Tulai US Zomi Innkuan Pawl in Census ah Zomi kicih ciat ding cih a thukhensat uh tawh kitonin, hihtawh kisai kikupna husa ngaih mahmah hi. Kei mimal in zong "Zomi" ci in amau ( US te'n) deih in deih kei uh le zong ka gelh sawm laitak ahihi.
Hih bang kawmkal ah zanni laito( post office ) pan lai khat hong tungin ka et leh " A sawt lo in Census Form hong kikhak dinga adi'm dingin kigingkhol un, na minam min na gelh khialh leh hamphatna tuamtuam na tan lawh khak ding lauhuai, ahih manin ngentel takin sim inla di'm in " ci a hilh kholhna lai na hihi.
Hih tawh kisai in nidanglai Galpi Nihna WWII aki pancil lamin British te'n Japante lel uh ahih manin Kawlgam pan nungkikin Zogam hongtung uh hi. Zogam pan zong na'nkip ngaplo lai uh ahih manin India ah nungkin a Imphal valley pan dokik sawm uh hi. Tua tawh kiton in Bristish Burma galkap sunga om Zomi galkap ten zong India ah nungkikna ah zuih ding thu om cih ahihi.
Hih bang thu hong om ciangin Zomi British Sila Galkap sem teng zong kikum in anuai a bangin thukhensat uh hi.
Tua thu khensatna ah " Mipuang British Tote zong gallel in i gam nusiat sawmta uh ahih manin eite in amau nung zui nawnlo in ei le ei ding ta ding hi hang" cih ahihi. Zomi galkap teng khempeuh in zong thukim in thu khensatna meilet ciat uh hi.
Hih Zomi galkapte thukhensatna pen British Officer te'n a zakkhak ciang un Zomi galkap khem peuh samin kigual sak uh hi. Hih thu azak lam uh gen in, Zogam ah omsuak a British Tote India ah zuinuamlo teng " Mailam ah kalkhat suan ( One Step Forward)" ci a Officer in Order apiak leh Boot ging khat kiza guap in, kua hiam? ci in Mipuang officer tengin a et ngeingai uh leh Captain That Bawk( Muizawl Khua) bek na hihi. (Hih pen Bo That Bawk genkikna pan ki thei khia ahihi.) Thukhensatna lawmte'n zong zui inteh cih muanna tawh kalkhat asuan leh midang teng lau a dinmunah kalsuan ngamlo uh hih tuak hi.
Ataktak thukhensatna kizui hi leh Zomi galkap teng One Step Forward acih ciang mailam ah kalkhat suan ciat ding ahihi.
Ahizongin Tote launa le Tote thu leikia lo a zuih, ki zongsang lawta ahih manin Tote nungzuilo a Ei le ei ki thukhensat ( Self-determination) ngamloh lahna hoih pen khat ahihi.
Mailam kalkhat suan in amau deihna lak uh hi leh zong Mipuang te'n agal lelh laitak uh ahih manin bangmah lawh khollo a Local Guerrilla Force daan a zong mailam khualna tawh hawi kha thei hi. Ahi zong Sila lungsim kheeng lawta ahihmanin atamzaw in lungpho ngamlo ahih manun Kalargam tan azuih uh hong kul in Galpi II na abuppi in Zomi te'n igim isih pih hang galzawh ciang bang mah ngah mel ki nei lo in, neelzut bek ngei khinta hi.
Sukte Independent Army cih a om hang Political Vision nei ki omlo ahih manin WW II bei ciang Dangka 25 tek British te'n lungdam kohna in apiak khit uh ciang, SIA phiat in, Yaw Valley pan Zomite puanlom zial in ciah sak zieu uh hi. Zomite zong innlam a nungakte mai leh sakhi sungkua, bel khenei khong lunggulh in, thu dang bangmah ngaihsun tuan selo in delzen a innlam ciah uh hih tuak hi.
Bo That Bawk i One Step Forward abawl zawh kum 60 hong val ciang leitung kieu no khat ah Zomite Ei le Ei kithukhen khuan khat vei hong om leuleu ahihi.
Tutungah bel Zomi bup i hizo kei zong Tedim kampau telthei sung beek ah Millennium THAT BAWK bangzah hong om diam? cih golsau tak a galdon ahihi.
No comments:
Post a Comment