Thuthang kizakna ah US president i palai Derek Mitchell pen Kalwgam ahawh laitak hi in, USDP makaite tawh akimuhna ah " National Reconciliation' kici minam tuamtuam le pawl tuamtuamte tawh kilemna bawl dingin, hanthawn ahihi.
Hibang kawmkal ah USDP le UWSA kikal ah hiamkham thukimna letmatthuh thei, ci in tuni a suak Myanmar Alin le Kyemon ah suak zeizai hi.
Tua kithukimna ah athupi diakte anuai a bang ahihi.
1. UWSA pen Kawlgalkap nuai ah omlo a UWSA mah a ding suak ding.
2. Wagam khangto nang Wa kumpi in suakta tak a sem thei ding.
3.Wagam ah Kawlgam ulian le galkapte phenglut theilo ding.
4. Wagam khawpi Pang Sang ah Kawlgam palai zum ( ambassy bang) koih ding.
5.Kawlgam ah zong Wagam palai zum hong ding.
6. Wagam le gamdang kizopna a om ciangin Kawl kumpi zong zasak zel ding.
7. China le Wagam kikal bel suakta tak a kizom thei ding.
Cih teng le thudang tuamtuam kihel hi.
Mualgam teng le Kawlgam akikap san laitak ahihmanin USA palai hong pai cianga, alawhcingna uh lah ding khat zong omlo ahihman a, WAgam le Mongla pawlte mai te a, hih kithukimna bawl pih uh ahihi. Wagam makai khat in agenna ah BGF lutding cih pen hong gennawnlo uh a, 1989 lai daan mah a om thei ding hong cih ciang vua, letmatthuh/suaikai ka hi uh " ci in gen hi.
Wagam pen Mizoram cia khong pha a, Wa State Government in uk in, Wagam bitna zong United Wa State Army- UWSA in vaipua ahihi. Kawl galkapte hawlkhia a sisan le khawul tampi tawh alakkik uh ahihi. UWSA ah galkap 20000 val om a, anungthuap thei 30,000 zong kigingsa in om den hi kici hi. Wikileaks thusuak Yangon American ambassy pan Washington D.C sikkhau lai ah, UWSA in USA bawl vanleng kapna rocket 30 nei hi, ci in ki report hi. Report dang khat ah zong North Korea pan in AK 47 thautang million 30 lei in, kem kkikeuh lai uh, kici hi.
Wagam pen China tawh official in kizom uh a, tua banah North Korea, Vietnam, Laos, Cambodia le leitung gam khenkhat tawh zong kizopna nei ci in kiza hi.
Source dang khat pan kizakna ah, Kawlgam in thagum tawh nawk a kikapna pelh theihloh in om bang hi leh, Wagam in leitungbup theih a Independence apulak khak ding lau a, Kawlgam in kilemna bawl pih saisai zong kici hi.
USA le nitumnalam a democracy gamte i khaktanna pen Derek Mitchel lungkim sak zo le uh, kihong kik ding a lamen uh zong ahihi. USA in a pheituam suah uh phamawh asak kei leh, leitung ah alau ding uh om nawnlo ding cih khualna tawh UWSA tawh kilemna alak uh hihtuak hi. Mualgam kikhaikhawmna UNFC in bel amalmal in Kawlgam tawh kakiho nawn kei ding uh hi, ci in pulak khinzo hi.
No comments:
Post a Comment