Shan le Kawl kikapna

Shangam Lapi

Shan State Army- North le Kawl galkapte kikapna ah, kha nih sungin Kawlgalkapte 300 kiim a si le liam om ci in May 6, 2011 ni in Shan Herald Agency for News in report gelh hi.

Kawlgalkap sawltak BGF paltan tumdinga, Kawlgalkap te'n asawl uh tawh kisai, Shan Galkapte utlo uh a, Shangam suahtakna mah deihzaw uh ahihmanin, abeisa kal 7 val a kipan, SSA-North le Kawlgam kikal kikapna nakpi tak a kipan kik ahihi.


Shan State Army pen May 21, 1958 kum a Shan khangno 39 te'n aphuankhia uh ahihi. Acil in " Noom Suk Harn" Ahangsan Khangno Galkapte kici uh a, anungciangin, Shan State Army- SSA ci in, amin khel uh ahihi.


Panglong Ciampelna Lashio Thein Aung Laphuah

Hong nusiasa Pu Chaozang Yaunghwe ( Canada) in chairman sem in, hat mahmah ngei uh ahihi.

Anungciangin Ideology le galvan ngah nang tawh kisai, ngaihsunna kibanglo in, phel 3 kisuah uh ahihi. Pawl khat in Thailand base a US le nitumnalam tawh kizom nuam zaw uh a, mallam a te in Communist Party of Burma le China tawh pangkhawm a, communist te'n galvan apia ziahziah dawlnuam uh hi. Tua a kipan President Chao Zang Yaung Hwe makaih Pro West pawl le, Galkap mangpa makai pro communist pawl kikhen uh ahihi. Anungciang in phel tampi kisuah beh lai hi.

Tua bang dinmun pan nakpi tak in, kikaikhawmkik uh a, kithutuahna damdam in hong neithei kik uh ahihi.

Tulaitak SSA 3 om in SSA-South, SSA-North le ESSA-Mongla or NDAA zong kici te ahihi. Mongla le North te'n Kawlmang tawh ceasfire alak zawh uh kum 20 valta mah le, National Convention ah Kawlmang in Federal Constition thusun pomlo ahihmanin, kiholem theilo uh a kikapkik uh ahihi.

SSA-S te leuleu pen SURA le SSA simlam teng kipawl a kiphuankik hi in, Kawlmang um ngei hetlo pawl hi a, 1996 kum a kipan Kawlgam ado ngekngekte ahi uh hi. SSA-S vai a 2000-01 kiim in, Thai le Kawlgam bang kikap lawh ngei uh ahihi.


Panglong Gal

2008 Constitution pen Panglong Thuciam banga, Federal Constitution a gelh ding Kawlte utlo ahihmanin, SSA-N le ESSA in zong SSA-S tawh pangkhawm a, Kawlgam dokik ding dinmun ah tungta ahihi.

April 30 ni a kipan SSA-N makai khempeuh in, Shan ngeina le Buddhist biakna tawh kituaka, a kha uh apasian uh apna aneih laitak uh hi in, tua pen ni 7 sung sawt ding kici hi. Tua zawh ciang in SSA-N in zong tuma sang nasia zaw in Kawl gamkeekte thukkik ding in, kilamen ahihi.

Tulaitak ESSA le WA galkapte pansan ahi ,Lao gamgi a camp nih kiangah zong Kawlgam galkap tawh kikap dekdek hihtuak hi.

Shan State simlam teng pen 1996 a kipan kikapna omden in, mallam ah pen nung kha 2 a kipan kikapna kipankik ahihi. Nisuahnalam a ESSA tawh zong kikap taktak kik ding dinmun ah omta ahihmanin, Shangam le Kawlgam kikal galpiang kik taktak ta kici thei ahihi.


Zogam galkap Zomi Revolutionary Army-ZRA, Chin National Army- CNA le Kuki National Army-KNA te'n bel kap ding maw kaplo ding cih ki thei nailo ahihi.