Kawlte Gawt Lai Ding

Photo: US Embassy, Thailand

Thuthang kizakna ah,  Kawlte tunga Gawtna kipia pen, tu le tu in kikhawl pak nailo ding hi, ci in US Congress innpi a vang nei mahmah, Republican mipi palai John Mccain makaih, US Innpi palai Kawlgam hawh ding te'n, Bangkok a  abawl kholh   uh,  Press Conference ah January 21, 2012 ni in gen uh hi.

Tua US mipi palai pawl ah John Mccain, Lieberman, Kelly Ayotte leh Sheldon Whitehouse te kihel ci in kiza hi.

" Kawl kumpi in kikhelna bang tan bawl sawm, bangciang bawl khin taktak cih thu leh, USA in Kawlte Gawtna apiak uh, etkik huai hiam, huailo hiam? cih thu kankhiat nang  Kawlgam ka hawh uh kul ahihi" ci'n Mccain in Press te  gen hi.

April Fool Day ni a kibawl ding by-election tawh kisai " By Election ah suakta tak a, mipi in vote apiak theih uh leh, ki pakta mahmah ding a, ahihhangin Sanction bel thakhat thu in ki beisak saisai nailo ding hi." ci in Mccain in genbeh hi.

Lieberman in bel " Kikhelnate nungkik nawnlo a,  khamuang huai mahmah dinmun atung bek ciangin, Gawtnapi ki khawl pan ding hi." ci in gen hi.

Kawl kumpi in January kha kipatlam in,  thudik deih a khumcip thuakte khahkhia ahihmanin, US in letsong no khat piakna in, Kawlgam ah Ambassador khat koih ta ding, ci in pulak hi.

Thudik deihte khahkhia khin ta ka hih man un, nong gawtnate uh khawl sak ta un pute aw, ci in Washington Post Newspaper tawh January 17, 2012 ni Neipi Taw khawpi a   interview ah Thein Sein in thum daidai hi.

Tulai tak Kawlgam tawh kisai US policy pi pen Mualgamte tawh kisai hita hi.

1. Hilary Clinton hongpai lai a,  Thura Shwe Mann kiangah agen thupi penpen in, Mualgamte ava buluhluh nawnloh ding nakpi in gen hi, ci in Shwe Mann in Media ah gen hi.
2. Mitch Mcconnel hong pai ciangin zong, Mualgamte deihna a bucing masiah, Kawlte Gawtna kikhawllo ding hi ci khin hi.
3. Tutunga Mccain tepawl in zong, kikhelna bucing ka muh masiah uh,  Kawlte Gawtna kikhawllo ding hi, ci in Kawlgam zong lut nailo pi,  Bangkok ah genkhol uh hi.

Tua ahihmanin Zomi leh Mualgamte tulai tak i thasan hun ding ahihi.