Lamzang Khua, Zogam ah jeep khat accident in mi 4 si leuleu

Dear All,

Zan March 10, 2011 Thurday ni zingsang lam 10:00 a.m hun pawl in  Zogam Tedim pan a, Ciaulam a zuan Dyna mawtaw, TedimLawibual veng, Lamzang lamka gei a teng, Khualui ( Laitui ) Pa LanghKui te mawtaw or Ka Khai mawtaw pen, van a dim a pua, mi 30 val tuang in, Lamzang khuataw, a han nuai uh, Lamzang khua pan Furlong 2 bek agamlat na, lamkawi, a ken na mun lian ah, lampi laizang lian mah ah kibungh a, tua hang in a phual ah Zomi  nupi khat leh naupang khat si pah a,Tedim hong pai to na ah, mawtaw nungzui pa zong si leu leu in, Tedim hong tun khit nitak lamciang in pasal khat mah si leu leu in, zan inTedim zato ah a si Zomi ( 4 ) leh a liam a bai mi numei, pasal kigawm (30 ) pha hi ci in zato siamah khat in hong gen hi.


Tedim hong tun to na vuah zong mawtaw ten 3 vei bang zato ah hong pua to uh a, a thei khempeuh leh a za khempeuh, kumpi lam pan a, U Lian te a ki pan in zato ah ki delh to ngeingai in, ki lung khampih tek ban ah zato ah siavuan-siamah te leh zato nasemte zong sun khua buai mah mah uh hi.


Zomi  si teng min te:
( 1 ) Pa Nang Khan Lian, ( Laitui ) Mansuang lei, gun a teng, Mawtaw
nungzui ( Handyman) mawtaw nei te i a maak pa uh;

( 2 ) Nu Vung San Cing, Khualui ( Suangzang ), Ciau a teng in ki gen,

( 3 ) Tg. Nau Dam Peek ( Lusei Zomi te dan hi ),

( 4 ) Pa Thawng Kho Pau, ( Suangpi ), Hakha ah E.P.C zum te motor driver.

A liam teng a tam zaw pen Lusei Zomi leh Hakha Zomi lehFalam Zomi tam in Kalaymyo- Tahan kiim leh paam a teng te vi ve hi pian hi.


Zan nitak in Kalaymyo ah a liam a bai te lak ah, a gim phadeuh teng pen ki pua suh a, tuni zingsang in zong Line Bus tawh ( 10 ) bang ki pua suh leu leu in, tu in zato ah a liam mi ( 7 ) bek om ta ci hi.

Gen khial thei khial a om a leh hong na thei siam un, zan ni tak lam in lawm ten hong puak khin ding ka sak pen, kua mah hong puak nai lo a hi leh ken puak mai ning e, cih a kong puak uh hi.



Thu puak,
Fr. Go Lian
Tedim.