Ih theihsa mah bangin 2014 ciangin Zogam kihel in, Mualgam-Kawlgam kikal kihona taktak kipan ding hita hi.

Tua 2014 kihona hun ciangin ki koici ho ding, bangthu teng huamsak ding cih leh Hiamkham ( Ceasefire) thukhun leh Khona ( Dialoque) vai, Timeframe koi ci bawl ding cih tawh kisai November 04, 2013 ni in Kachin gam khawpi Myitkyina ah Mualgmam-Kawlgam kikup kholhna om ahihi.

Myitkyina kikupkholh ma in Mualgam teng Kachin Independence Organisation-KIO phualpi ahi Laiza khawpi ah October 30 ni pan Novemver 02, 2013 kikal tukhawm masa uh a, , mualgamte timeframe ding khat bawl khia uh hi. Tua mah bang in Kawlgam in zong a timeframe gelhkholsa in nei uh hi.

November 04, 2013 Myitkyina khawmpi ciangin, Kawlgam thusun leh Mualgamte thusun luikhia khawm a kikupna om hi. Tua munah Kawlgam leh Mualgam kikal time frame tawh kisai kithukim zolo uh hi. Tua huhau in Mualgam teng Karen gam Pha-ann khawpi ah khatvei kikum kik ding cih thu om hi.

Myitkyina khawpi kihona a Kawlgamlamte thusun lak ah, politics tawh kisai athupi teng anuai bang hi.

Zogam leh Mualgam te'n Inntuan a gamthak phutkhia lo ding.
Federal Army bawllo ding, Kawlgam galkap bek om ding.
Kawl te'n Kitualvaihawmna ( Self-determination) cih pulak lo uh a, Minam Liangko Kikimna cih kammal bek zang uh hi.

Tua banah Hiamkham ( Ceasfire) tawh kisai anuai bangin Kawlgam lam te'n lui uh hi.

Galkap camp thak phuan theilo ding.
Galkap thak kaikhawm theilo ding.
Galvan bawllo, leilo, zuaklo, kaikhawm theilo ding.
Sum donglo ding, siah donglo ding.
Galkap leh galvan neih zah list Kawlte pia ding.
Kawlte kap lo ding, mine siah lo ding.

Cih teng kihelsak uh hi.

Tua Kawlgam thusun pen Kawlte tavuan 3 ( Myanmarian Doh Tavuan Ayay Tone Par) leh gamthak satkhia lo ding cih tawh thukong hong uh hi.

Atunga teng hangin Mualgamte thusung tawh hong kituak theilo ahihmanin, Mualgam Lawmpi UNFC teng Pha-ann khuapi ah khatvei tukhawm kik phot ding cih thu hong om hi.

KIO Laiza khawpi a UNFC khawmpi leh Myitkyina a Mualgam-Kawlgam kihonate ah, United Wa State Army-UWSA leh Zomi Independence Army-ZIA kahlo uh hi.

2013 December ma in Kawlgam-Mualgam kikal timeframe teng kiho siang dinga, 2014 ciangin gamthu gamla taktak kikupna ( Political Dialoque/Conference) kipan ta ding ahihman a, Myikyina ah kiho daan ding kiging kholhna bawl uh ahihi.

Tutung Kawlgam-Mualgam kihokhohna ah UN palai Nanpya ( Vijay Nambiar) leh China palaite avil dingin kihel uh hi. Myanmar lam pan Gen. Myint Soe ( Thankik) kuan cih kiza hi.

Zomi te'n bel Mualgam-Kawlgam kihona sangin, Zogam-Kawlgam kihonalam ( Zogam-Myanmar Dialoque) ki lunggulh zaw ahihi. Wagam in zong tua daan lunggulh cih kiza hi.