( Hi article www.zogam.com a Pu Thang Khan Lal Ngaihte gelh kila sawn ahihi. Ama mimal muhna hi in, a sim te'n eima khuak tek tawh ngaihsun tawm ding ahihi. Pu Thang Khan Lal pen lai gelh hat mahmah khat hi in, English tawh zong agelh zel khat ahihi. ZRO thu leuleu bel akip akawi a thei hilo in, Delhi pan a agal muh daan agelh ahihi. Adik zekzek om a mittaw khat in saipi zawt a " Pheng hamna" zong tam veve ahihi. Laigelh cih loh asep dang thupi lua lawmlawm bel , India ah kum 10 vingveng ka om ngei hang in, a zakha ngei nailo ka hihi. Zo Khup)
Zomi Namni 2011, Suangdoh khua ah February 20 in ZRO saina in zatzoh hi nawnta. Hiai ‘national level’ a zatna hun a mun a vatel theilou te’n i na mekmatna pen uh tuh Zomi Namni Miss Contest ahi. I Zomi nam vai leh a Namni mahmah i lopdan te toh kisai ana gal etthohte ngaihdan bel Zogam.com™ khawng a ‘comments’ te isim leh bang tanhiam theihtheih hi. Thil omdan a positive deuhleh nguun deuh a etkikna Pu K. Vungzamawi in hon bawl a, navak huai tuan mahmah. Hiai thugelh huai toh kisai a houlimna sutzomna dan dia ngim ahi. Awlmoh thu a ahoih deihna toh gelh ahi a, lungsim kihong tak a simdia gelh ahi.
Apaita kum 15 sungvel in khotang leh Zomi politics ZRO te thunuai/pina a om chileng kikhial louding hi. Nidang in tribe-level in politics ina sai ua, eimah tumtum in political demand tuamtuam i nabawl sek uhi. Tuachu, Zomi sung a tribe te ZRO a kigawm di, ZRO in ‘national politics’ saiding, tribe tebel amau tribe sung kivaipuakna, customary law leh mimal kal thubuai khawng ana sai di chihdan ahi. ‘National politics’ kachih chia zomi leh zogam uapsung teng ai oh a ding a, tulel a i dinmun leh hon vaihawmkhum dante sui leh maban di geel a, namdangte leh government toh kisaina a mala di kachihna ahi. A idea bel hoih mahmah. Kum 15 sung a thil omdan enle bel malam nawt sang a nungtolh kisak theihna a tam mahmah a, hilele eimite Rev. (Dr) Pumza Tombing gendan a phun phun toh thuman mahmah thuahte ina hihziak un tutan pawltuam omlou in ( a omdek chia le kuitung lou in) amau mah thunei pen in omden lai uhi.
Athunei uh chih akilat na mahmah khatchu MLA election vai ah ahi. Churachandpur district sung a constituency nih (Thanlon leh Singngat) ah amau deihdeih ching himai. Henglep ah le huaimah chihtheih phial. Ahichih theihna ziak ahihleh mipi deihpihna ziak hizaw lou in thau leh thautawi, cadre teziak ahipen mai. Bangteng hileh thunei bel hi veve. Lamka ah bel government ahatziak leh khopi ahihziak toh amau chihlouh lamlam mipi’n vote dimah bang. Bangteng hileh tunai a MDC election khawng a thil omdan et in adeihdan ua be lei gamsung neuchik bel thunun theilai uh chih chiang hi.
Sawt nailou in ZRO President Thanglianpau in Zogamonline.com tetoh a interview na uah mipi te telching leh mipite deihna bang a president apang hi’n kigen hi. 20th century kipat vel apan in mipi’ vaihawmna, democracy kichi ngaihnatna ahonglian a, tuchiang in khovel kilteng azelsuak ta. ‘Democracy’ chihkha lar gawpta inchin, akichi naak tata bang a democratic lou ana hidaihta. Hitler in avaihawm sung in German mipite deihna mahmah amah taksa a personify a, mipi aw amah kam apawt dan in ngai a, democratic kisa mahmah hi. A om nawnlou Communist East Germany bangle ‘German Democratic Republic’ kichi hi. Tulel a khovel a mipite nuaisiah a a omna penpen a kigen North Korea bangle amintak ‘Democratic People’s Republic of Korea’ hi zezen ahi. Eigam ah le helpawl leh pawl khat pepeuh inle athilhih uleh kithah tuahna teng ah mipite min suang khial hetlou uhi. Adiktak in ZRO president leh vaipaw dangte mi nautang in vote khia a itel uh hilou uhi. Asep abawl ule mipi’n kitheih pihlou; huaiziak a accountability tatak omthei lou. Aziak khat ahihleh revolutionary organization ahihchia, Indian constitution zui a political party dan a pailou. Bangteng hileh, PNC president le mipi’n kitel tuanlou; i hausate nasanle kitel lou, akhang khang a paisawn. I singtang kivai puakdan uh tangpi ah mipi’n thu kinei lawlou dan ahi. Bangteng hileh, ‘carbon copy democracy’ chih dandeuh a paidan khat zui a kitelna khat nei a telching ahihchiang un, mipi’n le ei a dan in ki pom mai hi. Huaichia, tax bangle hong dong uh, kipia. Thu nei uh ahihchia vapom louh mawk a le kanna lou, himai.
ZRO thiltup bel a min lamsau isim leh kithei mai hi. Zomite gamkhat leh vaihawmna khat nuai a gawmkik di, chihchu hi, hilele huai tangtun nadia bangchi bang a panla tatak di chih ah buaihuai ngal hi. Revolutionary politics sai di chu chi, galvan le neizek sam, hilele atatak a hizou/hingam nai mahmah lou. I Zogam pen i tenna ahihhang in khovel politics ah non-entity hi a, huchia kougam ahi, koule kou kivaihawm di kahi uh ichih lebel khovel theihpih a ana neitu India, Burma leh Bangladesh tetoh kihou a, amau apan ngetsuah ngaisuak hi. Burma ah bel Chin state, khovel theihpih in a om. Bangladesh zaw i gensek hang in theipha khang. India ah Mizoram, ei a sa ichi gagaih a, a kizen mahmah phot. I buaipih tatak leh ihat na pen bel Manipur, Churachandpur district lel ahi.
Tribe-level a politics isai lai un political demand chiang tatak inei ua, tribe-level leh tribal student’s union level khawng ah Autonomous District Council (under 6th schedule), Union Territory, leh statehood chihte i na ngen ek ek sek uh. Hiaite India constitution a omsa,zatle kizang sa, imuhtheih ngenmah ahi. Lohching phialphial. ZRO nuai a i om uapan in bel i political demand tatak achiang nawnkei. Sovereign statehood chihchu gen ngaihna omlou, kithei chiat. Ahihleh bang a India government apan a i deih? Gen khiakhia nuamlou, ahuntak chia puangkhe geih di chihdan himawk. Khatvei vei lah ‘political autonomy’ ahi ideih khawng chi nemnum, huailah descriptive term maimai, constitution ale om zenzen lou. Zomi Namni khawng a thugenna teng a ‘unau khat, Zo apan piang ngen ihi. Kikhen thei ihikei; pau in honkhen chia beh in hon gawm, i omna atuam hang a in culture, nundan in hon kaankhawm thouthou’ chih routine hideuh gige. Tup le ngim, nasep leh progress report chihte om tawmlua. Akal laklak abel Delhi, Kolkata leh mun tuamtuam khawng a Home Ministry/Intelligence Bureau/Army official tekhawng toh kimu zel, bangthu kigen a, bang demand kibawl chihlah mipi’n kithei tuanlou. Hun bangtan hiam paisa apan India government toh Suspension of Operations (SOO) adia suaikai, government leh media hon theih dan a ‘Kuki militant group’ khat a va om.
Hiaiteng gahsuah ahi ngei dia, zandeuh in Union Home Minister Chidambaram in ZRA designated camp ahong veh a, i demand le ipuang kheta: Autonomous Tribal State. Hiai dinmun pen Indian constitution ah nidanglai Assam toh kisai in genkhak ahi a, hilele koimah azat ahi naikei. Huaichiah hiai dinmun deih a demand bawl India ah namdang a omlam kathei naikei. Aneep pen in genle, abaih hetkei di. Bangteng hileh lawm Nagate khawng in ‘bang e nou Churachandpur mite’n nadeih uh’ hong chihnawn chiang ua gendi omphot hiven, masawnna hilou di hia... demand khat neithei ta, chi ou..
Umawi in a report na ah tutung Namni i unau Kuki kichite toh bangle kilawm khawmtheita (subtext: hon pompih theita uh), chi’n gen hi. Adiktak in unau khat ihi chihbel iki thahtuah ekek lai uale itheih vek uh ahi. Iki khenna tatak uh pen i nam min thu uh mah hilel. Khat in Kuki ihi chi, apomlou dangteng thu leh tha a zohsawm; khat in Zomi chi; khat in Mizo chi. Huai hilel. Hiai dungzui a ZRO’ internal policy lian penpen khatle unau Kuki kici laite, Hmar kichi tuam veuvaute, Zomi ahi uh chih pomsak di chih hi’n kathei. Huchia hong pompih tatak a, Zomi minsuang a pangkhawm theidi ihih leh adeih huaipen ahi. Hilele, kuate hiam in a patauh deuhchiang ua hong beel zawzen a, ahuchih louhkal a lehpan pahzel theihdi dan unbel omnawn kei le. Tipaimukh area a Meitei helte ahatluat lai ua, HPC Chairman in ZRA camp a panpihna ngena vakuan a, Zomi vek ihi vachi zezen. A khonung a buaina piteng hongbei alah ngei a ngeina suk zel, chih bangle om hilou maw... Mi’n hon belh a, hon pom tatak i utle chu dinna kichian nei in, tha hat in, proactive tak in politics sai le. A thu a genthoh dia zaw atheilou ki om nawnlou hiveh aw, atatak in.
Huaichiah, thukhat ah, iki nakna pentak nomenclature ahihlel ziak in huai a izoh kechu zoulou hiphot leng kilawm. Igen noptak bel, SoO a ‘kuki militant group’ khat dan a mi nautang leh media in hon gen a, huai accept ihih lebel i nampi mindia Kuki pom chihna himai lou di? A sungthu ah hat kisa sim in, chairman dinmun khawng valen lengle Zomi group chilou a Kuki group chih va pom ihih lebel Sumpi chihdan hileh, ‘team sikhinsa’ telak a vatel kihi lou di? I gengen leh Saikot MLA pa’n public meeting teng a Lamka MLA pa phat phat, ‘Puthang leadership nanuai a i district in masawnlua...’ chideuh gige, lah atatak a amah thuthu a anunglam apan pei ana hi maimah, chihbang phawk hang e.
ZRO te hatlouhna gige khat chu documentation leh propaganda ahi. Thaukap lah ngailou phot ahihchiah huailam hong kisaan le uh, atatak a politics saidi chi ihihleh. Monthly/bi-monthly newsletter chih bang omthei leh. Buailai a Evening News ineih uh bang hoihsa mahmah ing. Zomi Namni a presidential address khawng bang ki publish zel henla, record in kikoih leh. 1990s bullama thu hoih tatak huailai a President K. Guite in agen te khawng reproduce theihleh. Huaikhawng kan hong hilou di eive, inam tangthu di; India tangthu bang sim ikichih chiale Gandhi leh Tagore leh Tilak chihte khawng open letter kikhak tuahtuah khawng kisim hi maimah eive. Nasepleh kizatna, progress report chihte bang omthei leh. Incident tuamtuam (cadre te’n mi vawlum kha, etc) tekhawng clarification om pahpah henla, ngaihdam nget zumkei le, eilak ah. Ahilou tawp in gam ngaihla cadre te’n aphuah uh hoih tatak te bang kisuah in amau tangthu bangle kigelh zel leh. Huaichiah sihna, manna tuak bang omchiang in (abiik in cadre te) obituary hoihtak in kibawl zel leh. Huan, newspaper khawng a interview piak chihkhawng kihtaak bawl maimah lou in, itup ingim, i vision (a omleh) mipi hon vaktute theihsiam dia genkhiakna chance in ngaithei ta le..
Bangziak a internet leh open forum deuhteng a ZRO leh Zomi politics akigen chia mipi (abiik in tuailaite) hichitel a sceptical a, a ZRO lamte hichitel a defensive ahi di? Tax lah khon tawplou, nautang lak a thuneihna tallang tak a tawi, politics a sepkhiak leh nasep kichian mipi muhdi omlou. Mipi muhtheih sunsun chu mimal inn di hoihtak tak kilam te leh gari liantatak a kholak a maigum gemgam a tai vavat. I gensa bang in eilak na nana ah chu Zomi hihleh hihlouh thu ah mipi kuamah kibuai nawnlou hi. Hiaithu mass campaign na ah ZRO hilou in ZNC, ZORO, leh Lengtong Pauno, Thawnkham leh V. Siampu tekhawng hahpan kha zawtham uhi. ZRO nasep ditak bel huai a foundation omsa pansan a i political demands leh aspiration te India (Manipur?), Burma, Bangladesh, etc. heutute kiang tut vevet di hita ahi. Zomi Namni hongtun teng a akibang ngen..’unau khat ihi uh...’ chih gige kiza peih nawnlou. Thei law mahmah. I demand te bangtan atungta a? Kum paisa hunsung in bangna isem a? chih eive a kithei nuam. Huai kihilh hilehang mipi’n honzuih ban ua, inung a phunphun pen ule tawpta di uh eive.
Atawpna di’n, MLA leh MDC, galvan hatna toh ichinsak te bang tupna ahia? India government toh kisai a political demand, tup kichian nei a, itup leh ideihte Parliament/state legislature a phudia deih a, leh government mah theihdia i hatdan show nadia zangnuam ihihleh ahidi mah bang kasa. Nidang in KNO kichi recognized party ana om a, MLA 2/3 aneih gige un ‘Kuki’ chih namdang lak a phoulak mahmah hi. Delhi khawng a ZRO heutute honghoh chiang unle mi hunkhop inchu candidate inam politics hon support theidi select mai hoih ana kisakpih sek mah ahi. Hilele, tulel a omdan abel itelchingte apan sum/ work contracts/ project sanction chihkhawng kan bangmah ngenlou bang kakisa. Huaitan kan i lungsim in baan mahmah lou hia leh? Khawmpi khawng a Rs 5Lacs khawng honthoh uleh kisuanglah pah maimah ihi hia? I MLA, ZRO-support a chingte’n ZRO leh Zomi political demands leh aspiration toh kisai bangzah vei Manipur assembly ah agenta uh? Bangzah vei Delhi ah India vaihawmte houpih di’n delegation in hongkuanta uh? Hichi maimah chu kanna loulua eivoi. Mipi suheh law zawmah. Tup le ngim ginatak inei kei chih chiang lua. Mipite a sceptical uleh alamdang hi mahmah lou ahi. Suangdoh Zomi Namni lopna ah maban a MLA lunggulh deuhteng khawng ‘talkshow’ om chihdan ahi a, orkut picture video khawng ina etle bel thalawp luatna di omtuan kei.
Kei mimawl gintak dan in bel i sepkhiak leh struggle ziak a eilawi in bangmah deserve di nei nailou. Hilele, khovel khangthu ale chu midangte struggle ana zaalzou pihkha geih, historical accidents ana hamphat pih, luck nei anei, chih bangle omthei lua...
No comments:
Post a Comment