Zanni (sunday) sun thapai Zozum meeting tu khin ciang, lum dinga ki thawi laitak zan 11:30 kim khong in, kong hong kikieukieu in, kua hi peuhmah ding ahia? migilo khong ahidiam ci a, tawlet pan ka en sim le, kavengpa Falam Zomi pa na himawk in, kong hon a bang thu om ei hia lawm? ka cih leh ka zi nausuak kuan agilna sa in, case worker te lah kiphone theilo zato ah nong paipih thei dia? ci mawk hiau ahihcianga, zingciang nasem kuan ding ngap lo pipi in, Summa Hospital ah kava kha hi. Nupinu pen sunlam pek a ana kipan khin pipi, pum thuakthauk a anatluat mahmah ciang, genkhia pan dan na hi mawk hi.
I le ai le ci in Emergency ah paipih in, ka va register uh leh Due Date cik ni hiam hong ci in amu ka dot le, Malaysia ah doctor te'n ni 6 ni ding ci in, US doctor te'n ni 9 ni ding hong ci uh ci hi. malaysia a te genhoh dikzaw hi leh kilawm hi.
Form tuamtuam fill up zel, room khat tung leng dotsa teng hong dong kik zel, dept dang khat tung leng gensa bawlsa teng genkik zel, cih bang teng tawh hun hong beibei in, atawpna ciang hong zo thei sam uh hi ding hiven, delivery room hong puaksak in, zingsang nai 3:30 in nau pasal khat hong nei thei uh hi. Nau neih khit ciang ahih ding teng uh hong hih banah, nurse te'n hong vilvil mawk in, zingsang 6:30 hong sat petmah hi.
Nai 9:00 cianga nasem thak ka apply pen drug test le sign thuh ding a paikul in, ka va pai le mun nih a paikul in, amun nih a kazawh uh ciang, sun nai 11 hong sat mawk ihi, nai 24 sung ki ihmu kha nailo suak hi. Mit bang taak kei in, kumthak khekleh ni mah bang milmel keei hi.
Bangbang hi le piang mahmah kei ci in, refugee agency ah kagensak khit ciang, inn ciah a ka ihmut le ki ihmu thei nawn mello mit sisi pong in, anung ciang bel nai lang tang ding khong kiihmu man bilbel hi.
Tunibup nasem akikuanmanlo hi mawk aive. Zingsanglam a bel phone tawh kagen hiven bang aci diam? zingciang kithei ding cih ding hi.Nasem lah kikuanmanlo ahihciang ci in, kamphenman le buaipih man beek va kingen le ci in, agency ah form la in nitak nai 3:30 ciang zato kavapai le, zato te'n limtak sign hong thusak bilbel in, nitha tang ding bel kidim kik ding hihtuak hi.
Kamphen ci dihdih leng, ka tuncillam a pauthem khong mangkhiat thei zaw deuh ci in, kamphen part time hong semsak mah uh hiven, nai kaht 12 bek hi in, innkuan khat a ding hi thei mahmah lo, full time nong piak kei vua le tawp ning ka cih le, mitampi pau tampi kisam ahihcianga, full time hong pia zolo hi ung, Zomi na tam uh ciang part time pan full time hong pia nung, ci phingphing a katawpsan sa ahihi.
Nunglam deuh in Columbus a Zomi Innkuan makai Pu Paupi in hong deihsak in, Cleveland ah mun khat awng ci in, ka vapai le Kawlgam mi limlim a dinga,, kisam na hi in nai tha ka kiho uh le, nai khat 15 ci in, 15 tawh bel Akron pan nisim hong kuan vangvang zo kei ning ka cih le, 20 hong pia nung cisam in, ka nung ngaihsun ciang 20 ahiphial zongin, nai khat zong kingah loh ni tam mahmah ahihciang, ci in ka contact kik nawn kei hi.
Ka company nasem mah semsem a ka om lai tak, Tonzang township lam pan Zomi pihte khat hong tung in, kamphen tawh kisai kha thum sung bang medical check up bawl theilo in, om niloh uh hi.
Khatvei azi Zopau losiah paudang khat zong theilo hong buai in, emergency ah kava paipih hong kul leuleu hi. Refugee Agency te'n zong kisuang uh hi ding hiven, Interpreter ID le form teng hong pia in, ni dang ciang hibang a om kik le, hong huh zel in tua formte zatote sign na thuhsak peuh lecin, nai khat 25 tawh kong tuat sak kik ding uh hi ci in, tua a kipan kamphen cih lian lah hilo, hilo cih ding lah hilo khat in, ID khat tawh Zomi sung ah emergency a om ciang a buai pih kik zel ka hihi. Zanni a zong tua mah ahihi.
US pen abuaihuai na ah i mipih sapihte i awlmawh ta zonga, ei khe tek a kiding himawk in, nasemna pan khuan la mun lenglah companyte nuam mello in, tua bang in va panpih zel keilenglah kiphunsan keei hi mawk in, baih lo veve cih ding hi.
Khatvei khong refugee agency te tawh kinawk kul kha thei ding daan hi. Nunglam a alian penpa zong Karen te'n mun 3-4 khong ah sandah apiah vua leh, kilawnkhia pah lian hi. Kamphente nai thai pen 12 bek pia in, adangteng a gilpi ah guang hihtuak hi.
Interpretor khong bel full time ngah phial zong in, lunglut huai taktak samlo hi. Nidang cianga a cimang lel ding khongte, va buai pihpih peuh tawh kibang in, gam thu nam thu lah thei mello, tawta lule pian vive tam in, refugee ngah bang pen, amah le mah tei kisa, US le gamdangte akhemzo akisa piannong bang tam simsim hi.
Ataktak in cileng US le gamdang te'n UN khong a, i case gente hong um pah uh hilo in, i gam le i nam dinmun hong en uh ciang "eligible" asakna uh piiciang( Criteria) khat nei a, hong pompom uh ahihi.
Ei kiteeisak khong tawh khemzawh dingte hilo uh ahihi. Zuaukhem Sitna Set ( Lie Detector) kici set pen, i khutme khem peuh ah, hong thuah uh henla, thu hong dong le uh, ziau i gen a leh dawkmang khin pahpah ding ahihi. Zomite pen a minam a nenniamna thuak dan a hong theih man vua, Zomi huamsung teng hong pom uh hizaw hi. Tua hi kei le Embassy interview khonga nu min pa min, suahni suah kha nangawn mangnilh/theinawnlo bek tawh zong, Lie Detector zang kul kilkel lo a, hong thei khin lel uh ahihi.
Tulai internet khong a tawta lule khenkhat, pheng hamham tepawl i lungsim sungah hong dawkkha a, i gelhkhak mawkmawk ahihi.
Zomi atamzaw 90% pen mi te'n hong pakta mahmah in, nasem zong ki kuhkal mahmah hi.
Ihmut cimloh tawh kiguitam kha mawk in, kokianga Zomite bel dik thei mahmah leuleu uh hi. Falam, Khalkha, Tedim cih bang kikhenlo in, pang khawm ngeingai ka hi uh hi. Kitawm lai zong bel hi mai thei sam hi. Zomi te bel group khat khong hong tam pian le, kituam pai pian pah in, eitum tak tek tawh "ekluak pawikhaam" mah kibang luih luih thei ahih ciang, ka cihna hi.
Tu ciangciang bel kokhuate na hoih lai sam ung ei
No comments:
Post a Comment