Kachin gam le Myanmar gam kizomna kikhakta

Kachin thuthang pan thu kizakna ah Kachin Independence Organisation i kizomna office (Liaison Office) teng November 25 ni ma in khak ding in, KIO in thupia cih kiza ahihi.

Myanmar Army tawh 1993 kum kikap khawlna hiamkham (ceasefire) abawl khit uh ciangin, KIO in, Myanmar  tawh kizom nang, liaison office 22 pen khaw tuamtuam ah hong ahihi. Myanmar gam tawh kihona ah Panglong kiciamna tungtawn a Federal State angen uh pen, SPDC Kawlmang te'n nial uh ahihi. Tua Panglong thukimna bang a, Federal Union bawl ding  Kawlmangte a utlo ban uah, Kachin Independence Army pen Myanmar Army nuai ah Border Guard Force-BGF min vawh tawm tawh, khukdi'n ding in, thupia uh ahihi. Federal State angen uh angah loh ban uah, Myanmar Army nuai ah nautang a lutding cih ahihmanin, KIO/KIA in thuak zo nawn mahmah lo in, BGF nial cip uh ahihi.

Tukum August 22 ni in, September khasung a, Kawlgalkap khutnuai ah khukdi'n ding a, Kachin Independence Army  khutnuaimi sila banga Myanmar in asawl pen, KIO/KIA in nial ahihmanin, Kachingam le Myanmargam kikal gal piang kik thei ding dinmun ah hong om ahihi. Tua bangteng hang tawh  Kachin Independence Organisation in kizomna office teng khak dinga thupia ahihi.

Kachin Independence Organisation in, Kalay Declaration thukim pih in, Panglong Khawmpi bawl kik ding deih ahihi. Voice of America tawh interview ah, Kachin Foreign Secretary James Lum Dau in, Zogam sung Khawlpi (Kalaymyo) khua a kibawl, Zomi National Congress kum 22 cinna pawi tawh kipuangkhia khawm "Kalay Declaration" tungtang ah KIO zong pai nuam hi napi, Myanmar tawh kikap kik dektak dinmun ah om uh ahihman a, pai thei nawnlo ahihlam uh Pu Lum Dau in pulak hi.

Kachingam le Myanmargam zong, kikapkik taktak ta ding dinmun ah om ta,  ci leng kikhiallo ding ahihi.