Zannitak ( 03/11/2011) innciah ciang, internet ah news kaet leh Japan ah zinpi ling in, tsunami tuihual in Japan Malsuah bial teng bunuai ci in, news na om zengzung ahihi.
Ziinliing le tuihual bel leitung mun khat peuh ah om den hilel banah, ei Zomi le Zogam gentheihna zong, kuaman hong awlmawh ngap zong hi kei, ci a, ka thupi ngaihsun khol kei leh, Japan a om Zomi khat in, sunlam in phone hong contact in, tu'n zong lingling lai, lau peuh mah ung ei,ci, ci in innteknu in hong gen leh abang hipeuh mah ding hiam? ci in, video teng ka zong saisai a, ka en kawikawi leh i galzak banglo in, hong lipkhaphuai peuhmah mawk hi.
Nidang khonga i galzak zel bek hi in, technology hang tawh apianzia teng kimu thei pah mawk in, leitung bel neu mahmah ta cih ding hi. Tutunga pen kum 100 val sung a dinga , ziin le tuihual nasia pawl ding in, kigen a, a si le aliam lian, sazian kikhup theilo ahihi.
Japan Tsunami tungtang pen asi amangte a ding in, i dah pih mahmah ahihi. Tua tawh kiton in, ngaigsunna athuuk zaw khgat hong leut ahihi.
Japan te pen tuni a leitungah akhangto gam le mite eng gam ahihna uh pen Tsunami hang ahi diam? peuh cih huai simsim ahihi.
I theihsa tek mah bangin, Japan pen bang mah apiang khollo banah, ziin le tuihual, huihpi guahpi in, anawk diakna gam khat ahihi. Hi banga natural disaster tuakden uh ahihman a, kithutuak, kuhkal le khangto uh ahidiam cih huai ahihi.
Banghang hiam cih le, ziinpi le tsunami tuihualpi khong a om ciang, azawng ahau, tua beh tuaphung, apil ahai, tua khua tua veng cih khen tuam neilo in, akiobanga nawk gawp ahihmanin, kithutuah loh phamawh, khat guak pangzawh ding hilo ahihi.
Ziin le tuihualk zawh ciang, kitu'nding kikna ah zong pangkhawm ngeingai kul cih ding ahihi. Bem pan kipan kik kul ahihmanin, mihing ngaihsunna khuak zong tathiaam kik hi leh kilawm hi.
Tutunga Tsunami zong asi aliamte tawh kisai supna lianpi a om tei sam hang, inn le lo,motor a kipan neihsa lamsate a sum hituanlo uh hi. Insurance company te'n lohkik ziau ding hilel uh ahihi. US a Kathrina huihpi nun lai inzong insurance company te sumh mahmah in, billion 22 bang liau lawh uh hih tuak hi.
Leitung le Zomi te in, tutunga Japante pen tuahsia abang uh hang, Tsunami zawh ciang kithutuahna hong khangto sem lai ding a, technology tampi hong phuan beh in, nidangsang azah tampi a, hong khangto zawsop ding cih pen muh sa ahihi.
Hi bang teng kawmkal ah, khatveivei Zomi le Zigam zong kum tampi hau lah haulo, zawng lah zawnglo, ZAWNGMANG a kum tampi i na om sang, ziin khong, huihpi guahpi khong tuak zeuhzeuh hi leng, tuni tu hun in, suaktakna le khangtona kingah khin zaw leh kilawm ahi.
Bang hang hiam cih le, motor khat kibunga mi 17 khong hong sih lel bek zong, millions 30 bang lengkhia pah hi, tua banah mipi palai Pu Cin Sian Thang beidong a, khat vei hong kap tangial a leh, WZC bang piangkhia pah ahihi.
Bangteng hi ta leh, tutunga Japan Tsunami tungtang ah, Japan a om Zomi te in zong, pasian huhna le kemna tawh i bitna, Japante thukhualna le politics hoihna tawh, hi bang hun ah, ann ngawl le pampaih lona, cih teng tawh ei suak ta sam hang e, ci a lungkimlo a, mite'n a dongtuak uh ciang, bangci lungsim pua?, koici panlak uh, mimalmal lungsim puak bangci, cih khong Zogam le leitungbup a om, Zomi te hong hawmsawn le uh zaknop huai mahmah ding ahihi.
Gam le lei in dong atuah uh ciang, kei suakta peuh leng, midang teng bangbang asuak uh zong phamawh kei, cih bang lungsim a nei uh hiam, hong kan dih vevua.
Tutunga Tsunami in, Japan kianiam sak ding hiam, ahih kei leh khangto sak zawsop bilbel ding ahiam? cih bel mailam ah, ento lai ding a hihi.
No comments:
Post a Comment