Zogam sunga Kalaymyo Jail cidamna tawh kituaklo

Kalaymyo jail pen niin mahmah in, cidamna tawh kituak hetlo hi, ci in nungdeuh a vahawh political prisoner innkuanpih khat in pulak khia hi.

" Kalaymyo jail pualam ah vok kikhawi in, tua pan in vokdaai gimnamte jail sungah lut ahihmanin, huih siangtho hetlo hi" ci in gen hi.

Tuabanah jail sunga singat set pan zong, gimnam hoihlo tampi kizel ahihmanin, Kalaymyo jail pen namsia mahmah ci in gen beh hi.

" Singat set a meikhu gimnam , jailbup in dikkha den ahihmanun, nuntakna nangawn lauhuai zah dong in om hi, jail sungah lah cidamna lam kikhoina (healthcare) hoih hetlo ahihciang, patauh huai mahmah hi" ci in genzom hi.

Hibang dinmunte hangin, gam le lei khualna hanga jail kiatlawh political prisoner te'n, panlakna khat hong kipan khia uh ci hi.


Jial/jail sung dinmun la kiphuak. lasa pen Hualngo Zomi numei Lin Lin( Amintak kitheilo) hi in, RFA Senior Corespondent Ko Nyo innkuanpihnu ahihi.

Kalaymyo jail a political prisoner te'n anuai a bangin phu uh hi.

1.Innkuan pihte tawh suakta tak a kimu kiho theihna.
2.Agamla a om innkuanpihte tawh ni 15 ciang khat vei ta minute 10 sung phone tawh kiho theihna.
3. Radio le TV suakta tak a ngaithei entheina.
4. Jail handbook sunga kigelh human rights teng akim a ngahtheihna.
5. Tua jail handbook a kibehlap hamphatnate buci'n sakna.

Cih thu 5 phut kipan uh hi, ci in kiza hi.

March 11 ni in mi 4 in sign uh a, March 18 ni in mi 8 in sign beh uh ci'n kiza hi.

Hibanga aphutna lai uh pen Arakan mihangsan 8 in, nimit March 18 tawh sign sawn in, USDP/A president Thein Sein, NLD, Internationa Committee of the Red Cross-ICRC le International Labor Organisation ah ngen uh, ci in kiza hi.

" Tutunga political prisonerte panlakna a lawhci'n theih nang Khawlpi khua Zomi te'n zong i hih theihna tek pan panpih ciatni" ci in Kawlpi khuasuak Zomi thumu khat in a khawpihte hanthawn hi.

Kalay/Khawlpi sunga jail teng pen, Zogam sunga om ahihmanin, Zomi tampi in zong political prisonerte na panpih thei zel uh hi. NLD makai Pu Tin Oo hong kiat lai in zong jail sungah Zomi te'n limtak nadon nakem kei le, ahingsa a pusuak nawnlo ding hi , ci'n USA a kihem Zomi political prisoner lui Pu Mang Suan Pau in zong gen ngei hi.