tuamdeuh zo phial ahihi.
Nidangin Pu Cin Sian Mang, Pu Zozam, Pu Vung Lian Mang cih bangte tawh kikumkum zel in, Vaphual pen a thangahhuai zawdeuh a Zomi Artistte kisuai sak in, ki enkhia zel in, magazine khongah kizang khia zel ahihi. Zingsol magazine, Ciimnuai magazinete ah ahithei zah in, kizang ngei sam na pin, organisation le party flag dinga kizang dinga kingaihsun khalo ahihi. Party le Organisation khat peuh ah zong ngaihsuna va kipia kha ngeilo mah ahihi. Pu Zozam in Chin National Party hong phuankhia uh ciang vaphual lenglai khat hongsuai CNP flag ah hong tuangsak ahihi. Ahizongin tua pen Cartoon vai lua deuh in, cartoon idea sang fine art idea ciding hiam, realism zawdeuh tawh hileh deih huai ahihi.
Bangteng hi leh ZNC flag pen, Pu Cin Sian Thang gen mah banga abrupt change kici, upmawhlopi a,khang kikhelvat sunga, donghu vai tawh kibawl samsam ahihmanin, donghu flag cih theih ahihi. Tua ahihmanin, donghu flag taktak pen limtaka, puahpha hunta cihna ahihi.
3. Chin National Front Flag
Chin National Front flag pen, Zogam galkap pawlpi lan masa pawl ahihi. Nidang in biakna symbol tuang flag khat zangngei uh in, khenkhat in criticise ahihmanin, phiat kik uh hih tuak hi. Tu a pen atung ah a Blue, alai ah white, anuai ah Red gialthum mah ahihi. Alai ah Vaphual nih kielngat in om ahihi.
Color matching hoih mawhlo ahihi. Leitung gam gina tampi te'n azat uh blue le red zong kihel ahihi.
Ahizongin, mihingte in ganhing( vaphual) mai a vakunkun mawk ding pen, hong vangneu huai mahmah ahihi. Leitungah mihing pen ganhingte sang sangzaw le ganhingte ukdinga pasian hong bawl ahihi. Tua kimlai, ganhing va salute khaukhau ding cih pen, pasian deihna tawh kileh bulh in, satan vai ahihi.
CNF flag tunga vaphual nihte pen kielngat/ kilehngat ahihmanin,abeisa le tulai Zomite dinmun diktak kilang sak ahihi. Ahizongin, Zomite i civilise toto tawh kituaka, unity kithutuakna zong, hong hoih toto sam ding ahih ciangin, CNF Flag pen tulai a dinga adik hangin, mailam saupi i en ciang, kimang suak kei leh kilawm ahihi.. Zomi Future neihloh vai ahihi. Vaphual kileh ngat cih pen kimaingat sak huai ahihi.
4. Zomi Re-unification Organisation Flag
ZRO Flag pen nidangin Organisation flag le Army flag ci in, kikhen ahihi. ZRO flag pen gamthum kisutuah lim kihel ahihi. Ahizongin, tunailam ciangin, ZRA galkap lan kizang kop zaw ahihi.
ZRA flag pen Red, Yellow, Green kihel ahihi. Akkeng limdaan a, kibawl ahihi.
I gensa mah bangin, green le red color kimatch hetlo kizang leuleu ahihi. Leitung ah, green le red a helhkhawm, gam le minam flag neite peuh mah, a thupilua lawmlawm omlo ahihi. Gentehna in Myanmar, Etheopia le Africa a gam tampi te'n, Green le Red color pakta mahmah uh ahihi.
Yellow color pen Burma ah Buddhist te'n pakta mahmah in, Buddhist color kici phial ahihi. Buddhist Religion Flag ( Tatanah Alan) zong Yellow mah hipah ahihi. Burma bup ah Buddhism pen State Religion a suaksak sawm lai un, Prime Minister U Nu in, meekuang ( Ballot box/ meepone) teng pen yellow color zut zeza se ahihi. Burma context ah yellow color pen Buddhist le kawlte i ong zawhthawhna lakkhia, palai color khat ahihmanin, Buddhist color kihel flag mai ah Zomi Christian bup, i va kun zuahzuah ding pen lipkhap huai law deuh ahihi.
ZRO flag design a akkeng lim a kibawl pen, khenkhat genna ah, singlamteh lim hi, acizong om hi. Singlamteh ahih vet vanglak le, Singlamteh taktak mah banga suaksak in, tumtan kei leng hoih ding ahihi.Singlamteh lim, Christian symbol deih i hih leh hangsan taka, tettikhan (testimony) pah a, suaksak ngih ngiah lel ding ahihi.I Christian hihna taklang ngam buang, taklang ngamlo buang khat a, i om kiaukuau le, pasian thangpai dinga, thupha kitan zawsop ding lauhuai ahihi.
Tua ahihmanin, ZRO/ZRA flag pen ahoihzaw sem hong om theilai le deihhuai ahihi.
5.Leitungbup Zomi Innkuan Flag
LZI flag pen a color matching hoih mahmah ahihi. Zogam lan dinga bang hoih pah phial ahihi. Ahizongin, Judah Aksi/ Davuih aksi ( David Star ) hong tuangsak dihdih uh pen thukhunlui lai, Mosi thukhun khang leh zuankik a, ha a ding ha, mit a ding mit, cih bang hunlai vailua ahihi.Tua banah Zudahte i Davuih kumpipa pen feudal king khat hilel ahihmanin, Ukpi kiukna ah ciahkik ding hileng kilawm ahihi.
Tuhun pen thukhunthak ahi, Jesus hun ahihmanin, laisiangtho sunga symbolte, i zat ding veve le, singlamtehpi mah zang suk giap mai leng, pasian in hong awi zawtham ding ahihi. Thukhun lui pen pasian kammal hi, cih losiah, Zudahte khangtangthu le Zudah minamte le pasian politics history hilel in, Zomi hong konlawh khalo uh ahihi. Laisiangtho thak hun bek cianga, Zomi te'n saseh hawmpawi ( thupha hawm pawi) ah kihelkha pan i hihi.
Zudah ten a gam flag dingun, Zudah aksi/David Star zang khin uh ahihmanin, zong vatuhtuh sak ding hilo ahihi.
Zomite pen thukhunthak i gah, a lo kha pante i hihi. Tua i hih manin, eite gupkhiatna taklang, singlamteh lim in, khel thei zaw leng, i nahlawh pek zaw ding ahihi. Zudah Aksipi khong, flag a koih leng, muslim gamte a, zinsuk vakto Zomite bang, Zudahte kisa a, thah khong i hai thuakthuak khak ding ngaingam huailo ahihi. Muslim gamte tawh Zomite tu ciangciang, relation sialua kinei nailo ki ci ahihi. Jacob le Ismail unau kisiatna hang lel tawh , Zomi le Muslim millions 1000 kisiat kullo ahihi.
5. Kuki National Oraganisation Flag
Kuki National Organisation Flag pen Green, Red le Blue in kigualsuk ahihi. Alaizang ah Davuih Aksi/ Zudah Aksi ( David Star) mah om leuleu ahihi. Green le Red kikop banah Zudah Aksi thu atunga flag omsa khenkhat ah gen khin i hihmanin, hih mun ah genbeh nawn kei ni.
6. Young Mizo Association Flag
Mizoram tawh kisai flag tuamtuam a om hangin, Official Flag nei nailo in, a awlmawh khenkhat in amau mimal muh daan le design khong agelh gelh san laitak uh ahihi. Mizo buppi huam zo taktak a gen theih ding flag pen YMA flag ahihi.
YMA flag pen Red, White le Black in kigualsuk ahihi.
A color dang nih tawh kisai gen ding omkhollo hi, avom (black) pen leitung flag tuamtuam ah kizang khollo ahihi.
Tua banah Black pen khawmial, kamsiatna le gilona khongah akhiatna kikhia tangpi ahihi. Tua ahihmanin, a black pen kikhel thei leh etlawm zaw dinga upmawh huai ahihi.
Black pen azang tam lo ahihi. Tulai leitung pen liberalism lam ah kihei ngeingai ahihi. Liberals le democrats atamzaw in Blue, White, Red cih khawng zang tangpi zaw uh ahihi. Tua hihmanin, i sunmang Zoland zong democracy gam mah deih i hih manin black khong tam zang keileng hoih zaw ahihi.
7. World Zomi Congress Flag
World Zomi Congress Flag pen Blue, White le Red color base in kibawl ahihi. Blue background ah Singlamteh san lim om in, tua singlamteh liim pen akang in kigelh ahihi.
Blue pen peace genna hi in, White pen Freedom le wisdom genna ahihi. Red pen hangsanna le kiitna ahihi. Aksi kang pen lamenna, lamlahna le kithutuahna lakkhia ahihi.
World Zomi Congress aki design lai in, Zomite deihdaan, flag omsate pan kienkhia ahihi.
Tua ah:
1. Zomite in color 3 kihel a gial deih uh, cih kimukhia ahihi.
2. Zomi flag atamzaw ah white or Blue kihel hamtang ahihi.
3. Zomi flag omsa atamzaw ah aksi tuang ahihi.
4.Zomi flag tampi ah christian le bible a symbol khat peuh akilang or akilang taktaklo in kituangsak ahihi.
Tua ahihmanin, WZC Flag a ding akigen ciangin, Zomi Flag omsate pan a hoihlo teng kipaikhia in,
1.Kilemna le lungnuamna alakkhia Blue color
2. Siangthona, Pilna Ciimna le suahtakna alakkhia white color. Khasiangtho lahna zong ahihi.
3. Hangsanna, khensatna le kiitna lak Red color
4.Lametna, lamlahna le kithutuahna alakkhia Aksi khat.
Ci in basic color thum le aksi khat kiguang ahihi.
WZC Flag pen kipawlna flag hi in, Zogam le Zomi Flag cihna hilo ahihi.
No comments:
Post a Comment