KIA in Pangwar kemzo lai

Myanmar Airforce in Kachinland. Photo:phophtaw

Myanmar Army in tukum April, 2012 kha sunga akhahsuah uh, Pangwar Township khawk teng, KIA khut sung pan alakkik zawh nangun, galkap tampi tawh kuankikin sim uh a, ahihhangin lakik zo tuanlo uh ahihman in, Helicopter nangawn zangta uh hi ci in December 07, 2012 ni  Independent Mon News  Agency tungtawn in kiza hi.

" December 04 ni in Helicopter 5 tawh galvan, galkap leh annnek tuidawn puak in hong leng uh a, aciahkik lam uh ciangin, Kawl liam teng pua kik uh hi. Tua laitak in Hellicopter 2 in KIA post te kidalna in hong kap uh hi." ci in KIA tangko Pu Lang Nang in gen hi.

Vanlam pan zong simta uh ahihmanin, tulai Kachin-Myanmar kikapna ah Pangwar kikapna pen anasia penpen khat suak ta ci in kiza hi.

Thuthang kaihkhawmna ah December 01, 2012 a kipan, Myanmar Army leh Kachin ceasefire pawl ahi NDA-K pangkhawm in, Pangwar lakik ding in kuan uh a, tuni tan kikapna kizom lai cih kiza hi.

 

Kachin gam a Pangwar Township pen, Kachin pawl khat ahi National Democratic Army- Kachin ( NDA-K) te phualpi hi a, 2008 Constitution zawh ciangin NDA-K makaite 2010 kiteelna lut uh a, tu'n Myanmar  parliament ah tu uh hi. Agalkap lubok teng uh  Border Guard Force- BGF ci in battalion 3 kisuah in, Myanmar Army command nuai ah om uh hi. Battlion khat ciangin 300 kiim ta pha in, Kawl te'n khakhat in 100,000 Ks ta khasum pia hi.

April, 2012 a kipan KIA in Pangwar a Kachin BGF gal anntah teng leh Myanmar Army te buluh in hawlkhia uh a, tuni tan tua khawk kem uh hi.

Kachin BGF battalion 3 lak ah battalion khat KIA lam lut uh a, KIA battalion number 32 ci in ki minvawh thak hi. Adang battalion khat pen asi leh liam tawh bei uh a, tu'n Kawlnuai ah battalion khat bek om lai ahihi. Tua battalion khat om lai sun pen NDA-K president lui, tu'n Hluttaw MP Zakung Tingying in makaih zel in, Kawl gal anntah leh lamlak in om uh cih kiza hi.

Tulai in Kachin ceasefire pawl NDA-K, KDA leh Col. Lasang Aungwar makaih Kachin gal anntah teng leh, Myanmar Army pangkhawm in KIA a sim huan uh hangin, KIA beisak zo tuan nai mahmah lo  uh ci in kiza hi.