Breaking News: Mut Pu teelna April 01, 2012 ah om ding

Report By
Tg. Kim Puang


Thuthang kizakna ah 2010 Mutpu Kiteelna ( 2010 Sham Election)  pan a,  Minister (Vuangyi) ngahte mun awng teng hudim ding,  Mutpu 48  kiteelna pen April 01, 2012 ciang om ding  hi, ci in  Norway siksan  Democratic Voice of Burma- DVB website ah tuni in kigelh hi.


Galkap Election Commission in State leh Division Commission te kiangah zasak khin ta hi,  ci in DVB in Commission member khat adotna ah tua pa in gen ci hi. Official in bel asawtlo a hong kipuangkhia ding hi, ci in tua report ah kigelh hi.


Tua DVB report mah ah Mutpu utte in January 31, 2012 ma a,  Mutpu utna lai ( Nomination File) piak kul ding ci hi.

Thuthang kizak behna ah Suu Kyi makaih Kawl NLD leh niikmong len party khenkhat zong, tua Mutpu kiteelna ah lut sawm uh cih kiza hi. Tutungin Pi Aung San Suu Kyi zong amah mahmah  kiteelna lut sawm cih kiza a,galkap te'n zong amah mimalin  zo sak dinga zong ki lemen ahihi. Pi Suu Kyi pen galkap te'n hong teel taktak vua leh, numei ahihmanin Mutpu kici theilo ding a,  Mutpi cih kul ding hi ci'n Zomi ciamnnuih hat khenkhat in gen uh a nui zaizai uh hi.

Thein Sein Puante'n a luai USDP leh party neensi teng leh Suu Kyi Niikmong len NLD leh party dangte kimaiphut ding ci in,  Zomi  khenkhat a mu nuam in lawp khol mahmah uh hi.

2008 Constitution in  Zogam leh Zomi rights teng hong khaktan cih thei gegu pi mah in,  Zomi khenkhat kitulmawh mahmah uh a, mipi te'n mitdong sa mahmah uh cih zong kiza hi.