Pu Gin Kam Lian a ding thungen ni

Tuni  April 11 ni in, Zomi yahoo group Zonet ah, Pu Gin Kam Lian, General Secretary, Zomi National Congress pen, Kawlgam pan Zogam hawh ding  a zinlai, Khawlpi khua ah cidamna lam buaina tuak ci in, Pu Khen Za Sian in gelh ahihi.

Pu Khen Za Sian in agenzomna ah, amah pen Zogam Khawlpi khua RTC venga Pu Gin Heh Lian inn ah zintung hi in, hopih  lah dektak phial ding in, a pumpi hong thaneem hi, ci in report ahihi.

Pu Gin Kam Lian pen Zomi National Congress hong kiphuan a kipan, lungkia lo a nopni dahni le azu aham nuai ah,  citak tak a pang tinten pasal hangsan khat ahihi.

Adiak in Pu Gin Kam Lian pen ZNC sungah thugen siampen le Zomi Federal State  thu , mipi tel dinga gencian siam mahmah khat ahihi. Akhawlui Buanli khua hi in, Zomi mihau innkuan sung pan piangkhia in, mimal khantoh nang bek tawh kipek hi leh, mihau milian asuah zawh sawt mahmah ta ding ahihi. Zomi Yangon teng masa pawl ahihi.

Ahizong in mimal hamphatna sang in, Zomi le Zogam maakhua khualna tawh,  gentheihna  lampi a teel zaw Zomi hangsan khat ahihi.

Tua hihmanin Zomi makai Pu Gin Kam Lian thungetna ciat ah phawk tek ding in, Zomi akuama peuh i kicial ahihi.