Zomi nu le pa theih huai USA a sang minthangte

Tulai Zomi sungah gamdang tung, adiak in USA tung Zomite tungah, Zomi le Zogam in, lamenna lianpi nei ahihi. Pasian nasemtte, politicians, activist le mipi  lam thugen, thu kikumna tuamtuam ngai khia leng i mukhia thei ahihi.

Tua banga genkhiatnate ah, USA a om Zomite hong khawsuak a, mi lian, mihau hong suah ding uh,  Zomi le Zogam in lunggulh mahmah cih ding ahihi.

Tua banga Zomi le Zogam i lamenna, atangtung theih nang in, Zomite USA mahmah ah US level a, mi khawsuak i hih kul ahihi. US level a khawsuak nang in, abaih thei pen pen in gen leng, US top university te pan Zomi tampi in  pilna siana i ngahkhiat ding kisam ahihi.

Leitung le US pen, Myanmar bang hilo in, mihing khat peuhpeuh, koi school , koi university pan hong tuakkhia ,cih pen kinak sittel mahmah uh ahihi.Alaisinna sang zui in, nasemna le society in muhdaan le zatakna nei uh ahihi.

Zomi sung pan US president suak ding cih bang, billionaire suak ding cih bang, Zogam makai suak ding, cih bangte pen, kalsuan khatna ah, USA a university minthang le hoih penpente pan, degree ngah khia khat hi leh, chance tam zaw deuh ding ahihi.

Tua ahihmanin, Zomi nu le pate in, ei mahmah in, i panla pah zo kei phial zong,  i tate University hoih le minthangte thu, hilh kholkhol leng, tua zong Zomi le Zogam a ding,  nasemna lianpi khat mah hipah ahihi.

USA a University hoih pen le, minthang penpen te anuai abang ahihi.

1. Havard University

2. Princeton University

3. Yale University

4. Massachusetts Institute of Technology

5. Stanford University

6. Califonia Institute of Technology

7. University of Pennsylvenia

8.Columbia University

9. Duke University

10. University of Chicago

11. Johns Hopkins University

12. Cornell University

Cih bang teng ahihi. Hih banga, ahoih le minthang university te pen, ahun le amun zui in, kikhelkhel thei ahihi. Tua ahihmanin, ahunhun a kan zel zong kisam ahihi.

Zomi tangpi tangta in, ei i kah pah zo lian keizong in, amin beek thei in, itu ita te'n hong dong leh, na gen thei beek leng zong, tu tadih a ding in, masawnna lianpi khat hipah  ahihi.

Atunga university le institute teng pen sumbei paibei tam mahmah ahihi. Ahizongin, ahanciam nuamte ading lampi tampi om veve kici ahihi.

Zomi sungah i suan le khak kiangah, hih   thu muamuam leng, i sunmangte hong tangtung baih zaw deuh le kilawm ahihi.

Zomi tampi, tate maban theician mello a, US tung meimuai keei i hih ciang, cihna ahihi. Ateikhin le tei kisa mawhlo pawl a dinga, kigelh hilo ahihmanin, gelhkhial a om leh, behlapto ciat ni, ci in i ki thum ahihi.