Zomi Right to Self-determination leh Equality

Gelh ni
06/20/2012
Sun 12:00,
Eastern Time.

Zomite zong minam picing khat leh gam nei khat a pasian in hong bawl, hong siam ahihtawh kitonin, minam khat leh gam khat neih ding ahi Zomi Ki-tualvaihawmna Tanvo ( Zomi Right to Self-determination ) leh Minam  Liangko Kikimna (National Equality ) anei minam leh gam khat  ihihi. Tua bek thamlo in Annkham Khuan ahi Ann Tanvo ( Right to Food), tuikham khuan ahi Tui Tanvo ( Right to Water) akipan, hing khuan ahi HInna Tanvo ( Right to Life) leh mimal tanvo tuamtuam aneite i hihi.

Tanvo  cih pen hamphatna, letsong/present, bonus, hehpihna , deihsakna cih bang hilo a, i nu gilsung ah tuisik pan mihingah i pian a kipan i neihpah, ineihsa Pianken Tanvo ( Birth Right) ahihi. 

Gentehna in Britishte khut pan  Aung San in hong na khemkhia in, U Nu in lamkal pan na selsim , Ne Win in U Nu khut pan  damiah na taih , tua khit teh akhamval teng  Than Shwe in avek a hong paih sak, Aung San Suu Kyi in a themneng khat niinbung pan  tawm a hong piakkik sawm leh, Thein Sein in kei gamh hi ci a,  piakkik ding leh piakloh ding lung ngaingai tadih phot cih bang hi theilo hi.

Tanvo pen atangpi in  Mimal Tanvo leh Milom Tanvo ( Individual Rights and Group Rights)  ci in, nam 2 in kikhen hi. Right to Food leh adangdangte pen Mimal Tanvo ah lut a, Ki-Tualvaihawmna Tanvo pen Milom Tanvo in kiciamteh hi.

Gentehna in UDHR kici leitungbup in a kithukimsa, Myanmar/Burma in zong letmat athuh ahi Universal Declaration of Human Rights tanvote ah mimal tanvo leh milom tanvote i mu thei ding hi.

Mimal Tanvo enleng mihing khatpeuh in ann akham ding ahi, Right To Food nei hi cih thumeilet a nei in, gam kumpi vaihawm te'n a mipite uh annkham nang vaihawm sak kul hi. Gentehna in USA a Food Stamp, India a BPL Anntang ( Market ah 8-12 bang mante mihamsate Rs 3 khong tawh zuak )  i cihte pen, kumpi vaihawm minister, officer leh party te thusiam lua mahmah uh a, avaihawm sak uh hilo a, kumpi khat in a mipite annkham ding mawhpuak nei ,  mipi te'n annkham khuan nei ahihman a, piangkhia hi zaw hi. Mipite Ann Tanvo hipah ahihi. 

Tuamah banga mimal tanvo tuamtuam dangte zong tungsiahte thusiamna tawh kingah leh kipia ding hilo a, mipi mi malmal i pianken leh deidan theihloh tanvote, ahihzawk lam theih ding phamawh mahmah hi. Tulai Kawlgam kikhel a kicihcih hangin mipite tanvo bulpi lak a, niam penpen leh kisam penpen ahi Ann Tanvo nangawn a kivaihawmna, khat zong kimukhia nailo  hi. Kikhelna kicite gal-et in mipite dak hihei bek lai hi. Democracy ngahta ci a, utut a zauvak leh phengciak gawp khong Human Rights ngah kici lo hi. I gilkialna genkhia a, i kam hong kihum sawm leh, gilkial annduh a vaihawmte kiangah ngen a, hong kimat leh democracy akici pen nang a ding hilo a, apiak sawm uh pen nang leh mipite tung na hi phalo cih theih pah ding ahihi.

Hihmun ah tangpi tangta  te'n i mimal  tanvo dingte khat zong i ngah nailoh kawmkal ah, i milom tanvo ahi Zomi leh Zogam maban khensat sawm in, Kawlmangte hong kipan leuleu uh ahihi.

Amasa in Zomi Right to Self-determination cih genkhawm ding hihang. Mitampi a theisa i om mah bangin, amangkhiat thei nailo nangawn om i hih manin, them i suut ding hi.

Right to Self-determination cih pen eipau in abaih pen dingin  letkhia leng " Ki Tual Vaihawmna" cih ding himai hi. Tual Vaihawmna cih ciangin, Zomi leh Zogam tawh kisai vaisai, vaihawmnate ah,  minam dang kuamah hong kitulmawh leh kidaihlah lo a, ei leh ei i khangtoh masawn nang vaihawm thei ding cihna hi. Atawm pen i gilvah nang beek vaihawm thei ding cihna hi.

Gentehna baih penin enleng Zomi mi malmal right te hukdim nanga kisam teng,  Chin State kumpi in kaikhawm in, Plan hong gelh dinga, tua asumbei ding teng Union ah pualut a, i nget bangbang hong piak ding uh cihna ahihi. Mipi leh gam  kisapnate anuai pan dongto masa lo a, Hung Ngai kiangah hiteng sem unla, sum hihzah (Budget) zangun ci a, Naypyitaw te lukieuh suk ziauziau theih   dinmun pen, Zomi te'n Self-determination nei hang ei ! va kici thei lo hi. 

Naypyitaw Kawlte Self-determination hong kizangsuk hizaw a, Chin State leh akiim akiang teng ah,  eiteng vive mah khua leh tui ki-it sak  tek a, vompi buanpai zo ding keek banga,  i ki-et gemhgamh khemkhem pong hangin,   i thuneihna pen Autonomy no khat bek hong kipia na hi gige cihna hi.

Democracy leh Federal gam taktakte ah Mipi Palai-MP te'n mipite sungah vak uh a, bang kisam na hi uh hiam ci in, dong kawikawi uh a, tuateng ciamteh in State ah, Union ah ka mi kasa te'n hiteng kisam uh ci in palai sem uh hi. Tu ciangciang 2008 Nargis Constitution  MP teng enleng, Mipi Palai sangin  Muut Pu tam zaw cih i mu ciat ding hi. USDP leh Keuhbek party phualpite pan a humuap teng uh , hong muut sawn niloh lel uh hi.

Hihmun ah Self-determination leh Equality liangko kikimna hong kimekmat to leuleu hi. Chin State in i taaksap teng State Budget ah guang a, Parliament ah i puaklut ciangin, Kawl tamna Innpi Dawlnuai Pyituh Hluttaw leh Mualgam tamzawkna Amyothar Hluttaw ah kigenkhawm ding ahihi. Pyituh Hluttaw ah Kawl tam zaw ahihmanin, hong haza den ding uh a, hong dalden ding uh cih theihsa ahihi. 

   

PH a hong nial uh pen Dawl Tungnung Amyothar Hluttaw-AH ah ki pangkik thei leuleu hi. Federal Union liangko kikimna ( Equality omna) hileh State kim pan palai kikim kisawl ding a, Kawlte Division 7 cih bang om theilo, minam khat bek ahihmanun, Minamkim in palai kikim nei ding i hihmanin, Mualgam huhau tawh Chin State budget i deih zah kilui ki pass theihna lampi om cihna hi.

Zogam leh Mualgam Budget leh Rights dangdang te tawh kisai PH leh AH kinialna hong om leh, PH leh AH tukhawm ding uh a,  tua pen Pyithaungsuh Hlutttaw-PTH kici in, tua pan vote mee tawh khensat ding ahihi. USA leh Federal gam tampi te ah State neu leh mi tawm state tampi in , hibang Federal System phattuamna hangin, angah ding zah uh tanvote ngah uh ahihmanin, singdang gamdang kuamah lungleng lo in, daitak in nungta khawsa uh hi.

Tulai i Kawlgam paidan en leuleu leng Chin State Budget kisam zah a kinget ciangin , Kawl te'n ciamnuihna khongin, Chin kong sak uh leh Taung na himawhk uh ciai, cih san in lau hiaulo uh hi. Banghang hiam cih leh AH ah State khat in palai 12 ta nei in, tua zong 3 pen kawlgalkapte hisak uh hi. State 7 in palai 12 ciat bek nei napi, Kawlte Division 7 kisuah uh a, palai 12 ciat neisak uh hi. Tua palai ah mipi teel leh mualgam pan ate atawm zaw hong hi in, kawl leh kawlgalkapte mileh sa atamzaw hong hi zaw hi.

Tua ahihmanin mimal tanvo, milom tanvo leh liangko kikimna i cihcih te pen gentuam theihloh a atonkhawm ahihlam i theih ding thupi mahmah hi.

2015 ma a Neipitaw khawmpi kici ah mualgam tengin AH ah palai kikim neih ding leh, AH leh PH thuneihna kikim ding hong sung khia ngeingei ding uh ahihi. Shan, Kachin, Karen, Karenni, Rakhine, Monte keeksa a, tua hun ngak a, om dimdiam khin uh ahihi.

Zomi te sungah Federal leh Equality Champion CNF leh ZCD policy thak leh kalsuan daante i et leh,  kuaman i phawkhak loh kal a, Federal vai na sehsan khin uh hi leh kilawm hi. saseh athemthem a inn lusi ah hong phum sawm uh na hi seisai leh kilawm hi.

Bangteng hileh Sustainable Development kici,  a detdo khangtohna i ngah theih taktak nang pen mimal tanvo, milom tanvo leh liangko kikimnate a om mahsiah, om theilo ding ahihmanin, mipite keeksa a i om ding hun hong tungta ahihi Kawlte political ambush kithuakhin tawh kibang hi. Tu ta i baih leh Federal Thusun ah Zomi kihel tuaklo bek thamlo in, Mualgam dangte khemna ah Zomi Zosuante hong kilehzat sawm zaw leh bang kilawm phialmawk hi.

Bangteng hileh ahun omlai in, ZCD leh CNF in sawmna lianpi nei gieuguau a, politic kimawl uh hidingin, koihsak phot ni.

Ahihangin Zomi mipi te'n mit hak sinsen , bildawh gige a , i pilvang hun ding pen, tulaitak lian ahihi. Deih hong bat kei leh mipite pangkhawm zuazua a,  ma i lak hong kul kha pel mawh ding ahi cih iki zasak khol ahihi. 

Tedim Kampau tengin UT ngen leng, Cho, Khumi, Lai, Mara kici tengin zong ngen ngeingai dingin, UT piakgaih cihlah om theilo, Autonomius Region acih 2008 Constitution sunga kigelh pen, hong pia ngeingai dingin, i State Status mansuah ziau ding hihang. Eibek nget theih tuan hilo hi. State i mangsuah keizong tua Autonmous Ginalo hawm ngeingai a i om lai tak, mualgam state dang tengin, status sangpi nangen ding uh a, eipawl niipniap Nargis State tawh cian lenghlangh zel ding hihang.

CNF banzal enleng zong Law theipen a kigenpa muinam themcik a tah ziauh uh leh, meikhup zenin, neipitaw zuan a, zekai khaleng, mi'n hong tuhkhia man kha  un teh,  aci keek bangin, tailut vingveng hi. Ama khawk leh bial, namke te a ding deihsak tuam bang  , hong kineih ding uh a, shorterm development project khenkhat khong, hong  ngah sam ding uh a, ekluak pawi-kham bangin hong ai-luai-luai ding uh hi. Tua kawmkal in, Zomi/Chin te Federal  State Status pen Kawl ten liak tum ding uh hi. 

Kachin te'n bel Federal mah adeih manun kikap khawl sung Kawlte leibawlsak 100 val kapsat kik ziau uh hi. Wa te'n zong square mile 8000 sunga khawpi 6 leh khawta atul a simte  development khempeuh sumhkik ngamin kiging uh hi. Tuamah  bang Mon, Karen, Karenni leh Shan te keeksa a om uh ahihi.

Hi tengteng buaihuai lialua in, ei leh ei siang vilvel in om ni i cih leh lah, Self-determination leh Equality khiatna dang khat om lai hi. Tualamte khiatna ah Self-determination i cih pen Sovereignty ( Achoke-acha Aana ) cihna hi ci leuleu uh hi. Equality cih ciangin Khutnuai Gamke ( Vassal States) te liangko kikimna kigen hilo in, Soverign State te liangko kikimna hi, ci ta leuleu uh hi. Tuabangta hi leh Zogam bang SAARC hiam ASEAN hiam khongah, liangko kikim a i lut zawh kul ding cihna hih tuak hi.



Ki-tualvaihawmna tawh kisai laibu khenkhat.

Diversity and Self-Determination in International Law (Google Affiliate Ad)

Rethinking Self-Determination (Google Affiliate Ad)
Institutionalizing the Right to Self Determination (Google Affiliate Ad)
Autonomy, Self-Governance and Conflict Resolution (Google Affiliate Ad)
The Quest for Self-Determination (Google Affiliate Ad)
Self-Determination and Achievement (Google Affiliate Ad)