Zomi Nam Ni tangthu thak

Tutung 2011 kum Zomi Nam Ni ah, Zomi tangthu a ding, ciamte thamcing thu tampi om ahihi.

Tuate
1. Zomi Independence Hero Award
2. Zomi National Day
3. Zomi People Power 2011

Cih teng ahihi.

1. Zomi Independence Hero Award

ZIHA pen Zomi tangthu ah Independence min tawh, pahtawina kipia masa pen hi, tua banah Zomi pahtawina ah asang penpen khat ahihi. World Zomi Congress in Zomi makai Pu Chin Sian Thang tungah Zomi Indepedence ngahkik theih nang in, Kalay Declaration tawh ma hong la ahihmanin, Zomi tangpi tangta tang a, kipia ahihi.

2. Zomi National Day

Zomi Nam Ni pen akibawlcil a kipan, Chin National Day vive a kibawl hi a, Zokam a Zomi Nam Ni ci a, paukam tawh ikihona ah kiletkhia mawkmawk hi.

Tukum a kipanin, Zomi National Day ci in, muntampi ah a bawl kipan ta i hihi. Chin National Day ci in, mun tampi mah ah, kibawl veve ahihi. Ahizong in, 2011 kum pan Zomi National Day cih mintawh bawl kipanpan  ta cih ding ahihi.

3. Zomi People Power 2011

Tukum Tedim Khuapi a kibawl, Zomi Nam Ni ah khangno makai 5 kiman in, tua thu lungkimlo in, Zomi 500 val in police station um cih in, lungphona kilak ahihi. Zomi khangno makaite pen, Second Panglong Conference vai supportna sticker hawm uh hi, ci in ngawh uh a amat uh ahihi. Mipi thahatna tawh zan khat zong kem ngamlo in, nitak ciang khahpah uh ahihi.
Hih 2011 Zomi National Day a people power ( mipi thahatna)  lahna in, Zomi le Zogam sungah lametna, kimuangna le hangsanna honguan kik zo ahihi.

Zomi Nam Ni Lungphona pen " Zogam Buh Al khuang ta " cihna hi pah ahihi..