Kawlgalkap 30,000 kiging kik

 Thuthang kizakna ah June 09, 2011a kipan, Kachin leh Myanmar kha 7 sung vingveng a kikapna vuah, Kawl galkapte lawhsam uh ahihmanin, tu'n Myanmar in  galkap 30,000 val kaikhawm in , alawhsapna teng uh loh kik dingin, KIO khawpi Laiza lakzawh sawm uh a, major operation pi khat patsawm kik uh cih kiza hi.

Kachin te'n Myanmar Helicopter khat kapkhia, a pilot si  in a Helicopter man uh.

Kachin-Myanmar Gal kha 7 sungin, Myanmar galkap 3500 val si  ci in, Myanmar Galkapte Blog khat ahi Opposite Eyes ah kgelh hi.

Kachin News lam pan kizakna ah kha 7 sungin Kachin Independence Army camp lian 7 bek Kawl te'n lazo uh ci hi.

 Myanmar gam  te'n Kachin gam  abuluhna uh ah, KIA leh Kachin mipi in singam in, na  do kik uh ahihmanin, Myanmar Army battalion 130 val ava kuan uh hangin, zozo mahmah lo uh hi, Myanmar Army zum leh  thangpai te'n, Kachin mipi mawhna neilote,  bawlsia gawp uh ahihmanin, Kachin mipi 50,000 kiim galtai  uh hi.

Tulai tak Kawl biakinnhal kumpi sung,  buai mahmah kici hi.  Nunglam a US Secretary of State Hilary Clinton hong pai lai in, Kawl te'n  Kachin gam  a buluhna uh,  khawl dinga, Hilary i ngetna pen , tuni tan lawh cinglo ahihi. Thein Sein in Kawl galkapmang Min Aung Hlaing kiangah, operation  khempeuh khawl dinga,  thu apiak hangin, Min Aung Hlaing in tuni tan  manglo hi. Thein Sein in thu apiak zawh kikapna lian 100 val om hi,  ci in KIA in pulak hi.

Tua ahihmanin, tulai tak a minpha ngah mahmah ,pheituam suah Thein Sein leh USDP pawl maimial  ta uh a, leitung in zong mawhsak kik pian ta  ahihi. 

Kawlmang sungthu  hiibang dinmun ah om  ahihmanin, Kachin gal pen azawh vet kei vua leh, USDP leh Myanmar Army sung,  buai thei ding dinmun a tung khak ding,  lau uh ahih manin , KIA phualpi lakzawh nangin,  galkap 30000 val kaikhawm uh a kisan kik  uh ahihi.

KIO leh Kachin te'n bel, Panglong Kamciamte a  lawhcing masiah, ka dual hetkeikei ding uh hi, ci in pulak khin uh hi. 

Hibangin Kachin-Myanmar  kinawkpina khat,  hong om kik ding ahihmanin, dongtuak leh galtai zong, hong  kibehlap lai ding cihna ahihi.  I  Christian pih leh Mualgmi pih ahi unau Kachin te ,  Zomi te'n  taisan lo a,  i pangkhawm ding kisam hi.

Kikap pi pen tukum 2012, khawkeu sung  January leh May kha kikal a, hong om dingin ki lam-en hi.

References

1. Kachin News Group

2. The Power of Fraternity

3. Irrawaddy Magazine

4. Voice of America

5. World Zomi Congress