Namdang Gamdang Party ah lut loh ding

Tulai Zogam hot topic khat ahi 2010 Kawl Colonial Election tawh kisai muh daan tuamtuam ih zak tek bang ahihi.

ZNC in bel 2010 colony kitellna ah lut ding cih thadah party register nangawn sawm lo hi. bang hang hiam cih le party registerna ah 2008 Kawlgalkap thukhunpi ka pom ding ahihi, cih sign kull sese ahihi, tua 2008 thukhun pen ZNC in pomlo ahih manin register zong bawllo pah cihna ahihi.

Tua bang kawmkal ah 2010 Colonial Election lut photphot a asunglam pan Zomi le Zogam ading sep theih zah sem ding ci a Party register pawl zong omin CNP le CPP te ahihi.
Atunga Party thum ahi ZNC, CNP le CPP te panlak daan pen ih theih sa tek ahih manin tutung tam gen kei ni, kagennop pen tua 3 te banah Kawl Partyte min tawh mekuang lui sawm khenkhat om cih thu ahihi.

Tua tawh kiton in Pu Kam Khen in zong NUP min tawh mekuang lui sawm kici hi. Hih tawh kisai in ciamnuihna ahi phial zong, atak ahiphial zongin ka ngaihsutna khat hong suak hi. Tua pen bang hiam i cih le NUP, NLD, DP, USDA cih bang party te pen Zomite i kihel hang ei thu neihna bangmah om hilo ahihi.

Party khat peuhpeuh pen Central le Central Executive Committe in thu vai hawm den ahihi. Tua ahih manin Tua CC/CEC ah minam atam zawzaw in thu nei uh ahihi. Amau cih bangbanga party mipi paikul ahihi. Tua ahih tawh kitonin atunga partyte pen sia hi, pha hi ih cihna hilo in CC/CEC pen Kawlte vive atamzaw ahih manin kawlte deih daandaan a pai uh hi mawk hi.

Tua ahih manin Zomi te'n i deih thu khat peuh ih sung hang, hong ngai khia sam ding uh a , ahizong Kawl Interest vive tawh atawpna ah thukhensat in vai hong hawm lel ding uh ahihi.

Abeisa hun tampite enleng phamawh lo hi mah le, tuhun Millenium hun beek ah Zomite Kawl Party tuamtuam ah "AKAAI NGAWI " a va kihel kawikawi pen hoih nawn ding hiam? cih ngaihsun huai ta hi.

Politic a lunglut taktak te in ZNC panpih in, ameidawi zaw deuh le tu le tu donghu vai sai nuam te'n CNP le CPP te panpih leh hoih in um ing.

Minam dang, gamdangte party peuhmah bel, member mawkmawk a zong lut loh ding ahihi. Bang hang hiam cih leh Namdang, Gamdang party kuamah in kum 60 val sung Zogam ah phattuamna bang mahmah semlo uh ahihi. Asuuk pen ahih leh Zomite khantoh nang bulpi ahi "Zomi Self-determination le Kawl tawh liangko kikimna (equality) hong dal uh ahihi.

Tua ahih manin pupa hun hinawnlo, khaw mu zaw deuhta ih hih manin, Zomi Party khat peuh tha piak zaw ciat leng ih nahlawh pekzaw ding ahihi.

NUP min tawh din sawm kici Pu Kam Khen bilbel bel, Satan tupa Tan Shwe le Pa Sian tupa Sian Thang (Cin Sian Thang) kikop a a campaign pih uh zongin, Mut Pu-MP cingzo samlo ding ahih ciang ci in, kei mimal bang in bel "Free Hand" a pia hi ta leuleu ing.

Blog lengla te'n bang ci'n na ngaihsun vua guai?