Tulaitak Thailand gam pen Thai galkap te'n uk uh a, Myanmar Refugee 130,000 Myanmar ah puakkik ding hi ung ci 'n Thai Army makai Prayuth in Julyy 12 ni in pulak ta ci in Bangkok Post in July 13 in gelh hi.
Myanmar Army galmang Min Aung Hlaing Thailand 2 vei hawh ta a July 04, 2014 ni a 2 vei hawhna ah Refugee vai nakpi in kikupna nei uh a tua zawh hi thu hong om hi ci in Bangkok Post in gelh hi.
Thailand ah Refugee Camp 9 UNO in hongsak a galtai 150,000 kiim om ahihmanin, 130,000 thakhat thu in kipuak hi leh , a kik ciang khatvei khong kipuakkik lai leh Thai ah refugee bei ding a, kuaman bel thei nawnlo ding cihna zong ahihi. UN refugee camp teng khakcip tawh kikop suak thei ahihi.
Nidang in zong hibang thu om zel a ahihhangin human rights leh leitung gam tuamtuamte thuumpihna tawh, vai kikhel kik zel ahihi.
Tulaitak politician, activist leh NGO tawh kivak hon khat in, refugee puakkikna program tawh gamdang huhna angah theih nang vua a hanciamciam om in tuate khutma zong kihel thei ahihi. Tua ban ah Myanmar Army in amau langpang ding beituam ding ahihman a zong kilawp mahmah tawntung ahihi.
Refugee dongtuakte dinmun ding gamsung ah limtak geelkholh leh khamuan' masiah thagum tawh kipuakkik pen refugee te a dingin lauhuai mahmah hi ci in right group leh gam leh minam a ding a sem taktak tampi in pulak uh hi.
Refugee simloh in Thailand ah nasem 1,000,000 sang tawm zawlo om ding in kingaihsun a, tualak ah 500,000 khong bek in permit nei uh ahihi.
Thai Army kiukna abuluh zawh uh Kawlgammi nasem teng abanban in man gawp uh a passport nei leh permit nei nangawn sitlo uh hi. Tu'n refugee camp teng mitsuan leuleu ta uh ahihi.
Thailand ah galkap in kiukna abuluh zawh uh US in kumsim a neihkhawm pihh Cobra Gold kici galkap kisinna zong khawlsan hi.
Gamkiim gamkiangte kiang ah ahizongin, gamdang ah ahizongin refugee leh nasemmi peuhmah kuamah a omloh ding pen, 1962 kum a kipan Myanmar Army lungulh hi tawntung a, tutung Myanmar Democracy kikhelna ci a leitung akhem uh pen leitung in um or a um kineih uh ahihmanin, Myanmar Army in nuam sa mahmah uh hi phot hi.
Myanmar Army vaihawmna nuai ah nektawm ding beek ki thalawh zo hi leh kuamah gamdang painuamlo ahihi.
Tuta bang in ki thagum puakkik taktak ding hi leh, tua teng i nasep ding leh thaman ding Myanmar Army in vaihawm zo het ding cih pen theih sa ahihi.
Thailand a camp 9 lak ah Maela leh Umpium ah Zomi tampi zong camp beel in om uh ahihi.
No comments:
Post a Comment