Nei Pi Taw ah Leitung level school ki hong ding ci

Dec.24, 2010 Weekly Eleven Journal  ah Kawlmang kuapi Nei Pi Taw ah International Standard school khat kilam ding ci in kigelh hi.

1948 kum, Zomi le Kawl kipawl a, independence i lakkhawm zawh, kum 62 vingveng  khit ciang bek a, leitung level sanginn khat, kilamsawm phingphing pan ahihi. Hi banga kilam ding thu pen, Kawl mediate ah  saipi pai mah bang sak in, suak khengkhang deep ahi hi. USDP khangnote website ahi, Khit Lu Nnge ( Hun Lu Ngeng)  bang ah lim suah mahmah ahihi.

1948 kum in, Kawlte tawh independence lakhawmlo in, Zomi te'n independence tuamlak hiam,  ahih kei leh  Brunai, Malaysia le Singapore bang in nunglak hi leng, tu millenium ngawngaw in, Zogam ah leitung level universities,  colledges le high schools dim zihziah khin ding ahihi.

Bang hanghiam cile, Zogam kumpi in asemzo kei phial zong in,  Roman Catholic, Baptist, AG,EBC, SDA le pawlpi tuamtuamte pen, tulai  Kawl Buddhist kumpi kicite  banga ,  dal selo in, permit  pia mengmeng leng, leitung a asang hoihte uh, a banban in hong koih  ziauziau le uh,  Zogam ah school hoih dim phingpheng pah ding hilel ahihi.

Zogam Kumpi mahmah in zong, leitung sang minthangte tawh panla khawm a, na tampi sem thei ahihi. UNO le NGO tuamtuam tawh zong panlak khawm theih ahihi.

Tulai a, Zomi le Zogam pilnalam ah a niamna pen, leitung leh Zogam kikal ah, Myanmar kawlte in, hong khakta'n uh  hang uh ahihi. Dongkholh mahmah  cih ding himai hi.

 Millenium bang hita zawzen a, leitung level sang inn khat, a zo zong hi nailo, alam ding kicipan pen,  hailaw ding kisa , USDP Youth in a pute uh tungah,  lungdam tuak mahmah zawsop uh hi, angtang tuak mahmah uh hi,  zumhuai mahmahlelmawk  ahihi.Amau ( Kawlte ) paunak khat ah  " Lutol Hai le Gunkuang Kilok" acih bang linlian ahihi. ( Phonegyi Yoo hnih Hlay Loo).

Myanmar ukna nuai a om,  school teng pen international standard khat zong omnailo, cih alakkhiatna khat bel hi in, hoih bilbel cih loh, gending dang om mahmah lo ahihi.

Tu ta bang leh, Zomi te a ding in,  Zogam ah international school pen, 2100 masiah kingah zo nailo ding cileng, kikhiallo ding ahihi.

Nay Pyi Taw ( Nei Pi Taw, Zomi khenkhat in  Nga Pik Taw ci zaw uh  ) khit ciang, Kawl khua teng, tua khit ciang mualgam teng, atawpna ah Zogam hong pia pan  ding uh  hi. Abeisa enleng, kigenkhol khial khollo ding ahihi.

Tua ahihmanin, Pilnalam en bek leng zong, i mailam dinmun ding kimu khol thei ahihi.