Sushi News: Ngasan meidum cimang taktak ta ding hiam?

Ngabengte

Sushi hualna sung a kihel mite duh mahmah Pacific Blue Fin Tuna kici ngasa namte pen cimang ding nai mahmah ta a " lauhuai dinmun" panin " bei siang" thei taktak ta ding cih dinmun ah omta ci in November 17 ni in ngasa kem pawl khat in gen uh hi.

Japan leh Asia ah Tuna ngasa kinak nek lua ahihmanin, ngasate picing nailo mungdeng laite  nangawn kimangawp ta ahihmanin, abeisa kum 20 sungin Pacific Blue Fin Tuna 30% kiam zo ta hial ci hi. Tuna ngasa tawm tektek ahihmanin ngasa man khang tektek a, ngabengte thalawp semsem lai uh ci hi.

Leitung ah Japan te'n Tuna ngasa tamgai pen uh a, tuna kiman lak ah 80% pen Japan ngeina Sushi leh Sashimi a ding kizang ci hi. Pacific Blue Fin Tuna cihiang khat ahi " hon-maguro" kici tuna namte pen, Japan te'n thupibawl phadiak uh a Kg 200 pha khat  $ 1.76  phial a kikhawng ci hi.

US in limtak kemcing leh encik ahihmanin Pacific Blue Fin Tuna sangin Atlantic Blue Fin Tuna pen bit zaw deuh ci hi. Ahihhangin Japan te'n Atlantic Tuna bengte US ten a khambawlna un gamzawngte sumlutna kiamsak tuam hi ci in leh pang uh a, tua lehpangna pen anung ciangin lawhcing  ahihi.

Abeisa hun sungin phalna omlo ngabengte ( illegal fishing) limtak kikham  ahihman leh Japan a Tuna khawitawmte hangin Tuna cimang them phadawm ci hi.

Ahihhangin nung kum 2 sungin Tuna kisapna hong khanglua ahihmanin,   2015-17 dong tuna 20%  beng beh ding ci in leitung in khensat  hi.

Tuipi a Tuna ngalip sim leh encik pawl Pew Charitable Trust te in, tuta bang a tuna 20% a ki bengbeh a leh bel, tuna cimang hun ding nai tuam mahmah sawt nawlo ding hi ci in gen uh hi.