Democratic Alliance of Nationalities-DAN a khat veina a Zomi National Congress palai a kihel Pu Thang Bawi in Meeting report pen Zonet ah mipi theih dingin hong pulak cih ih mu ciat hi tua tawh kitonin March 24 ni in a 2 veina kikumkhawmna om kik ding ahihmanin Mipi te'n ahunlap a ngaihsunna piak ciat dingin cialna nei hi.
Atunga cialna tawh kitonin muhdaan pawl khat anuai a bangin ka sung nuam ahihi.
Plan. A
Zomi National Congress in 2010 election tawh kisai " 2008 Pingpei Constitution pen Zomi deihna tawh kituak a puahphat ahih kei a leh election ka Boycott ding uh ahihi" ci a Declaration abawl pen lenkip tinten a, mai a hongsuak bangbang phu dingin kiging leh hoih sa ing. Bang hang hiam cih leh ZNC pen mipi mandate nei party khat ahih manin Zomi Political Goal zehphit san theilo ahihi.1947-8 in zong Karen mipi deihna tawh kituak in Karen National Union- KNU in Constitution le Constitueant Assembly Election nuaksan ( boycott) a, tuni tan di'n pih lai hi. Hih pen Minam Vaang ( National Dignity) ahihi. Zomite minam kician ihihna lahna hoih pen khat ahihi. Mite'n thulak le zatak huai hong sa pan ding hi.
Plan. B
1.(i). Ei boycott hang mite'n ahih ding uh hi veve tadih phot ding uh ahih manin 2010 Nargis Facist election pan a, hong piangkhia ding kahbya kumpi le parliament pen "molh tum" a zanga eite hong peipuang theihloh nang, asungluh ding Zomi ( Chin) Party khat or 2 le thum din ding ahihi.
Kachin te'n Kachin State Progressive Party-KSPP mintawh adi'n sawm banga party khat a ding ding ih hih leh Chin Zomi Democratic Party cih pian daan khat Chin le Zomi kinialnial kul lo zual ding, donghu party khat a di'n ding ahihi. Donghu a di'n pak ding ahih manin, minam min tawh buai lo a ki compromise pak ding a, Chin deihte convince pak ding ahihi. Tua meeting ah Zomi aman dan keltal pan a i gengen leh valh hak hong sa ding, khen khat om ahih man, ka cihna hi.
A pautauh huai lohna khat ah 2010 election pen minam a dinga hoih hetlo cih thei gegu a , election lutsawm teitei nuam a, meeting bawl cih ciang Kawl colonial kumpi tawh pangkhawm a, khateh nengkai them khong, dawh ceuh nuam zek pawl zong hong kihel ding ahih manin, minam min pen, zat khawm zual ding, kamkhum awzol le kiniamkhiat tak in luui leng hong pom lel un um ing.
1990 kum in zong Palaung te'n a minam min nih uh zangkhawm in, Ta-ang Palaung Development Party ( Amin tak mangngilh ta ing) ci in phuan uh a, tuni dong official in ding lai hi.
Minnih zat khawm ding kithukim leh Chin Zomi ci a Zomi anunungzaw ah koih ding mangngilh kei ni. Zomi Chin i cih khak le Chin lak a Zomite cihna hong hi ding a , Chin Zomi i cih leh Zomi lak a Chinte cihna ahih manin, ciim ding kisam hi. Hong Mangngilh kei un. Banghang hiam cih leh Zomi pen i global nomenclature hi in Chin pen Burma min ahihi.
(ii) Party khat bek a ding khawm theilo ding ih hih leh ei le ei in Zomi min tawh Party 2 bawl ding ahihi. E.g Zomi People Party- le Zomi Democratic Party - ZDP cih bang a ahihi. Gentehna hi. Tua Zomi party nih cih loh party dang ah kua mah lutloh banah Burmese/Myanmariante'n aphualpi a a control party e.g NUP, NLD, DP cih bang minam dang party khat mahmah zong, Zogam ah ding sak loh ding ahihi. Guizam sak loh ding ahihi.
Zomi min tawh party 2 ding ni, ka cihnopna pen (a) Official Record om ding (b) Zomi i cih sam hang, ei sungah zong innkhangpa lutna ah, innsakpa hong utlo thei, ahih manin Zomi a taikhia theilo dingin party 2 om leh ka cihna hi.
Tua banah ei sung ah democratic culture cih pian khat zong ih kisinna hi pah hi.
Chin State bup Party khat a dingkhawm theilo ding i hih leh, Zomi/Chin khem peuh in Nampi Kithukimna ( National Minimum Program) khat neih ding hoih sa ing.
Tua in bang hiam cih leh Chin State pumpi leh Zomi/Chin tengna mun khem peuh ah kua mahmah in Kawl Party vote loh a Zomi/Chin Party lak ah, khat teitei beek vote ding, cih kithukimna D.A.N meeting outcome hi leh deih huai sa ing.
Kiteel khit teh pen minam party min tawh kawl ahizong mualtung mi dangte tawh Alliance/United Front bawl khawm poi nawnlo hi.
Thukhupna
Tu le tu vai ahih manin mimal ngaihsutna le muh daan su'nna ahihi. Sau kikum leng mailam i kalsun zia dingte mite'n hong khiang ding ahih manin D.A.N vai a thusun advice ki in hong pomsak un.
Zahtakna tawh,
Zo Khup
No comments:
Post a Comment