Karen makai lianpi 3 kitawp sak

Kawl Sang-Ak palai Aung Min leh KNLA Gen. Saypho

Karen National Liberation Army-KNLA a zalian pen CS General Mutu Saypho, KNU Social Welfare and Relief Department makai Roger Khin, Department of Justice makai David Thaw te KNU Suppreme Headquaters in tawpsakna lai suaksak cih kiza hi.

KNU phualpi thukhun leh vaihawmnate tam veipi palsat den keei uh ahihmanin, kitawpsak hi ci in, KNU Asst.Gen. Secy Saw Hla Ngwe min tawh thusuah bawl uh hi.

Hih thusuah pen mipi lak ah ki pulak khia hi nailo  a, KNU CEC 11 kiangah kizasak phot cih kiza hi. KNLA Chief of Staff thak ding in, Brigade No.5 Commander Brigadier Kyaw He ki semsak kha thei ding ci in kiza hi. Tualo mun awng dang 2 zong asawtlo in ki hudim pah ding cih kiza hi.

KNU/KNLA Area of Operation pen Taninthari Div, Karen State, Mon State leh  Pegu Div  dong zai a, galkap Brigade 7 leh Civil Adminitration ki ukna Disrict 7 in khen uh hi.

October kal masa sungin KNU Congress pi neih sawm uh a, tutunga buaina limtak a suut theih kei uh leh KNU phel 2 kisuah kha thei ding cih kiza hi.

Tulai tak Kawl te'n KNU lam aho pihpih kawmun, galkaplam KNLA te atuamin zolsimsim uh a, KNU leh KNLA khenkhap sawm laitak uh ahihi. KNU Gen.Secy Pi Zipporah Sein pen a khualzin laitak hi in, General Saypho pen Kawl phualpi Yangon khawpi ah om cih kiza hi.

2003 kum ENC piangkhiat theih nanga KNU David Thaw ( Tuahunlai in Foreign Affairs len) , CNF Vice President Zing Cung tawh Aizawl khawpi Office khat ah kihona leh ka kikup  ngeina vuah, David Thaw leh Zing Cung te  pen sunglut nuam mahmah in pau khin ngei uh hi. Koteng 3 kikup khit ciangin Dr. Sui Khar tepawl hong lut laplap in, bangci  alem hia ? ci in nui phulhphulh in hong lut uh hi. KNU in CNF leh ZRO hong lemtuah daan a zong kinei uh hi nong hi. Milak a kilemlo i bat niloh sangin ci in, 2004 kum ciang ENC Chin State palai 5 ding lak ah Pu Thang Lian Pau ZRO President leh Pu Thang Len Piang kipiakhia hi. Tua zawh Malaysia lam a Refugee vai na khahkol sak uh hi. Nuam mahmah sam uh hi ding hiven cih ding hi. CNF naklah leepleep khatvei Oxygen bung khat kipia ngei hi. Malay Zomi cimoh teng khualna tawh cih zong kihel hi.

Tua zawh asawtlo in David Thaw leh Lian Hmung Sakhong in National Reconciliation cipongin, 2008 constitution phatna leh  Kawl tawh kilem ding gen uh a, tua thu KNU leh Mualgam kipawlna lian tengin azak uh ciangin, heh ngeingai uh a, hite 2 thugen pen Mualgambup thugen hilo hi ci in lai kisuaksak ngeingai hi.

Tua a kipan Mualgambup kipawlna lian penpen Ethnic Nationalities Council-ENC  a pumpi lang khat zaw in tuni tan baicip suak ahihi. Nunglam deuh in Lian Hmung Sakhon Chairmanship tawh hong hingkik sak uh a, kuaman muangzo taktak nawnlo hi.

Gamsung gampua Kawlgam Mualgam kipawlnate ah Zosuan te kihel sunsun, Kawlgalkapte Agent khonga mite muanmawh dinga, gamtat loh ding kidophuai ahihi.

Hunlui mi khenkhat  ginatlohna hangin WZC leh ZIA te koimah Alliance ah kilut sawmlo in, mikhempeuh tawh kisep sawm zaw ahihi.

KNU leh Karen gam in Kawlte tawk buaina pan hong suakta kik dingin i deihsak hi. Karen gam a om ZIA te a ding thu ngetsak ciat ni.