Gullu, Letpadaung leh Vietnam Napalm

Tusawng teng Kawlgam Monyua district huam sunga Letpadaung Mual 33 vai so litlit in, tu'n hong puakkham peetmah ta cih i za ciat ahihi.

Letpadaung Mual 33 a siksan ( Copper) teng China company khat tawh kipawl in, Kawl galkap company Myanmar Holding Company in tawh khiat sawm uh a, tua kiim  kianga teng  mipite kum 3 sung, nektawm ding piapak in, tua khit ciangin tengsak kik ding ci in, khem in hawlkhia uh hi.

Ahihhangin a nungciangin kum 3 sunga ding liau sum hilo a, kum 60 a ding hizaw ci in nung khem uh ahihmanin, mipite lungkimlo in lungphona nei uh hi.

Mipi lungphote Kawl Buddhist pastor siampu te'n va panpih uh a, gambup leh leitung theih phial a panlakna hong kipan  ahihi.

Hih thu genlem khawm dingin President Office pan minister Bo Aung Min in va delh in, mipite deihna adot khit ciangin, President kiangah kong gensak ding a, ni 10 khong ciang, kong dawngkik ding uh ci hi.

Ahihhangin ni 10 aci'n ma 29,11,2012 ni zingsang nai 3 kiim in, lungpho camp 6 te kawl galkap leh police in meikuang bomb zangin luh vat uh ahihi.

Tua bang a va luhna vuah Khitui Bomb ( Tears Gas) zanglo in, lamdang leh cikziat huai takin  meikuang thei tawh kihelh Chemical Bomb zang uh hi.

Tutunga Letpadaung lungphote liam ma leh, Vietnam gallai a chemical meikuang bomb tuakte liamma kibang lian ahihi.

Vietnam gal lai in Vietnam ah USA in Napalm kici meikuang bomb zang uh a, mi tampi in sih leh liam thuak uh hi. Tua US te Napalm Bomb thuakkha naupangte Video leh Photo, leitungah kehkhia in tua video leh photo mukha peuhmah in USA te samsiat uh hi. US mipi mahmah in zong awilo in, tua a kipan Vietnam ah galleh hong kipan uh kici hi. Vietnam pan ciah galkapte innlam atu'n uh ciangin, US mipi te'n mi bangzah vabuan , naupang leh mipi bang zah va that na hiam? ci in na dong uh a, kuaman pahtawi nuamlo uh ahihi.

 Anuai ah video ki en thei hi.

Tutung a Letpadaung mual lungphote zong anuai ah i taklang hi. KawL Galkap Kumpi in Gullu zong China zuakkhin uh a, asawtlo in hong to bei ta ding uh ahihi. Tuahun ciangin Zomi leh Kawlgilo kumpi ut ta kei leng, kinawk hong kul kha thei ding ahihi. Tua ahihmanin, gam leh lei a hum Letpadaung Mual Movement a kihelte a dingin thungetsak ciat in, i hih theih na tantran pan, panpih a , i thalawh kholh ding hoih ahihi.

Eihun ciangin eilam ah kuamah hong ding pihloh a eiguak i diang gawnggawng khak ding  pilvang khol ni.