Zomi Independence Hero Award

January 23, 2011 ni a kibawl , World Zomi Congress meeting pan in, WZC in Zomi Independence Hero Award cih pahtawina pen, Zomi National Congress Chairman Pu Cin Sian Thang pia dingin khensat ahihi.

Zomi Independence Hero Award kipiakna ahang pen, abeisa 1948 january 4 ni in, Zogam le Burma/Myanmar in, Panglong Agreement siksan a, Independence i lakkhawm pen, 1962 march ni 2 in, kikhahsuahkik ahihi. 1962 kum a kipan, Zogam pen Kawlte colony ukna nuai ah kikia in, gentheih hamsatna namkim, genzawhloh in , tuni tan kithuak ahihi.

Hibanga Burma Colony nuai a, hamsa gentheihnate, kum 4o val ithuaksung in, suahtakna ngahkik zawh nang hanciamna tuamtuam, Zomi te'n ahunhun in, kinei ahihi. CNO, CLA, ZNC, ZRO le CNF cih bang in, mapi pawl tuamtuam makaihna tawh, suahtak theihtheih nang, lampi om khem peuh kizui ahihi.

Hibanga, suahtak nang lampaina ah, Tedim mipi palai, Pu Chin Sian Thang makaih, Zomi National Congress in, party kum 22 cinna pawi pan in, Zomi le Zogam suahtakkik theih nangin, lampi lianpi khat hong ziikkhia ahihi. Tua lampi in" Kalay Declaration" ahihi.

Kalay Declaration in Zogam le Kawlgam kihel in, Kawlgalkapte khutnuai a saltang, minam le gamte suahtak theih kik nang in, Panglong Conference samkik ding, ngetna bawl ahihi. Tua Kalay declaration pen Kawl mipi teeklhiat NLD party le, a makai Pi Aung San Suu Kyi in pom ahihmanin, Zogam le Kawlgam kikal, i maban genkhawm kik theihna ding, lampi le kong kihong sak ahihi. Zogam le Kawlgam bek hilo in, Kachingam, Shangam le Panglong khawmpi a kihelkhalo, Rakhinegam, Mongam, Kawtholeigam te'n zong, Kalay Declaration thukim pih ciat uh ahihi.

Myanmar Colonial Army nangawn in, nialngam taktak loin, bawlbaih lawlai ( Too early) ding hi, ci in, Newspaper pan dawngkik ahihi.

Suahtakna ngah zawh nanga, 1947 Febuary 12 ni, Panglong khua a kibawl, gam 4 khawmpi pan kikhensat ahi, Panglong Agreeement pen 1962 kum in, Myanmar Colonial Army migilo te'n palsat ahihmanin, Zomi le Mualgam teng Kawl sila kisuak ahihi.

2010 kum ciangin, Pu Chin Sian Thang makaih, Zomi National Congress in, " Panglong Khawmpi" neihkik ding pulakna ahi" Kalay Declaration" hong puangkhia uh pen, Kawlgam palai NLD, Shangam, Kachingam le Non Burman State tengin, hong thukimpih dinga, Pu Chin Sian Thang lmakaih ZNC in pan hong la zo, mualsuahzo uh hi, ci in WZC in muhkhiatna nei ahihi.

Tua ahihmanin, Zomi le Zogam suahtak kik zawh nang, Zogam leitang ngahkik zawh nang, lampi honna a, hong makaih ahi, Pu Cin Sian Thang pen World Zomi Congress in "Zomi Zalen Pu Pahtawina" English in Zomi Independence Hero Award- ZIHA cih pahtawina piak ding in, kikhensat ahihi.

ZIHA pen pahtawina laipi khat leh, sumtang in USD10000 piakzawh ding in, ngimna kinei ahihi. WZC in 5000 sikdinga, adang 5000 pen mipi lam pan kilamen ahihi.
WZC sikding 5000 pen, 2011 a kipan 2015 tan, kum khat 1000 ta, kum 5 sung piak 5 kisuah ding ahihi. Mipi lam pan, pahtawina zong akumkum a minvawh daan daan a, piak theih dinga lampi kihong ahihi.

Pahtawina pen 2011 kum Zomi Namni in, kipuangkhia dinga, pahtawina sum pen Febuary khabei le March kipatlam in, kikhak ding ahihi.

Tua ahihmanin, Zomi khempeuh in, i gam le minam in, suahtakna i ngahkik theih nang a,hong masial sak ahi, Pu Chin Sian Thang pahtawi piakna ah, kuamah thasial kei ni, ci in i kihanthawn ahihi.