Internet humpi ahi Google te'n zong Apple iPhone 4S demna in, Google Galaxy Nexus kici smartphone thak bawlkhia khin ta uh a, Verizon tungtawnin zaandeuh ciang kilei thei ta ding cih kiza hi.
Galaxy Nexus phone pen google te i mobile Operating Software -OS ahi " Android Software" lak ah, anunung pen ahi " Android Ice Cream Sandwich" kithuah ding ahihmanin, Mobile phone pakta phadiak te'n ngaklah mahmah uh hi.
Tutung a hong suak ding Galaxy Nexus phone pen, official a hong kihawm khiat ding hun pen Verizon in pulak nailo hi, ahihangin mitampin December 15 ni a kihawmkhia dingin lamen uh hi.
Thuthang kizakna khat ah Verizon Store, Bestbuy Store leh store khenkhat ah tung gai khin ta a, mi khenkhat in zong va lei khia thei man uh hihtuak hi. Ahihhangin asawtlo mah in Verizon Company te'n text massage khak uh a, tua Nexus phone te store ah piakik dingin Verizon in ngen kik hi.
Galaxy Nexus pen bangzah man ding cih Verizon in agenkhiat nailoh hangin 299 khong man dingin ki ummawh hi. Mi khat in Bestbuy pan 250 tawh leikha man kici hi. Galaxy Nexus deih te'n Verizon kum 2 contract tawh lei thei ding kici hi. Contract lo in bel 749 khong man thei ding ci'n kiza hi.
USA ah official a kizuak ma in leitung mundangte ah, November kha pek pan kingah ta a ci pawl zong om hi. Australia ah bang mobile iit te'n store ah min piakhol zawzen hi.
Tutunga Galaxy Nexus thak ah Google Wallet zong kithuah ding ci in ZDnet in gelh hi. Google account tawh sum khak theihna ahi " Google Checkout" pen nungdeuh in Google Wallet ( Google Sumbawm) ci in google in amin khek uh hi. ZDnet thuthang a dik a leh bel Nexus mobile tawh ut nana sum kikhak thei, van kilei thei ta ding cihna hi.
Google Galaxy Nexus leh Apple iPhone 4S te, mipi kituh a hong kitalsik ding uh ahihmanin, smart phone man zong mailam ah tulai sangin hong kiam zaw lai ding hi, ci in mobile phone haipih Zomi khangno khat in Zomi blogger kiangah a mangmuhna kholhna gen hi.
No comments:
Post a Comment