Zomi Independence Army mun 300 kihong

Source muanhuai mahmah pan kizakna ah Zomi Independence Army in galkap behlap ding ci in kiza hi. Tuabanga behlapna ah amasa in galkap 300 kila masa dinga, 2012 sunga kisinna kipan ding cih kiza hi.

Zomi Independence Army and Karen Soldiers.

Tuabanga galkap lak na ah anuai teng kisam hi.

• 1. Kum 18 cing khinsa hi ding.
• 2. Zolai gelh, sim, tuat thei hi ding.
• 3. A ma mimal khensatna leh sia le pha theihna tawh lut hi ding.
• 4. A cidam mahmah mi hi ding. Beng ngong, Mittaw, Khelbaite ki lalophot ding hi. Lungsim cidam zong ahih ding.
• 5.Team kipawlna tawh nasem thei, nasem nuam hih ding. Zaa leh bawk sang vaipuak kithupi bawl zaw ding ahihmanin, zaa le bawk lunggulhte ki deihlo ding hi.
• 6.Galkap ngeina mawkmawk ahilo Guerrilla Strategy leh Tactic te sinnuammi hih ding.
• 7. Training zawh ciangin Training Centre  a hanciamna leh kivakna en a, vaipuak kigua'n bek dinga, mawk zakhan cih bang omlo ding ahihlam theih kholh ding. 
• 8. Belpawl galkap teng tawh pangkhawm a, Kawlmang khansiate phualpi ahi Pyinmanar Neipitaw khawpi, lakzawh khit zawh bek cianga, Irrawaddy guunpi  kantan a Zogam kilut pan ding ahihi.
• 9. Background Check limtak kibawl dinga, galte mi le sa hong kihel loh nang ki sittel ding hi.
• 10. Nu leh pa Zomi siang sitset hi ding. Tutung in kahbya (Mix Blooded) ki la nailo phot ding.

• 11. Kawl galkap semngei kideihlo phot hi.
• 12. Zopau pau theilo kideihlo hi.

Zomi Independence Army at Eastern Burma

Atunga thute  a thukim Zomi khangno kumcing  18 tungsiahte bawng, beh, pau, khawk, numei pasal, azawng ahau leh biakna cihbang khentuam omlo a, akua mah peuh Zomi Independence Army ah lut thei ta ding hi,  ci in  Source muanhuai mahmah  pan kiza hi.

Tutunga galkap kido'nna pen sum le pai, avui atang omsa tawh kituak a, kivaihawm  ahihmanin 300 ciang bek kila phot ci hi. Ahihhangin atam pen 500 tan ciang zong kisang thei ci in kiza hi. 

Source muanhuai mahmah dang khat pan kizakna ah, Zomi Independence Army leh Galhang leh Galhat mahmah minam khat kikal,  kiho khawmna kician khat November kha sung in nei uh a, tua kihona tungtawnin belpawlpih ding tua minam te'n Central Committee Meeting sam uh a, tua meetinga limtak agenkhawm khit uh ciangin, Zomi Independence Army tawh asia apha khempeuh nawkkhawm, kithuahkhawm dingin amau zong thukim uh cih kiza hi.

Zomi Independence Army 

Tua kihona tungtawn in Zomi te'n galhangna, galsiamna sik dinga, belpawlpih te'n  galvan le akisam dang teng sik ding uh ci'n Source in December 10 ni in gen hi.

Zomi Independence Army lut ding te'n bang ci panlak a, koi ci kizop ding cih geel khit sa in om ta a, asawtlo in lampi hong kidawk sak toto   ding hi, ci in ZIA lam te'n gen  ci in Source pan kiza hi.

( Ciapteh ding- Hih thu pen source muanhuai pan kiza ahih banah, Zomi le Zogam a ding thu phamawh khat ahihman bek a, hong kikhah sawn hi. Athucing pen galkap kaikhawm khit ciang ZIA in a kicingin hong pulak ding uh hi,  ci in Source in gen hi.)

References:

Indo-Burma Border  Librated Area Sources.

Sino-Burma Border Sources.

Thai-Burma Border Sources.

Bangladesh- Burma Border Sources.